E Faapefea Ona Faaleleia e le Tusi Paia Loʻu Olaga?

O le Tusi Paia e lē o se tusi e masani ai. O loo iai fautuaga mai i Lē na foafoaina mea. (2 Timoteo 3:16) O le feʻau o loo iai e telē sona aafiaga iā i tatou. Ua taʻua i le Tusi Paia: “O loo ola le afioga a le Atua ma e matuā malosi foʻi.” (Eperu 4:12) O loo iai i le Tusi Paia le mana e faaleleia ai o tatou olaga i ni vala autū se lua, (1) o le aumaia o taʻiala mo le olaga i aso taʻitasi ma le (2) e fesoasoani iā i tatou ia iloa le Atua ma ana folafolaga.​—1 Timoteo 4:8; Iakopo 4:8.

Faaleleia lou olaga i le taimi nei. E mafai ona fesoasoani le Tusi Paia i mataupu e fitoitonu i le tagata lava ia. E aumaia ai fautuaga aogā i vala nei.

• Faiā ma isi.​—Efeso 4:31, 32; 5:22, 25, 28, 33.

• Mālōlōina o le tino ma faalogona.​—Salamo 37:8; Faataoto 17:22.

• Amioga tatau.​—1 Korinito 6:9, 10.

• Faasoasoaina o tupe.​—Faataoto 10:4; 28:19; Efeso 4:28.a

Na matuā talisapaia e se ulugalii talavou mai i Asia le aogā o fautuaga o loo i le Tusi Paia. E pei o le toʻatele o ulugalii fou, na faigatā foʻi ona faamasani le tasi i uiga o le isi ma lelei fesootaʻiga. Peitaʻi na amata ona la faatatauina mea na la faitau ai i le Tusi Paia. O le ā le iʻuga? Na faapea mai le tane o Vicent: “O mea na ou faitau ai i le Tusi Paia, ua fesoasoani iā te aʻu e taulima luʻi i la ma faaipoipoga i se auala alofa. O le ola e ōgatusa ma fautuaga a le Tusi Paia ua ma maua ai le fiafia.” Ua faapea mai lana avā o Annalou: “Ua fesoasoani iā i maʻua le faitau i faaaʻoaʻoga o loo i le Tusi Paia. Ua ou maua nei le fiafia ma le faamalieina i la ma faaipoipoga faapea foʻi o ma sini i le olaga.”

Iloa lelei le Atua. E ese mai i faamatalaga a Vicent e faatatau i faaipoipoga, na ia faapea mai foʻi: “O le faitauina o le Tusi Paia ua atili ai ona ou vavalalata i le Atua i le taimi lenei.” Na uaʻi atu le faamatalaga a Vicent i le manatu tāua lenei, e mafai ona fesoasoani le Tusi Paia iā te oe ina ia e iloa lelei ai le Atua. O le faia faapea e lē gata e te maua ai aogā mai i ana fautuaga, ae mafai foʻi ona avea ai o ia ma au uō. Ua Ia faailoa mai ai foʻi faamatalaga e faatatau i se lumanaʻi lelei, i le taimi o le a e olioli ai e faavavau i le “ola moni.” (1 Timoteo 6:19) O le mea lenā e lē mafai e se isi lava tusi ona ofoina mai.

Pe a faaauau ona e faitauina le Tusi Paia o le a e maua ai foʻi aogā, e pei o le faaleleia o lou olaga i le taimi lenei ma iloa lelei le Atua. Peitaʻi a o e faitauina le Tusi Paia, e ono mapuna aʻe i lou mafaufau le tele o fesili. Pe a tupu lenā mea, ia manatua le faaaʻoaʻoga lelei a se tagata tāua mai i Aitiope sa soifua i le 2,000 tausaga ua mavae. Sa tele ana fesili e faatatau i le Tusi Paia. Ina ua fesiligia po o malamalama i mea o loo ia faitauina, na ia tali mai: “E faapefea ona ou malamalama pe a lē faasino mai e se tasi iā te aʻu?”b Na ia naunau e talia le fesoasoani mai iā Filipo o se tasi o uluaʻi soo o Iesu, o ia foʻi o se faiaʻoga agavaa o le Tusi Paia. (Galuega 8:30, 31, 34) Pe a e fia silafia atili e faatatau i le Tusi Paia e pei o lenei tagata Aitiope, e matou te valaaulia oe e faaoo mai lau talosaga e ala mai i le www.jw.org/sm, pe tusi atu i se tuatusi e latalata ane o loo taʻua i lenei mekasini. E mafai foʻi ona e faafesootaʻi se Molimau a Ieova e latalata ane, pe asiasi i se Maota mo Sauniga i lou vaipanoa. Aiseā e te lē faitauina ai loa le Tusi Paia ma faataga e taʻitaʻia oe i se olaga e sili ona lelei?