“Faafetai i Lou Mafaufau Lelei”
O UPU ia na fai atu e Tavita, o se tagata Isaraelu anamua, e viiviia ai se fafine na alu atu e faafetaui o ia. O lona igoa o Apikaila. Aiseā na viiviia ai e Tavita Apikaila, ma o le ā e tatou te aʻoaʻoina mai i lenei fafine?
Na feiloaʻi Tavita ma lenei fafine ua faaipoipo, i le taimi a o fesolasolataʻi Tavita mai i le tupu o Saulo. Sa faaipoipo Apikaila iā Napalu, o sē e mauʻoa ma e tele ana lafumanu na fafaga i le vaega maugā i le itu i saute o Iuta. Sa pei Tavita ma ona tagata “o se pā na siʻosiʻomia ai” leoleo mamoe ma lafumanu a Napalu. Mulimuli ane, na auina atu e Tavita ni avefeʻau iā Napalu ma talosaga atu mo ʻso o se mea na i lona lima,’ mo i latou ina ia aai ai. (1 Samu. 25:8, 15, 16) Sa talafeagai lelei lenā talosaga auā sa puipuia e Tavita ma ona tagata meatotino a Napalu.
O le uiga o le igoa o Napalu, o le “Lē Mafaufau” po o le “Valea,” ma sa fetaui ona faaigoa o ia i lenā igoa. Sa tali mai o ia i se auala ita ma inainā, ma ia teena le talosaga a Tavita. O lea na sauni ai loa Tavita e osofaʻia Napalu ona o le lē mafaufau o le auala na tali mai ai. O le a tofo Napalu ma lona aiga i āuga o lona faavalevalea.—1 Samu. 25:2-13, 21, 22.
Ina ua iloa e Apikaila iʻuga mataʻutia o le a oo i ai lenei gaoioiga a Tavita, sa ia faia loa se gaoioiga lototele. Sa ia ʻaiʻoi atu ma le faaaloalo iā Tavita ia mafaufau i le la faiā ma Ieova. Sa ia saunia foʻi le tele o meaʻai mo Tavita, o lē o le a avea ma tupu e sosoo ai, faapea ma ona tagata. O le iʻuga, na faailoa atu e Tavita ua faaaogā e Ieova lenei fafine ina ia taofia ai o ia, mai i le faia o se gaoioiga e nofosala ai i luma o Ieova. Na faapea atu Tavita iā Apikaila: “Faafetai i lou mafaufau lelei, faafetai foʻi iā te oe o lē ua taofia aʻu i lenei aso mai i le nofosala i le toto.”—1 Samu. 25:18, 19, 23-35.
Ua tatou iloa e tatou te lē fia pei o Napalu, e ala i le lē talisapaia o mea lelei e faia mai e isi mo i tatou. Afai foʻi ua tatou mātauina o le a mapuna aʻe se tulaga lē lelei, o se gaoioiga poto la lo tatou taumafai malosi e faatoʻafilemu le faafitauli. Ioe, e mafai ona tatou faaleo atu moomooga o le faisalamo, o lē na faapea atu i le Atua: ʻIa e aʻoaʻo mai aʻu i le mafaufau lelei, ma le poto.’—Sala. 119:66.
E ono mātauina e isi lo tatou atamamai ma le mafaufau lelei i a tatou gaoioiga. E tusa pe e latou te faaleo mai pe leai, ae atonu e pei o latou lagona o Tavita, o lē na faapea atu: “Faafetai i lou mafaufau lelei.”