Auala e Feagai ai ma Lagona ua Faamanuʻalia

INA ua tatou faatoʻā fananau mai, sa lē mafai ona tatou faia se mea na o i tatou, ae sa faalagolago atoa lo tatou saogalemu i o tatou mātua. Ina ua tatou savavali, sa tatou feiloaʻi i ni tagata e fou i le vaai sa pei o ni tagata tinoeese. Sa tatou fefefe iā i latou pe afai e lē o iai o tatou mātua. Ae o le taimi lava e tatou te fetagofi ai i le lima o lo tatou tamā po o le tinā, ona tatou lagona loa lea o le saogalemu.

A o tatou lāiti, sa faalagolago lo tatou fiafia i le alofa ma faalaeiauga mai i o tatou mātua. Sa lelei o tatou faalogona ina ua iloa e alolofa o tatou mātua iā i tatou. Ina ua la faamautinoa mai e tatou te lelei, sa atili ai ona tatou lagona le mautinoa ma faia nisi faaleleiga atili.

A o faasolo ina tatou matutua, sa fesoasoani mai foʻi a tatou uō vavalalata ina ia tatou lagona le mautinoa. Sa toʻafilemu o tatou faalogona pe a iai faatasi ma i latou, ma faaitiitia ai lo tatou fefefe a o iai i le aʻoga.

A o tuputupu aʻe tamaiti, e masani ona moomoo ia iai faalogona na taʻua i luga. O nisi talavou e tau lē iai ni a latou uō vavalalata, ma o le toʻatele foʻi o tamaiti e itiiti se lagolagosua mai i o latou mātua. Ua taʻutino mai e Melissaa: “O so o se taimi lava ou te vaai ai i ata o ni aiga o loo faifaimea faatasi, ou te faapea ifo, ʻMaʻimau pe ana ou olioli faapea a o oʻu laʻitiiti.’” Atonu e faapena foʻi ou faalogona.

AAFIAGA O LAGONA FAAMANUʻALIA A O TUPUTUPU AʻE

Atonu e te leʻi lagona le mautinoa a o e laʻitiiti. Atonu e lē tele ni faalaeiauga na e mauaina, ma le alofa na faaalia atu iā te oe. Atonu foʻi e te manatua le tele o taimi na misa ai ou mātua ma iʻu ai ina malepe le la faaipoipoga, ma atonu ua e tuuaʻia sesē ai oe. Ae o le itu e sili ona leaga, atonu sa fai atu e se tasi o ou mātua ni upu faatigā pe fasi faamoʻamoʻa oe.

O le ā le auala e ono tali atu ai se tamaitiiti ua iai lagona faamanuʻalia? O nisi talavou ua faaaogā fualaau faasāina pe inu seʻia tau i le ua. O isi ua auai i ni kegi ina ia lagona ai le tāua o i latou. E ono amata foʻi e nisi talavou ni faigāuō ma le isi itupā, ina ia lagona ai le alofa ma le faapelepele. Peitaʻi e seāseā ona tumau nei faigāuō, ma e masani ona atili faamanuʻalia ai faalogona pe afai e iʻu ane e toe malepe.

O talavou ua faamanuʻalia faalogona ae ua latou ʻalofia na faiga lē atamai, atonu e tuputupu aʻe pea ma sina faalogona e tāua i latou. Ua faapea mai Ana: “Sa ou manatu e leai soʻu tāua ona o le tala lenā a loʻu tinā e fai soo mai iā te aʻu. Ou te lē manatua se taimi na ia faamālō mai ai pe faaalia mai le alofa iā te aʻu.”

E iai nisi māfuaaga e faamanuʻalia ai o tatou faalogona, e ese mai i le auala na tausia aʻe ai i tatou. E ono māfua ona ua tatala se faaipoipoga, o faigatā o le soifua matua, po o le popole i o tatou foliga vaaia. Po o le ā lava le māfuaaga, ae e mafai ona mou atu ai lo tatou fiafia ma faaleagaina ai a tatou faiā ma isi. O le ā e tatou te faia ina ia foʻia ai nei faalogona?

E MANATU MAMAFA MAI LE ATUA IĀ I TATOU

E ao ona tatou iloa e iai sē e mafai ona fesoasoani mai iā i tatou, ma o sē e finagalo e fesoasoani mai, o le Atua lea.

O le feʻau lenei mai i le Atua e ala mai i lana perofeta o Isaia: “Aua e te vaai solo, auā o aʻu o lou Atua. Ou te faamalosi iā te oe. Ou te matuā fesoasoani iā te oe. Ou te matuā lagolagoina oe i loʻu lima taumatau o le amiotonu.” (Isaia 41:10, 13) Maʻeu se faamāfanafanaga pe a mafaufau i se uiga faafaatusa, e finagalo le Atua e na te uuina o tatou lima! E leai la se māfuaaga e tatou te popole ai!

O loo faamatala i le Tusi Paia auauna a le Atua sa lagona le popole, ae na maufaatuatuaina le Atua o le a puipuia ma faasaoina i latou. Sa manatu Hana le tinā o Samuelu ua lē taulau o ia, ona sa lē mafai ona ia fanauina se pepe, ma sa masani ona ulagia o ia ona e lē fanau. O le iʻuga sa tagi o ia i le tele o taimi ma lē fia ʻai. (1 Samuelu 1:6, 8) Peitaʻi, ina ua sasaa atu ona faalogona i le Atua, sa lē toe popole o ia.—1 Samuelu 1:18.

E iai taimi sa lagona ai e le faisalamo o Tavita le lē mautonu. Sa tulituliloa o ia e le tupu o Saulo i le tele o tausaga. E tele taimi na sao ai mai i faufauga ina ia fasiotia o ia, ma o nisi taimi sa ia lagona le fiu ona o faafitauli na feagai ma ia. (Salamo 55:3-5; 69:1) Peitaʻi na tusi o ia i le Salamo 4:8: “Ou te taoto ma ou moe ma le filemu, auā e na o oe Ieova e, ou te nofo ai ma le saogalemu.”

Sa faailoa atu e Hana ma Tavita o la faalogona mafatia iā Ieova, ma sa fesoasoani Ieova iā i laʻua ina ia tutumau. (Salamo 55:22) E faapefea ona tatou faia foʻi faapea i aso nei?

AUALA E TOLU E FEAGAI AI MA LAGONA FAAMANUʻALIA

1. Ia maufaatuatuaina Ieova o se Tamā.

Sa faalaeiau e Iesu i tatou ia iloa lona Tamā, o le “Atua moni e toʻatasi.” (Ioane 17:3) Ua faamautinoa mai e le aposetolo o Paulo ʻe lē o mamao le Atua mai iā i tatou taʻitoʻatasi.’ (Galuega 17:27) Na tusi Iakopo i le Iakopo 4:8: “Ia outou mafuta vavalalata atu i le Atua, ona mafuta vavalalata mai lea o ia iā te outou.”

O le iloaina e iai lo tatou Tamā i le lagi e alofa ma manatu mamafa mai iā i tatou, o se laasaga tāua ina ia foʻia ai faalogona popole. E moni atonu e umi se taimi e manaʻomia ina ia atiaʻe ai lenei maufaatuatuaina, peitaʻi e toʻatele i latou ua tofo i le tāua tele o le faia faapea. Ua faapea mai Kalolina: “Ina ua avea Ieova ma oʻu Tamā, sa ou maua sē e mafai ona sasaa atu i ai oʻu faalogona loloto. Ua avea lea ma mapusaga tele mo aʻu.”

Ua faapea mai Rasela: “Ina ua ou lagona le tuua toʻatasi e aunoa ma oʻu mātua, sa fesoasoani mai Ieova ina ia ou lagona le mautonu. E mafai ona ou talanoa ma ōle atu e fesoasoani mai i oʻu faafitauli, ma sa fesoasoani mai o ia.”b

2. Ia saʻili se aiga faaleagaga.

Sa aʻoaʻo e Iesu ona soo ia manatu le tasi i le isi o ni uso ma tuafāfine. Na fetalai o ia i le Mataio 23:8: “O le ʻauuso uma outou.” Sa finagalo o ia i ona soo moni ia alofa le tasi i le isi, ma ia avea i latou o se aiga toʻatele faaleagaga.—Mataio 12:48-50; Ioane 13:35.

E taumafai ma le faamaoni faapotopotoga o Molimau a Ieova, ia iai le māfana ma faamāfanafanaga o se aiga moni faaleagaga. (Eperu 10:24, 25) Ua iloa e le toʻatele, ua pei sauniga a le faapotopotoga o se vai nini e togafitia ai o latou faalogona tigā ma mafatia.

Ua taʻua e Eva: “Sa iai saʻu uō mamae i le matou faapotopotoga sa malamalama i oʻu mafatiaga. Sa faalogologo mai, faitau mai mau o le Tusi Paia, ma ma tatalo faatasi. Sa ia faamautinoa ou te lē o tuua toʻatasi, ma fesoasoani mai ina ia ou talanoa atu ma aveesea oʻu popolega. Ou te faafetaia lana fesoasoani, ona na ou toe lagona ai le mautinoa.” Ua faapea mai foʻi Rasela: ʻUa ou maua se tamā ma se tinā i le faapotopotoga. E fesoasoani mai le faapotopotoga ina ia ou lagona le alofa ma le mautinoa.’

3. Ia alofa ma agalelei i isi.

E maua ni faauōga tumau pe a faaalia le alofa ma le agalelei i isi. Na fetalai Iesu: “E sili le fiafia e maua i le foaʻi atu i lo o le talia mai.” (Galuega 20:35) E mautinoa o le a tatou iloaina, o le tele e tatou te faaalia ai le alofa, o le tele foʻi lenā o mea e tatou te mauaina. Na fetalai Iesu i ona soo: “Ia outou foaʻi atu pea, ona foaʻi mai lea o tagata iā te outou.”—Luka 6:38.

E atili ona lelei o tatou faalogona pe afai e faaalia atu ma faaalia mai le alofa. Ua taʻua i le Tusi Paia, “e lē uma le alofa.” (1 Korinito 13:8) Ua taʻutino mai e María: “Ou te iloa o nisi o oʻu manatu lē lelei e faatatau iā te aʻu, e lē saʻo. Ua mafai ona ou teena nei mafaufauga lē lelei e ala i le fesoasoani i isi, nai lo o le manatu iā te aʻu lava. Ou te lagona le faamalieina i taimi uma ou te faia ai ni mea mo isi.”

LAGONA E TAGATA UMA LE MAUTINOA

E lē faapea o laasaga ua taʻua i luga o le a vave ai ma tumau ona tatou maua le mapusaga. Peitaʻi e mafai ona fesoasoani iā i tatou. Ua faapea mai Kalolina: “O loo iai pea oʻu faalogona lē mautonu. Peitaʻi i le taimi lenei ua ou iloa e tāua aʻu, o loo manatu mamafa mai le Atua iā te aʻu, ma e toʻatele aʻu uō vavalalata e fesoasoani mai foʻi ina ia ou lagona le mautinoa.” E faapena foʻi faalogona o Rasela. Ua faapea mai o ia: “E iai taimi e lofitūina ai aʻu i le faanoanoa. Peitaʻi o loo iai uso ma tuafāfine faaleagaga e mafai ona ou saʻili i ai mo ni fautuaga, ma e fesoasoani mai ina ia saʻo laʻu vaai i mea. A o le sili, ua ou maua se Tamā i le lagi ou te talanoa i ai i aso uma, ma ua fesoasoani tele iā te aʻu.”

E iai foʻi se vaifofō tumau. Ua taʻua i le Tusi Paia se lalolagi fou i le lumanaʻi, lea o le a lagona ai e tagata uma le mautinoa. Ua folafola mai e le Atua i le Mika 4:4: “E taʻitoʻatasi ma nofo i lalo o lona vine ma lalo o lona mati, e leai foʻi se tasi e faamataʻu iā i latou.” I lenā taimi, e leai se tasi e toe faia se mea e tatou te lagona ai le lē malupuipuia, pe faia se mea e tatou te afāina ai. E oo lava i mea e sili ona tugā na tatou aafia ai i taimi ua mavae, “e lē toe manatua.” (Isaia 65:17, 25) O le a faavaeina e le Atua ma lona Alo o Iesu Keriso le “amiotonu moni.” O le iʻuga, o le a maua ʻle toʻafilemu ma le saogalemu e oo i le faavavau.’—Isaia 32:17.