O se Fesili e Faigatā Ona Malamalama i Ai

E TELE ma e eseese manatu e faatatau i le ola ma le oti. E manatu isi pe a latou feoti, o le a faaauau pea ona latou feola i se isi tino pe i se isi nofoaga. E talitonu nisi o le a latou toe fananau mai e ola i se isi olaga. Peitaʻi, e manatu isi o le oti o le iʻuga lea.

E ono iai ou lava talitonuga e faatatau i lea mataupu, e fua i le auala na tausia aʻe ai oe po o le aganuu na e ola aʻe ai. Talu ai e eseese manatu i le mea e tupu pe a oti le tagata, pe e iai la se tasi po o se mea e tatou te saʻili atu i ai mo tali maufaatuatuaina ma moni, i lenei fesili e faigatā ona malamalama i ai?

Mo le tele o senituri, na aʻoaʻoina ai e taʻitaʻi lotu le aʻoaʻoga o le ola pea o le agaga pe a oti le tagata. E toetoe o lotu autū uma e pei o lotu Kerisiano, Hinitū, Iutaia, Musalimi ma isi, e talitonu pe a oti le tagata e ola pea lona agaga i se nofoaga o agaga. Ae i le isi itu, e talitonu tagata lotu Puta o le tele o taimi e toe fanau mai ai se tasi, o lona latalata atu foʻi lenā i le lē toe iai o ni ona mafatiaga. O lenei tulaga e sili ona toʻafilemu e taʻua o le Nirvana.

Pe a fua i na aʻoaʻoga, o le toʻatele o tagata i le lalolagi e talitonu o le oti e mafai ona maua ai se isi avanoa ina ia ola ai i se isi lalolagi. E manatu le toʻatele o le oti o se laasaga tāua lea i le faagasologa o le olaga o le tagata, ma e foliga mai o se vaega o le finagalo o le Atua. Ae o le ā le manatu o le Tusi Paia? Faamolemole faitau i le mataupu o loo sosoo mai. E ono faateʻia oe i le tali.