O ai e Tuuaʻia i o Tatou Mafatiaga?

Pe afai e lē o le Atua le pogai o o tatou mafatiaga, aiseā la ua faateteleina ai pea le oge, mativa, sauāga, faamaʻi ma mala faalenatura? O loo taʻua i le Afioga a le Atua le Tusi Paia māfuaaga autū e tolu ua māfua ai mafatiaga o tagata:

1. Manatu faapito, Matapeʻapeʻa ma le Feitagaʻi. ʻUa pule le tagata i le isi tagata ma ua matuā afāina ai o ia.’ (Failauga 8:9) E māfua mafatiaga o isi tagata ona ua faileagaina e tagata lē lelei atoatoa, manatu faapito ma pule sauā.

2. Taimi ma Mea e Tutupu Faafuaseʻi. E masani ona mafatia tagata ona “e tutupu faafuaseʻi mea iā i latou i le taimi e leʻi faatalitalia.” (Failauga 9:11) O lona uiga, e iai taimi e tutupu ai faalavelave po o ni mea sesē e faia e tagata i le nofoaga ma le taimi e leʻi faatalitalia.

3. Le Pule Leaga o le Lalolagi. O loo faamatala manino mai i le Tusi Paia le māfuaaga autū o mafatiaga o tagata. O loo taʻua ai: “O le lalolagi atoa o loo nofo toʻilalo i le pule a lē o loo leaga.”(1 Ioane 5:19) O “lē o loo leaga” o Satani le Tiapolo, o se foafoaga agaga malosi na muamua avea ma agelu ae “e leʻi tumau lava o ia i le upu moni.” (Ioane 8:44) Na aufaatasi atu isi foafoaga agaga iā Satani, ma fouvale ai i le Atua ina ia faamalieina o latou tuʻinanauga manatu faapito ma avea ai i latou lava ma temoni. (Kenese 6:1-5) Talu mai lenā fouvalega, ua matuā telē se aafiaga leaga i le lalolagi ona o taaʻiga a Satani ma ana temoni. O le mea tonu lenā o loo tupu i aso nei. Ua matuā lotoa tele Satani i le taimi lenei, ma o loo ia “faasesēina le lalolagi atoa” ma ua iʻu ai i se tulaga leaga. (Faaaliga 12:9, 12) O le mea moni, o Satani o se pule sauā. E fiafia o ia pe a vaai atu i le tulaga mafatia o tagata. O lea, o Satani ua māfua ai mafatiaga o tagata ae e lē o le Atua.

IA MĀTAU: Ua na o sē e lē alofa ma e fiafia e faia mea leaga e faapogaia mafatiaga o tagata. I se faaeseesega, ua taʻua i le Tusi Paia: “O le Atua o le alofa lava ia.” (1 Ioane 4:8) E talafeagai lelei ona uiga alofa auā “e mamao lava i le Atua moni ona faia o se mea leaga, ma Lē e ona le malosi uma lava ona faia o se mea e lē tonu.”​—Iopu 34:10.

Peitaʻi atonu e te tuufesili pea, ʻO le ā le umi o le a faataga ai e Lē e ona le malosi uma lava le pule sauā a Satani?’ O le mea moni e tigā le finagalo o le Atua pe a tatou mafatia ma e inoino o ia i le amioleaga. O loo taʻua atili i le Tusi Paia: “Ia taʻu atu o outou popolega uma iā te ia, auā o loo manatu mamafa mai o ia iā te outou.”(1 Peteru 5:7) E alofa le Atua iā i tatou ma e iai lona mana e aveesea ai mafatiaga o tagata ma faiga lē tonu, ma o le a talanoaina lenā manatu i le mataupu o loo sosoo mai.a