E Mafai Ona Tatou Maua le Fiafia i le Taimi Nei
E IAI le taimi o le a lē toe iai se maʻi, tino matua, ma le oti. E mafai foʻi ona e maua lenā ituaiga olaga. Ae i aso nei, o loo feagai tagata ma le tele o faafitauli ma faigatā. O le ā e fesoasoani iā te oe e maua ai le fiafia i le taimi lenei? O loo iai i le Tusi Paia taʻiala lea e iʻu ai i se olaga fiafia ma faamalieina i le taimi nei. Mātau nisi o luʻi i le olaga ma le auala e mafai ona fesoasoani ai le Tusi Paia.
MAUAINA O LE FAAMALIEINA
Fautuaga mai i le Tusi Paia: “Ia aunoa o outou olaga ma le manaʻo tele i tupe, a ia outou lotomalilie i mea ua iai iā te outou.”—Eperu 13:5.
I aso nei, e tele mea e manatu tagata e tatau ona tatou maua. Peitaʻi, ua faapea mai le Tusi Paia ia “lotomalilie i mea ua iai iā te outou.” E faapefea?
ʻAlofia “le manaʻo tele i tupe.” E faataulaga e tagata o latou soifua mālōlōina, aiga, faauōga, amioga tatau, e oo lava i lo latou mamalu, ona o le “manaʻo tele i tupe.” (1 Timoteo 6:10) Pagā le leai o se aogā! O le iʻuga, o lē e fiafia i le ʻoa “e lē faamalieina.”—Failauga 5:10.
E sili atu ona tāua tagata nai lo o meafaitino. O le mea moni, e aogā meafaitino. Ae e lē mafai e na mea ona faaalia le alofa ma talisapaia i tatou, e na o tagata e mafai ona faia faapea. O le iai o se “uō moni” o le a fesoasoani iā i tatou ina ia maua ai le faamalieina i le olaga.—Faataoto 17:17.
E MAFAI ONA TATOU MAUA LE FIAFIA I LE TAIMI NEI E ALA I LE MULIMULI I TAʻIALA A LE TUSI PAIA
ONOSAIA LE LĒ LELEI O LE SOIFUA MĀLŌLŌINA
Fautuaga mai i le Tusi Paia: “O le loto e fiafia e aogā auā e mālōlō ai.”—Faataoto 17:22.
E pei ona aogā le fiafia i le loto auā e mālōlō ai, e mafai foʻi e le fiafia ona fesoasoani e tatou te onosaia ai le lē lelei o le soifua mālōlōina. Ae e faapefea ona tatou maua lenā fiafia?
Ia lotofaafetai. Pe afai e na o o tatou faafitauli e tatou te mafaufau i ai, o le a leaga la “aso uma” iā i tatou. (Faataoto 15:15) Nai lo o lea, ua faapea mai le Tusi Paia, “ia faaalia foʻi lo outou loto faafetai.” (Kolose 3:15) Ia faaalia le lotofaafetai e oo lava i mea lāiti i le olaga, e pei o le lāgoto matagofie, agi mālū o le savili, ma le ataata a lē e pele iā te oe. E mafai e nei mea ona faafiafiaina ai o tatou olaga.
Ia faia mea mo isi. E tusa lava pe e lē lelei o tatou soifua mālōlōina, ae “e sili le fiafia e maua i le foaʻi atu i lo o le talia mai.” (Galuega 20:35) Pe a faafetai mai isi ona o mea na tatou faia, e tatou te lagona le fiafia ma lē toe soona mafaufau ai i o tatou faafitauli. E mafai ona tatou maua se olaga e sili ona lelei, e ala i le fesoasoani i isi ia maua foʻi ni olaga e sili ona lelei.
IA FAAMALOSIA LE FAAIPOIPOGA
Fautuaga mai i le Tusi Paia: Ia “faamautinoa o mea e sili ona tāua.”—Filipi 1:10.
E ono faaleagaina le faaipoipoga a se ulugalii e itiiti le taimi e mafuta ai. O lea, e tatau i tane ma avā ona vaai i a latou faaipoipoga o se mea e sili ona tāua i o la olaga.
Ia faifaimea faatasi. Nai lo o le saʻilia o ou lava manaʻoga, aiseā e lē fuafua ai e faifaimea faatasi? Ua faapea mai le Tusi Paia, “E sili ona lelei o le toʻalua nai lo o le toʻatasi.” (Failauga 4:9) E mafai ona faifaimea faatasi e fai se kuka, faamalositino, po o le ō e tafafao i se mataaga.
Ia faailoa atu i lau paaga e te alofa iā te ia. O loo faalaeiauina e le Tusi Paia tane ma avā ina ia alolofa ma faaaloalo le tasi i le isi. (Efeso 5:28, 33) O sina ataata māfana, opo māfana, po o se meaalofa laʻitiiti, e mafai ona fesoasoani e faamalosia ai le faaipoipoga. O le mea moni, o feusuaʻiga faaleulugalii ua na o le va o le tane ma le avā.—Eperu 13:4.