“O Fea na Iai le Atua?”
“E TULAʻI PEA LE FESILI: O FEA NA IAI LE ATUA?”—Pope Benedict XVI, a o asiasi atu i le nofoaga o faasalaga i Auschwitz i Polani.
PE A TUPU SE MALA, PE E TE TOMĀNATU ʻO FEA NA IAI LE ATUA?’ PE NA TUPU FOʻI SE TULAGA FAIGATĀ I LOU OLAGA MA UA E TUUFESILI AI PE FAAMATA O LOO MANATU MAMAFA MAI LE ATUA IĀ TE OE?
Atonu e pei ou faalogona o Sheila, o lē na ola aʻe i se aiga mapolotu ma o loo nofo nei i le Iunaite Setete. Na ia faapea mai: “Mai lava i loʻu laʻitiiti na ou tosina atu i le Atua ona o Ia na foafoaina i tatou. Peitaʻi ou te leʻi lagona sa ou vavalalata atu iā te ia. Na ou manatu o loo silasila mai o ia iā te aʻu i se nofoaga mamao. Ou te leʻi lagona e inoino le Atua iā te aʻu ae i le taimi e tasi ou te leʻi talitonu foʻi e alofa o ia iā te aʻu.” Aiseā na masalosalo ai Sheila e alofa le Atua iā te ia? Na ia faapea mai: “Na fesagaʻia e lo matou aiga se isi mala ina ua uma le isi mala, ma e foliga mai e lē o fesoasoani mai le Atua iā i matou.”
I le pei o Sheila, atonu e te mautinoa e iai moni le Atua o Lē e ona le malosi uma lava. Peitaʻi, atonu e te tomānatu pe faamata o loo manatu mamafa mai le Atua iā te oe. Na iai foʻi masalosaloga faapena i le tagata amiotonu o Iopu, o lē na faatuatua i le mana ma le atamai o Lē na foafoaina mea. (Iopu 2:3; 9:4) Ina ua fesagaʻia e Iopu le tele o mala, ma ua foliga mai ua leai se faamoemoe, na ia fesili atu i le Atua: “Aiseā ua e natia ai ou fofoga ma manatu ai iā te aʻu e pei o sou fili?”—Iopu 13:24.
O le ā le manatu o le Tusi Paia? Pe e tuuaʻia le Atua pe a tupu se mala? Pe e iai ni faamaoniga e iloa ai e manatu mamafa mai le Atua i tagata ma i tatou taʻitoʻatasi? Pe e mafai e se tasi ona iloa o loo silasila mai le Atua, e malamalama, e tigā alofa ma e fesoasoani mai i o tatou faafitauli?
I mataupu o loo sosoo mai o le a tatou iloiloina ai mea ua aʻoaʻoina mai i le foafoaga e faatatau i le manatu mamafa o le Atua iā i tatou. (Roma 1:20) Ona iloilo lea o le manatu o le Tusi Paia e faatatau i le manatu mamafa mai o le Atua. O le tele e te iloa ai o ia e ala i ana foafoaga ma lana Afioga, o le tele foʻi lenā o lou mautinoa e ʻmanatu mamafa mai o ia iā te oe.’—1 Ioane 2:3; 1 Peteru 5:7.