Po o Aogā Taʻiala a le Tusi Paia i Aso Nei?

UA FAAPEA MAI NISI E LEAI. Na faatusa e se fomaʻi le faaaogā o le Tusi Paia mo taʻiala i le faaaogāina o se tusi aʻoga mai i le vaitausaga o le 1920, mo mataupu tau vailaau. E ono fesiligia foʻi e se tagata faitio i le Tusi Paia, po o le a e faaaogā se tusi faatonu o se komepiuta tuai ua lē toe ola, e fai ma taʻiala mo se komepiuta fou. I nisi faaupuga, e manatu nisi tagata ua autausagā le Tusi Paia ua lē toe aogā.

Aiseā e faaaogā ai e se tasi se tusi mai anamuā i lenei taimi ua tele le tekinolosi faaonapōnei? Ua anoanoaʻi upega tafaʻilagi ma tuatusi o faamatalaga totino i le initaneti, o loo faasolosolo ona aumaia ai fautuaga ma taʻiala fou. O loo faasalalau i polokalame i le TV le tele o fautuaga mai i fomaʻi o le mafaufau ma amioga, o tagata atamamai i le va fealoaʻi ma le auala e ola ai, faapea tusitala. O loo faatau foʻi i faletusi le tele o tusi e saʻili i ai le tagata lava ia mo ni fautuaga, ma e faitau piliona ma piliona tupe ua maua mai ai.

O le tele o na fautuaga ua faigofie ona maua. Aiseā la e saʻili ai fua i le Tusi Paia o se tusi na tusia i le toetoe 2,000 tausaga ua mavae? Pe e lē saʻo le ʻaufaitio o le faaaogā o se tusi faapena mo ni taʻiala, ua tutusa lenā ma le faaaogā o se tusi aʻoga tuai mo mataupu tau vailaau po o le tusi taʻiala mo se komepiuta? O le mea moni, e lē saʻo lenā manatu. E vave ona suia le faasaienisi ma le faatekinolosi, ae po ua suia mea e manaʻomia e tagata? O loo faaauau ona mananaʻo tagata ia maua ni olaga taulau manuia, fiafia, saogalemu, ma ia iai ni faiā lelei faaleaiga ma ni faauōga fiafia.

Ua leva ona faamatalaina i le Tusi Paia na manaʻoga ma le tele o isi mea. O loo taʻua ai foʻi o le agaga o Lē na foafoaina i tatou na tusia ai na faamatalaga. O loo aumaia ai fautuaga aogā i vala uma o le olaga ma saunia ai i tatou mo so o se luʻi e tulaʻi mai. (2 Timoteo 3:16, 17) O loo taʻua ai foʻi fautuaga e tumau ma e lē taitai ona muta le aogā. Ua taʻua i le Tusi Paia lava ia: “O loo ola le afioga a le Atua.”​—Eperu 4:12.

Pe e mafai ona faapea atu e moni faamatalaga o loo taʻua i le Tusi Paia? Po o se tusi ua leva ma ua lē toe aogā, po o se tusi o loo aumaia ai fautuaga e sili ona lelei ma aogā pea mo i tatou? O le uluaʻi lomiga lenei o le faasologa o lomiga faapitoa o Le Olomatamata, ma o lona fuafuaga o le fesoasoani lea iā te oe ina ia maua tali o nei fesili.