MATAUPU AUTŪ | PE E AOGĀ LE TATALO?

Aiseā e Tatalo ai Tagata?

“Sa malosi tele laʻu taalo i taaloga faitupe. Na ou tatalo ia fiki saʻu laki, ae e lē o le mea lenā na tupu.”—Samuelu,a Kenya.

“Pe a matou tatalo i le aʻoga, e pau la matou mea e fai o le tauloto o tatalo na aʻoaʻoina ai i matou.”—Tiresa, Filipaina.

“Ou te tatalo pe a ou feagai ma faafitauli, ma tatalo ina ia faamagalo aʻu agasala ma ia avea aʻu o se Kerisiano lelei.”—Makatala, Ghana.

1. O se tamāloa o loo tatalo i se laulau mo taaloga faitupe; 2. O se teineitiiti o loo tatalo i le aʻoga; 3. O se fafine o loo tatalo

Ua iloa mai i manatu o Samuelu, Tiresa ma Makatala, e eseese māfuaaga e tatalo ai tagata, ma e lelei atu māfuaaga a nisi nai lo o isi. O nisi e tatalo mai i le loto, a o isi e tau lava ina fai. E ui i lea, e tusa pe e tatalo tagata ina ia pasi a latou suʻega i le aʻoga, tatalo ia mālō a latou ʻau taaalo, ia taʻitaʻia e le Atua o latou aiga po o nisi lava māfuaaga, ae ua iloa e le faitau selau miliona o tagata e manaʻomia ona latou tatalo. Ua faaalia mai foʻi i suʻesuʻega, e oo lava i tagata e lē naunau i lotu e tatalo foʻi.

Pe e te tatalo? Afai o lea, o ā mea e te tatalo ai? E tusa pe e fai ma au masani le tatalo pe e leai, ae atonu e te taumānatu: ʻPe e aogā le tatalo? Po o iai se tasi o faafofoga mai?’ Ua taʻua e se tasi tusitala le tatalo ua na o se “faiga e maua ai le toʻafilemu.” E ioe foʻi nisi fomaʻi i lenā manatu ma faapea mai, o le tatalo o se “isi ituaiga o fualaau.” Pe a tatalo se tasi, po o ia tau ina faia se faiga e leai se uiga, ma ua na o se auala e maua ai le toʻafilemu?

I le Tusi Paia, o loo taʻua ai le tatalo o se mea e sili atu nai lo na o se faiga e tau ina ia maua ai le toʻafilemu. Ua taʻua i le Tusi Paia e iai sē o loo faafofoga moni mai lava i tatalo e faia atu i le auala saʻo ma le uunaʻiga saʻo. Pe e moni lenā manatu? Seʻi o tatou iloilo ni faamaoniga.

a Ua suia nisi igoa.