Tagata Tiʻetiʻe Solofanua e Toʻafā ma le Aafiaga iā te Oe

Ua tamomoʻe saoasaoa mai solofanua, ma ua paʻō leotele o latou vae. O le matuā manino ma le auʻiliʻili o le auala o loo faamatalaina ai i le Tusi Paia solofanua malolosi e fā ma tagata o loo tiʻetiʻe ai, ua pei ai lava o se mea moni o loo tupu. O le solofanua muamua e paʻepaʻe, ma o lē o loo tiʻetiʻe ai e mamalu ma ua faatoʻā avea o ia o se tupu. O loo sosoo mai iā te ia se solofanua lanu mūmū, ma o lē o loo tiʻetiʻe ai e na te aveesea le filemu mai i le lalolagi atoa. O loo mulimuli mai i ona tua le solofanua lona tolu e uliuli e pei o le pō, ma o lē o loo tiʻetiʻe ai ua i lona lima se fua faatautau. Ua ia aumaia se feʻau faamomoiloto e faatatau i le utiuti o meataumafa. O le solofanua lona fā e lanu samasama vaivai, o se faailoga o faamaʻi ma isi lamatiaga leaga, ma o lē o loo tiʻetiʻe ai o le Oti. O loo mulimuli mai ai le Tuugamau, ma o loo ia aoina ē ua maliliu.​—Faaaliga 6:1-8.

“Na ou fefe i le taimi muamua na ou faitau ai e faatatau i tagata tiʻetiʻe solofanua e toʻafā. Na ou manatu ua lata mai le Aso Faamasino ma talu ai ou te leʻi nofosauni, e lē faasaoina la aʻu.”​—Crystal.

“Na ou matuā naunau lava ina ia iloa nei tagata tiʻetiʻe solofanua e toʻafā i luga o solofanua e eseese lanu. O le taimi lava na ou malamalama ai i le uiga o lea vaaiga, na ou iloa ai loa le mea o loo faatatau atu i ai.”​—Ed.

Pe e tutusa ou faalogona ma faalogona o Crystal e faatatau i tagata tiʻetiʻe solofanua e toʻafā o le Faaaliga? Po o le mea e pei ou faalogona o Ed? Po o ā lava ou faalogona, o le tiʻetiʻega mataʻina a na tagata tiʻetiʻe solofanua o se tasi lea o vaaiga e sili ona lauiloa i le Faaaliga, le tusi mulimuli o le Tusi Paia. Pe na e iloa e mafai ona e maua aogā e ala i le malamalama i lea vaaiga? E faapefea? Ua folafola mai e le Atua e mafai ona e maua le fiafia moni e ala i le faitau, aʻoaʻo mai, ma ola e ōgatusa ma mea o loo tusia i lea tusi faavaloaga.​—Faaaliga 1:1-3.

E ui e fefefe nisi i le vaaiga e faatatau i tagata tiʻetiʻe solofanua e toʻafā, ae e leʻi fuafuaina ina ia faafefe ai oe. O le mea moni, ua iloa e le faitau miliona o lea vaaiga e faamalosia ai lo latou faatuatua, ma faauaʻi atu ai i latou i le faamoemoe mo se lumanaʻi matagofie. E mafai foʻi ona tupu lenā mea iā te oe. Faamolemole ia faitau atili e faatatau i lea manatu.