MATAUPU AUTŪ | O VAAIGA E FAATATAU I LE NOFOAGA AGAGA
Fesili E Faatatau Iā I Latou I Le Nofoaga Agaga
Pe na iai se taimi na e tomānatu ai e faatatau i le nofoaga agaga ma i latou o loo nonofo ai? Pe afai o lea, e lē na o oe la o loo tuufesili i lea mataupu. Mo le faitau afe o tausaga, ua tuufesili ai tagata e faatatau i lea mea. E talitonu nisi o le nofoaga agaga o loo nonofo ai tuaʻā e tatau ona faamamaluina. A o nisi e manatu i le nofoaga agaga o se nofoaga e maua ai le filemu moni lea e taʻua o le lagi, e nonofo ai agelu ma tagata lelei ua maliliu. Ae e talitonu pea nisi o se nofoaga lea mo le faitau miliona o atua.
E finau mai le toʻatele e lē mafai ona tatou iloa se mea e faatatau i le nofoaga agaga, talu ai e leai se tasi na vaaitino i ai ma faamatalaina mai lea nofoaga. Peitaʻi, e sesē lenā manatu. Sa soifua Iesu i le lagi i le nofoaga agaga, a o leʻi afio mai i le lalolagi. Na ia faailoa atu ma le manino i taʻitaʻi lotu i le uluaʻi senituri: “Na ou sau mai i le lagi e fai le finagalo o lē na auina mai aʻu, ae e lē o loʻu loto.” Sa faamatala mai foʻi e Iesu mea na ia vaaitino i ai, ina ua ia faapea atu i ona aposetolo: “E tele mea e nonofo ai i le maota o loʻu Tamā.”—Ioane 6:38; 14:2.
O le Tamā o Iesu o le Atua, ma o lona suafa o Ieova, ma o le “maota” o Ieova o loo i le lagi. (Salamo 83:18) O lea, e leai se tasi e lelei lona faamatalaina o le nofoaga agaga nai lo o Ieova le Atua, ma Iesu Keriso. Na la faailoa mai le tele o faamatalaga e faatatau i le nofoaga agaga, e ala i ni vaaiga mataʻina na faaali mai i ē faamaoni.
O loo talanoaina i le mataupu o loo sosoo mai vaega o le Tusi Paia o loo faamatalaina ai ni vaaiga na vaaia e nisi o tane. A o e iloiloina nei vaaiga, ia manatua o le nofoaga agaga e lē o se nofoaga faitino, e iai mea e mafai ona paʻi pe vaai i ai. O lea, nai lo o le faamatalaina mai e le Atua o le nofoaga agaga i se auala e malamalama ai na o foafoaga agaga, ae ua Ia faaaogā se auala e faigofie ona tatou malamalama ai i le nofoaga agaga. O le a fesoasoani nei vaaiga iā te oe e malamalama ai i ē o loo nonofo i le “tele” o nofoaga i le lagi.