Ua Lotomalilie e Ofo Atu i Latou Lava

E AOFIA ai i Molimau maelega o loo auauna i atunuu e tele ai le manaʻoga mo tagata talaʻi o le Malo, le toʻatele o tuafāfine nofofua. O nisi o i latou ua faitau sefulu tausaga o auauna i isi atunuu. O le ā na fesoasoani iā i latou ina ia siitia atu ai i isi atunuu? O ā lesona ua latou aʻoaʻoina mai i le auauna ai i isi atunuu? O ā ni aafiaga i o latou olaga? Sa matou faatalanoa nisi o nei tuafāfine ua loa tausaga o iai i lenei auaunaga. Pe afai o oe o se tuafafine nofofua o loo naunau ia matuā faamalieina i lau faiva, e mautinoa o le a fesoasoani iā te oe a latou faamatalaga. O auauna uma foʻi a le Atua e latou te maua aogā pe a iloiloina faaaʻoaʻoga a nei tuafāfine.

MANUMALO I LAGONA LĒ MAUTONU

Pe na e tomānatu pe mafai moni lava ona e auauna o se paeonia nofofua i se isi atunuu? O Anita ua 75 ona tausaga, sa matuā lē mautonu o ia e faatatau i mea e mafai ona ia faia. Sa ola aʻe o ia i Egelani ma amata ai ona paeonia ina ua 18 ona tausaga. Ua faapea mai o ia: “Sa ou fiafia e aʻoaʻo tagata e faatatau iā Ieova, ae ou te leʻi mafaufau lava e auauna i se isi atunuu. Ou te leʻi aʻoaʻoina muamua se isi gagana, ma na ou manatu e lē mafai lava ona ou faia faapea. O lea, ina ua maua laʻu valaaulia mo le Aʻoga o Kiliata, sa faateʻia aʻu. Sa ou ofo ona o le mafai e se tagata faatauvaa e pei o aʻu ona maua lea ituaiga valaaulia. Peitaʻi na ou mafaufau, ʻAfai e manatu Ieova e mafai ona ou faia, o le a ou taumafai la.’ Ua silia nei i le 50 tausaga o oʻu galue o se misionare i Iapani.” Ua taʻua atili e Anita: ʻOu te fiafia lava e faalaeiau tuafāfine talavou, ia tofo foʻi i lenei auaunaga matagofie. Ou te fiafia e faapea atu o le toʻatele o i latou ua faia faapea.’

MANAʻOMIA LE LOTOTELE

O le toʻatele o tuafāfine ua auauna i isi atunuu sa faatalatū i le taimi muamua e siitia atu i se isi atunuu. Na faapefea ona latou maua le lototele e siitia atu ai i isi atunuu?

Ua faapea mai Maureen o lē ua 64 ona tausaga, “A o oʻu tuputupu aʻe, sa ou naunau i se olaga e iai sona fuafuaga, o se olaga e fesoasoani i isi.” O le 20 o tausaga o Maureen na siitia atu ai i Quebec i Kanata, lea sa iai le manaʻoga mo ni paeonia. Ua faapea mai o ia: “Mulimuli ane na maua laʻu valaaulia mo le Aʻoga o Kiliata, ae na ou popole ou te alu na o aʻu i se atunuu ou te lē masani ai, ae tuua aʻu uō.” Ua ia toe faapea mai: “Sa ou popole foʻi i le tuua o loʻu tinā e tausia loʻu tamā e maʻi. O le tele o pō sa ou tagi ma ōle atu iā Ieova e faatatau i nei mea. Ina ua faamatala atu i oʻu mātua oʻu popolega, sa la faalaeiau aʻu ia talia le valaaulia. Sa ou vaaia foʻi le alolofa o le matou faapotopotoga ma fesoasoani i oʻu mātua. O le mātauina o le tausiga alofa a Ieova, na fesoasoani ou te mautinoa ai o le a ia tausia foʻi aʻu. Sa ou sauni loa i lenā taimi ou te alu!” E silia i le 30 tausaga na auauna ai Maureen o se misionare i Aferika i Sisifo, e amata mai i le 1979. O loo tausia nei e Maureen lona tinā i Kanata, ma auauna pea o se paeonia faapito. Pe a toe mafaufau i tausaga na auauna ai i se atunuu ese, ua faapea mai o ia: “Sa faaauau ona saunia e Ieova mea na ou manaʻomia i taimi na ou manaʻomia ai.”

O Wendy ua 65 nei ona tausaga, ma na amata ona paeonia i Ausetalia a o talavou. Ua faapea mai o ia: “Sa ou matuā matamuli ma faigatā ona talanoa i tagata ese. Ae o le paeonia na mafai ai ona ou talanoa i ituaiga tagata eseese, ma na amata ai ona ou lagona le toʻa. Mulimuli ane na ou lagona le mautinoa. O le paeonia na aʻoaʻoina ai aʻu ia faalagolago iā Ieova, ma ou lē toe popole ai i le alu e auauna i se isi atunuu. Sa valaaulia foʻi aʻu e se tuafafine nofofua sa auauna o se misionare i Iapani mo le silia i le 30 tausaga, e ma te ō i Iapani mo le tolu masina e talaʻi ai. O le galulue faatasi ma ia na faamalosia ai loʻu faanaunauga e siitia atu i se atunuu ese.” I le 1986, na siitia atu ai Wendy i Vanuatu, o se motu e pe ā ma le 1,100 maila (1,770 km) le mamao i le itu i sasaʻe o Ausetalia.

O loo iai pea Wendy i Vanuatu, o loo galue i se ofisa faaliliu. Ua faapea mai o ia: “O se fiafiaga sili iā te aʻu le vaai atu ua faavae ni vaega ma faapotopotoga i vaipanoa maotua. O le faia o se sao itiiti i le galuega a Ieova i nei motu, o se faaeaga e lē mafai e upu ona faamatalaina.”

Ua 65 nei tausaga o Kumiko, ma sa paeonia sauatoa i Iapani ae na manaʻo lana paga paeonia e la te siitia atu i Nepale. Ua faapea mai Kumiko: “E fai mai soo lava laʻu paga e ma te ō, ae ou te fai iai e leai. Sa ou popole i le aʻoaʻoina o se gagana fou ma le faamasani i se siʻomaga fou. Sa ou manaʻomia foʻi se tupe ina ia siitia atu ai i se isi atunuu. A o ou taumafai e filifili po o le ā le mea e fai, ae lavea loa laʻu pasika ma ave ai aʻu i le falemaʻi. O i inā na ou mafaufau ai loa: ʻO ai na te iloa se isi mea o le a tupu? Atonu teʻi ua ou maʻi tigāina ma misi ai le avanoa ou te paeonia ai i se isi atunuu. Atonu e mafai ona ou auauna i se isi atunuu mo se tausaga se tasi.’ Sa ou tatalo faatauanau iā Ieova e fesoasoani mai ina ia fai saʻu gaoioiga.” Ina ua teʻa Kumiko mai i le falemaʻi, sa asiasi atu i Nepale, ma mulimuli ane na la siitia atu i inā ma lana paga paeonia.

Pe a mafaufau i le toetoe 10 tausaga o auauna ai i Nepale, ua faapea mai Kumiko: “Sa vave ona mou ese atu faafitauli ia sa ou popole ai. Ou te matuā fiafia ona ua ou auauna i le mea o loo tele ai le manaʻoga. Pe a ou talanoa atu i se aiga e faatatau i le feʻau mai i le Tusi Paia, e masani lava e toʻalima pe toʻaono tuaoi o lenā aiga e ō mai foʻi ma faalogologo. E oo lava i tamaiti lāiti e talosaga mai e avatu ni a latou sāvali e faatatau i le Tusi Paia. O se fiafiaga le talaʻi ai i lenei oganuu e tali lelei mai tagata.”

FEAGAI MA LUʻI

E mautinoa sa iai luʻi na feagai ma tuafāfine nofofua ia na faatalanoa. Na faapefea ona latou feagai ma na luʻi?

“I le amataga, sa faigatā iā te aʻu le nofo mamao ese mai i loʻu aiga.” O le faamatalaga lea a Diane mai i Kanata. Ua 62 nei ona tausaga, ma sa auauna o se misionare i Ivory Coast (lea ua taʻua nei o Côte d’Ivoire) mo le 20 tausaga. Ua ia taʻua: “Sa ou talosaga iā Ieova e fesoasoani mai ina ia ou alofa i tagata i le oganuu. Na faamatala mai e le uso o Jack Redford, o se tasi o faiaʻoga i le Aʻoga o Kiliata, atonu i le taimi muamua e faateʻia i matou i tulaga o tagata i o matou tofiga, aemaise lava pe afai e vaaitino i le matuā lē tagolima o tagata. Peitaʻi na ia faapea mai: ʻAua le vaai i le tulaga lē tagolima. Ia tilotilo i tagata i o latou mata ma foliga. Ia vaai i le auala e latou te tali mai ai pe a faalogo i upu moni o le Tusi Paia.’ O le mea lenā sa ou faia, ma e maʻeu se faamanuiaga! Ou te vaaia le fiafia o foliga o tagata pe a taʻu atu i ai le feʻau faamāfanafanaloto mai i le Tusi Paia!” O le ā se isi mea na fesoasoani iā Diane? “Sa ou māfana atu i aʻu tagata aʻoga o le Tusi Paia, ma na ou matuā olioli i le vaai atu ua avea i latou ma auauna faamaoni a Ieova. Sa avea i latou ma oʻu aiga. Sa ou maua ni tinā, tamā, uso, ma tuagane faaleagaga, e pei lava ona folafola mai e Iesu.”​—Mare. 10:29, 30.

O Anne ua 46 nei ona tausaga, ma o loo auauna i Asia i se atunuu e faasā ai la tatou galuega. Ua ia faapea mai: “I tausaga a o oʻu auauna ai i vaipanoa eseese, sa matou nonofo faatasi ma tuafāfine e matuā eseese o matou atunuu ma uiga. O nisi la taimi e iai mea e matou te lē femalamalamaaʻi ai ma tigā ai oʻu faalogona. Pe a tutupu ni tulaga faapea, ou te taumafai ia māfana i nei tuafāfine, ina ia ou malamalama lelei i a latou aganuu. Ou te taumafai malosi foʻi ia ou alofa ma magafagafa iā i latou. Ua ou fiafia ona na taulau na taumafaiga, ma ua iʻu i ni faauōga māfana ma tumau, lea ua fesoasoani ou te tumau ai i laʻu auaunaga.”

Ua 53 nei tausaga o Ute mai i Siamani, ma na tofia o ia e auauna o se misionare i Madagascar i le 1993. Ua faapea mai o ia: “I le amataga, sa faigatā iā te aʻu ona aʻo le gagana a le atunuu, faamasani i le vevela o le tau, ma tauivi ma le faamaʻi o le malalia faapea meaola ma siama ninii. Peitaʻi e toʻatele i latou na fesoasoani mai iā te aʻu. Sa onosaʻi ma fesoasoani mai tuafāfine, a latou fanau, ma aʻu suʻesuʻega faale-Tusi Paia ina ia aʻo le gagana. Sa tausi lelei aʻu e laʻu paga misionare pe a ou maʻi. Ae sili ai, sa fesoasoani mai Ieova. Sa ou tatalo e lē aunoa ma taʻu atu iā te ia oʻu popolega. Pe a uma, ona ou faatalitali lea mo ni nai aso po o ni masina mo se tali o aʻu tatalo. Sa foʻia e Ieova faafitauli uma.” Ua 23 nei tausaga o auauna Ute i Madagascar.

MATUĀ FAAMANUIAINA O LATOU OLAGA

I le pei o isi ua siitia atu i vaipanoa o loo tele ai le manaʻoga, e masani ona faamatala e tuafāfine nofofua le matuā faamanuiaina ona o le ō e auauna i isi atunuu. O ā nisi o faamanuiaga ua latou maua?

O Heidi mai i Siamani, ua 73 nei ona tausaga, ma o loo auauna i Ivory Coast (ua taʻua nei o Côte d’Ivoire) talu mai le 1968. Ua ia taʻua: “O loʻu fiafiaga sili le vaai atu i laʻu fanau faaleagaga ʻo loo savavali pea i le upu moni.’ O nisi o ē na matou suʻesuʻe i le Tusi Paia ua auauna nei o ni paeonia ma toeaina i le faapotopotoga. O le toʻatele o i latou e valaau aʻu o Tinā po o Mama. O se tasi o nei toeaina ma lana avā ma le la fanau, ua avea ma oʻu aiga. Ua faamanuiaina aʻu e Ieova i se tama tama, le avā a laʻu tama, ma le la fanau e toʻatolu.”​—3 Ioa. 4.

Ua 72 nei tausaga o Karen mai i Kanata, ma e silia i le 20 tausaga o auauna i Aferika i Sisifo. Ua faapea mai o ia: “O le auauna o se misionare ua aʻoaʻoina ai aʻu ia faia atili ni faataulaga, ia alofa, ma onosaʻi. O le galulue foʻi faatasi ma isi mai i atunuu eseese ua faalautele ai laʻu vaaiga i mea. Ua ou iloa ai e eseese auala e mafai ona fai ai mea. O se faamanuiaga i le taimi nei le iai o ni uō mamae i le lalolagi aoao! E ui lava ua sui o matou olaga ma faaeaga, ae e tumau pea a matou faauōga.”

O Margaret mai i Egelani ua 79 nei ona tausaga, sa auauna o se misionare i Laos. Ua ia faapea mai: “O le auauna i isi atunuu ua ou iloa ai le auala o loo tosina mai ai e Ieova i lana faapotopotoga tagata mai i ituaiga ma atunuu eseese. Ua faamalosia atili ai loʻu faatuatua, ma ua ou matuā mautinoa ai o loo taʻitaʻia e Ieova lana faalapotopotoga, ma o le a faataunuuina lona finagalo.”

O lea, ua faia e tuafāfine nofofua o loo auauna i isi atunuu, se sao telē i le galuega talaʻi. Ua onomea ai ona matuā faamālō atu iā i latou. (Faama. 11:40) O loo faatupulaʻia foʻi lo latou faitau aofaʻi. (Sala. 68:11) Pe e mafai ona fetuunaʻi lou tulaga ma mulimuli i le faaaʻoaʻoga a tuafāfine maelega sa faatalanoa i lenei mataupu? E mautinoa o lou faia faapea o le a e ʻtofotofo ma iloa ai le lelei o Ieova.’​—Sala. 34:8.