Po o E Iloa LE TAIMI?
O LE ā lau mea e fai pe a e fia iloa le taimi? E te tilotilo i le uati. Afai e fesili mai sau uō po o le ā le taimi, o le ā lau tali e fai i ai? E eseese auala e mafai ona tau ai le taimi. O ā na auala eseese?
Seʻi faapea ua ʻafa le tasi i le aoauli. E mafai ona e tali atu 1:30. E faalagolago i le atunuu o loo e ola ai ma le mea e tou te masani ai, e te ono tali atu foʻi 13:30. O le auala lenā e tau ai le taimi i le uati 24 itula. E iai nisi vaipanoa e latou te faapea mai “ua toe 30 minute i le lua.”
Talu ai o oe o se tagata e faitau i le Tusi Paia, atonu e te tomānatu pe na faapefea ona tau le taimi i aso o le Tusi Paia. E lē na o le tasi se auala na tau ai. O loo taʻua i Tusitusiga Eperu le “taeaopō,” “aoauli,” le “tutonu o le lā,” ma le “afiafi.” (Kene. 8:11; 19:27; 43:16; Teu. 28:29; 1 Tu. 18:26) Peitaʻi, i nisi taimi na taʻua ai vaevaega patino o le taimi.
I taimi o le Tusi Paia, sa masani ona faaaogā tagata vāai aemaise lava i pō. A o leʻi taitai fanau mai Iesu i le lalolagi, na vaevaeina e tagata Isaraelu le pō i ni vaega se tolu, ia na taʻua o leoleoga. (Sala. 63:6) O loo taʻua i le Faamasino 7:19 “le leoleoga i le vaeluapō.” E oo ane i aso o Iesu, ua faaaogā e tagata Iutaia le auala a Eleni ma Roma o le vaevae lea o pō i ni leoleoga se fā.
E tele taimi o loo taʻua ai i tusi o le Evagelia nei leoleoga. O se faaaʻoaʻoga, o “le leoleoga lona fā o le pō” lea na savali ai Iesu i luga o le sami e agaʻi atu i le vaa sa iai ona soo. (Mata. 14:25) Na fetalai Iesu i se talafaatusa: “E fiafia na pologa pe a taunuu mai lo latou matai, ma maua mai o loo latou mataala! . . . E fiafia i latou pe a taunuu mai o ia i le leoleoga lona lua, po o le leoleoga lona tolu foʻi, ma maua i latou o faia faapea!”—Luka 12:37, 38.
Na taʻua e Iesu leoleoga uma e fā ina ua fetalai atu i ona soo: “O lea, ia faaauau ona mataala, auā tou te lē iloa pe e sau afea le matai o le aiga, po o le afiafipō, po o le vaeluapō, po o le vivini o moa po o le taeaopō.” (Mare. 13:35) O le leoleoga muamua “o le afiafipō,” lea na amata mai i le taimi na goto ai le lā seʻia oo i le pe tusa o le tā o le iva i le pō. O le leoleoga lona lua “o le vaeluapō,” na amata mai i le pe tusa o le tā o le iva i le pō seʻia oo i le vaeluapō. O le leoleoga lona tolu o le taimi ʻe vivini ai moa,’ lea na amata mai i le vaeluapō seʻia oo i le tā o le tolu i le vaveao. Atonu o le leoleoga lea na vivini ai le moa i le pō na puʻea ai Iesu. (Mare. 14:72) O le leoleoga lona fā “o le taeaopō,” na amata mai i le tā o le tolu i le vaveao seʻia oo i le taimi na oso aʻe ai le lā.
E moni e leʻi maua e tagata i taimi o le Tusi Paia ni uati faapea auala faaonapōnei e tau ai le taimi, ae na iai lava a latou auala e tau ai le taimi i le ao ma le pō.