3 Fesoasoani e Onosaʻia ai Faafitauli

E iai faafitauli i aso nei e lē mafai ona ʻalofia pe foʻia foʻi. O se faaaʻoaʻoga, pe afai ua maliu se tasi e pele iā te oe po ua e feagai foʻi ma se maʻi faaumiumi, atonu e leai se mea e mafai ona fai i ai ae e mafai ona e saʻilia ni auala e onosaʻia ai. Pe e mafai ona fesoasoani mai le Tusi Paia i na tulaga faigatā?

MAʻI FAAUMIUMI

Ua faapea mai Rose: “Ua ou aafia i se maʻi tuufaasolo ou te lagona ai le matuā tigā i taimi uma. Ua faaitiitia ai foʻi mea e fai i loʻu olaga.” O se tasi o ona popolega, o nisi taimi na faigatā ona ia uaʻi atu i le suʻesuʻeina o le Tusi Paia ma mea faaleagaga. Ae na fesoasoani tele iā te ia fetalaiga a Iesu o loo i le Mataio 19:26: “E mafaia e le Atua mea uma lava.” Na aʻoaʻoina e Rose e tele isi auala e suʻesuʻe ai. O le tigā na ia lagona ai na toetoe a lē mafai ona ia faitauina se mea. O lea na amata ai ona ia faalogologo i le faitauina o le Tusi Paia ma lomiga faale-Tusi Paia ua puʻeina.a Ua ia faapea mai: “Pe ana leai nei auala, semanū ou te lē iloa po o le a faapefea ona faatumau loʻu itu faaleagaga.”

Pe a feagai Rose ma lagona faanoanoa ona ua lē mafai ona ia toe faia mea sa ia faia, e na te maua faamāfanafanaga i le 2 Korinito 8:12: “Afai e lotomalie se tasi e foaʻi atu, e talileleia lea e tusa ma mea ua iā te ia, ae e lē tusa ma mea e lē o iā te ia.” O na upu e faamanatu atu ai iā Rose e faafiafiaina le Atua i mea o loo ia faia, e ui lava ua tapulaa mea e mafai ona ia faia.

FAAVAUVAU

Ua faapea mai Delphine lea na taʻua i le amataga: “Ina ua maliu laʻu tama teine e 18 tausaga, na ou matuā lagona le tigā ma ou te leʻi manatu o le a mafai ona ou ola pea. Ua lē toe tutusa le tulaga o mea.” Peitaʻi, na matuā faamāfanafanaina o ia i upu o loo i le Salamo 94:19, lea na faapea atu ai le faisalamo i le Atua: “Ina ua tele popolega o loʻu loto, na fiafia loʻu loto ona o au faamāfanafanaga.” Ua faapea mai Delphine: “Na ou tatalo iā Ieova e fesoasoani mai ia maua ni mea ou te faia, ina ia mafai ona faaitiitia ai oʻu tigā.”

Sa amata loa ona pisi o ia i galuega tauofo. A o faagasolo taimi, na ia faatusaina o ia i se peni vali ata a tamaiti, e ui lava ua gau ae o loo aogā pea e valivali ai ata. I se tulaga talitutusa, e ui lava na feagai o ia ma lagona faavauvau, ae na ia iloa e mafai lava ona ia fesoasoani atu i isi. Ua ia faapea mai: “Ua ou iloa nei, pe a ou faaaogā mataupu silisili o le Tusi Paia ma manatu faale-Tusi Paia ina ia faamāfanafana ai aʻu tagata aʻoga, o le auala lenā o loo faamāfanafanaina ai aʻu e Ieova.” Sa ia faia se lisi o tagata o loo taʻua i le Tusi Paia na feagai foʻi ma lagona matuā faavauvau. Na ia taʻua, “O nei tagata uma sa tatalo iā Ieova.” Na ia iloa ai foʻi “e lē mafai ona maua ni tali pe afai e te lē faitauina le Tusi Paia.”

O le suʻesuʻeina o le Tusi Paia na aʻoaʻoina ai foʻi e Delphine se isi manatu, o le taulaʻi atu lea i le lumanaʻi nai lo o taimi ua mavae. Ua faamāfanafanaina o ia i le faamoemoe o loo taʻua i le Galuega 24:15: “E toetutū mai tagata amiotonu ma tagata amiolētonu.” E faapefea ona ia mautinoa o le a toe faatūina mai e Ieova lana tama? Ua tali mai Delphine: “O loo oʻu iloa atu laʻu tama i le lumanaʻi. E manino i loʻu mafaufau o le a ou toe vaai i laʻu tama i le aso ua atofaina e Ieova. O loo oʻu iloa atu i maʻua i la maʻua togālaau, e pei lava o le taimi na ou vaai atu ai ma alofa iā te ia i le aso na fanau mai ai.”

a O loo maua na vaega i le tuatusi o le jw.org.

E mafai ona fesoasoani le Tusi Paia e faamāfanafanaina oe e oo lava i taimi e sili ona faigatā

E FAAPEFEA ONA FESOASOANI MAI IEOVA IĀ I TATOU?

O loo manino le tali a le Tusi Paia. Ua faapea mai: “E latalata Ieova iā i latou uma e valaau atu iā te ia, o i latou uma e valaau atu iā te ia ma le faamaoni. E faia e ia o mea e mananaʻo ai i latou o ē e matataʻu iā te ia, e faafofoga foʻi o ia i a latou alaga, ma ia faaolaina i latou.” (Salamo 145:18, 19) Pe e lē o se faamāfanafanaga lenā manatu? Ae e faapefea ona tali e Ieova tatalo a ē e faalagolago atu iā te ia mo le taʻitaʻiga?

E ALA I LE FOAʻI MAI O LE MALOSI:

E mafai ona faavaivaia i tatou i le itu i le tino, tau faalogona, ma le faaleagaga ona o faafitauli. (Faataoto 24:10) Peitaʻi, e foaʻi mai e Ieova le “malosi i lē ua vaivai; ma o lē ua leai sona malosi e na te faaatoatoaina lona malosi.” (Isaia 40:29) Na faapea mai le aposetolo o Paulo o lē na onosaʻia le tele o tulaga faigatā: “O mea uma lava, ua ou maua le malosi mai iā te ia o lē na foaʻi maia iā te aʻu le mana.” (Filipi 4:13) Na faamalosia Paulo e le agaga paia o le Atua. E mafai foʻi ona e talosaga atu i le Atua mo le agaga paia.—Luka 11:13.

E ALA I LE FOAʻI MAI O LE ATAMAI:

Ae faapefea pe afai ua e manaʻomia le fesoasoani ina ia malamalama ma faatatauina ai fautuaga a le Tusi Paia? Na tusi le soo o Iakopo e faapea: “Pe afai ua leai se atamai i se tasi o outou, inā ōle atu pea ia i le Atua, auā o ia na te foaʻi tele mai ma le lē toe taʻutaʻua, ona foaʻiina mai lea iā te ia.” (Iakopo 1:5) E tatau ona e gaoioi e tusa ai ma au tatalo e ala i le faitauina o le Tusi Paia ma faatatau aʻoaʻoga o loo iai. (Iakopo 1:23-25) O le faia faapea, o le a e tofo totino ai i le atamai o na fautuaga.

E ALA I LE FOAʻI MAI O LE FILEMU:

E tusa lava po o e feagai ma ni popolega, ae e mafai ona fesoasoani mai Ieova ina ia e lagona le toʻafilemu. O loo taʻua i lana Afioga e faapea: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.” (Filipi 4:6, 7) Aiseā e te lē talosaga atu ai iā Ieova e foaʻi mai le filemu?

Ae ā pe afai e lē o mafai ona vave foʻia ou faafitauli? Aua neʻi manatu ua tuulafoaʻia oe e Ieova. E tusa lava po o e tauivi pea ma ou faafitauli, ia e mautinoa atoatoa e mafai e le Atua ona foaʻi mai le lototele ma le malosi e te tumau ai. (1 Korinito 10:13) Ua folafola mai i le Tusi Paia e iai le taimi o le a aveesea ai e faavavau o tatou faafitauli!