Ia Faaleleia Atili ma Faafiafiaina Oe i Au Suʻesuʻega o le Tusi Paia

O loo faitau e Iosua le Tulafono; ua solo i lalo pā o Ieriko ae o loo tū pea le fale o Raava; ua sisii aʻe e Iosua ona lima i le lagi ma tatalo

UA FESAGAʻIA e Iosua se luʻi faigatā. E tatau ona ia taʻitaʻia atu le fanauga a Isaraelu i le Nuu Folafolaina, lea na latou fetaiaʻi ai ma tulaga e sili ona faigatā. E ui i lea, na faamautinoa atu e Ieova iā Iosua o le a taulau manuia o ia. Na Ia faalaeiauina Iosua e faapea: ʻIa e lototele ma faamalosi. Ia e faia e tusa ma mea uma o i laʻu Tulafono. Ia e faitau i ai i le ao ma le pō, ina ia e faia e tusa ma mea uma ua tusia ai; ona e manuia ai lea ma e gaoioi ai ma le poto.’—Iosua 1:7, 8.

Ua tatou fetaiaʻi foʻi ma le tele o luʻi a o tatou ola ai i nei “aso e sili ona faigatā.” (2 Timo. 3:1) Peitaʻi, e mafai ona tatou taulau manuia e pei o Iosua, e ala i le mulimuli i le fautuaga a Ieova na tuuina mai iā te ia. E mafai ona tatou faitau e lē aunoa i le Tusi Paia, ma faatatau mataupu silisili o loo iai a o tatou fetaiaʻi ma luʻi o lenei olaga.

E ui i lea, o le toʻatele o i tatou atonu e lē o sa tatou masaniga le suʻesuʻeina o le Tusi Paia, ma e lē faigofie foʻi mo i tatou. Ae e tāua tele mo i tatou le suʻesuʻeina o le Tusi Paia. O lea, ia iloilo le pusa “Faataʻitaʻi Fautuaga Nei” mo ni fautuaga lelei i le auala e faaleleia atili ai au lava suʻesuʻega, ma avea ai o se masaniga e faafiafiaina ai oe.

Na pese le faisalamo: “Ia e taʻitaʻia aʻu e savali i le ala o au poloaʻiga, auā ua ou fiafia i ai.” (Sala. 119:35) E mafai ona e maua le tele o le fiafia mai i le iloiloina o le Afioga a le Atua. O le a e maua ai le anoanoaʻi o ʻoa tautele a o e matuā saʻiliʻili mo ni ʻoa faaleagaga.

E moni e te lē o taʻitaʻia se nuu e pei o Iosua, ae o loo e tauivi ma le tele o luʻi i le olaga. O lea, i le pei o Iosua, ia suʻesuʻe ma faatatau fautuaga o loo i le Tusi Paia lea e aogā iā te oe. O le iʻuga, o le a e manuia ai ma gaoioi ai foʻi ma le poto.

FAATAʻITAʻI FAUTUAGA NEI

Ia tatalo a o leʻi amata au suʻesuʻega. O loo faamauina i le Tusi Paia manatunatuga o le Atua e ou le malosi uma lava, mo lo tatou lelei. O lea, a o e faitauina le Tusi Paia, ia talosaga atu i le Atua e fesoasoani mai ina ia mafai ona e malamalama, taofimau, ma faatatau ana fautuaga i lou olaga.—Esera 7:10.
Ia fesili ifo iā te oe a o e faitauina le Tusi Paia po o lomiga faale-Tusi Paia: ʻO le ā se mea ua ou aʻoaʻoina mai ai e faatatau iā Ieova? E faapefea ona faamatilatila mai ai le feʻau autū o le Tusi Paia? E faapefea ona ou faaaogā lenei manatu e fesoasoani atu ai i isi?’
Ia manatunatu loloto i mea o loo e suʻesuʻeina. Ia faitau, taofi, ma manatunatu: ʻO ā ni oʻu faalogona i mea o loo oʻu faitau i ai? Aiseā e faapea ai oʻu faalogona? E faapefea ona fesootaʻi nei manatu ma mea na tutupu i loʻu olaga i le taimi ua teʻa, i loʻu tulaga i le taimi nei, po o ni mea e ono tutupu i le lumanaʻi? E faapefea ona faatatau nei mataupu silisili po o fautuaga i loʻu olaga?’ (Iopu 23:5; Sala. 49:3) Pe e mafai ona ou faamatala le pogai e uunaʻia ai e Ieova ona tagata ina ia ʻalofia se gaoioiga patino? O ā ni iʻuga atonu e oo i ai pe afai e latou te uia se isi laasaga?—Teu. 32:28, 29.
Ia faaata i lou mafaufau mea na tutupu. O se faaaʻoaʻoga, pe e mafai ona faaata i lou mafaufau le taimi na faatau ese atu ai e uso o Iosefa o ia i tagata Isamaeli? (Kene. 37:18-28) O ā ni vaaiga o e iloa atu? O ā ni manogi e mafai ona e sosogiina, po o ni leo o e lagonaina atu? Ia tuu oe i tulaga o tagata o loo faamatala mai i le tala. O ā ni o latou mafaufauga ma faalogona? O manatunatuga faapena, o le a ola ma uigā ai au lava suʻesuʻega.
Ia faaaogā meafaigaluega mo suʻesuʻega ua saunia e faaʻoaina ai au saʻiliʻiliga. Ia faamasani i meafaigaluega o loo maua i lau gagana i luga o le Initaneti, po o lomiga ua lomia. Ia fesili atu foʻi i isi e fesoasoani mai iā te oe ina ia e faamasani lelei i na meafaigaluega. O se faaaʻoaʻoga, e aogā tele le Tusi Taʻiala mo Saʻiliʻiliga a Molimau a Ieova ina ia e maua ai lomiga i le tele o mataupu, ma faamatalaga mo le tele o mau o le Tusi Paia. Ia faaaogā foʻi faaopoopoga i le pito i tua O le Tusi Paia—O le Faaliliuga a le Lalolagi Fou. O loo maua ai faamatalaga lelei e faatatau i faafanua, o faasologa o mea e tusa ai ma taimi na tutupu ai, o fua o le mamafa ma le mamao o ni mea, faapea le anoanoaʻi o isi faamatalaga lelei.
Ia autalu manatu autū na e suʻesuʻeina ina ia mafai ona e manatuaina. O le isi fautuaga tāua, ia faasoa atu i isi. Pe e iai se manatu e mafai ona e faaaogāina i lau faiva? O lou faia faapea, e lē gata o le a tāmau ai i lou mafaufau manatu autū na e suʻesuʻeina, ae o le a maua ai foʻi e isi le tele o aogā.