E te Silafia?

Na faapefea ona fuafua e tagata i aso anamua a latou faigāmalaga i vaa?

E LEʻI iai ni vaa laʻupasese i taimi o Paulo. Pe a fia alu se faigāmalaga a se tasi, e masani ona fesili i isi tagata pe e iloa se vaa laʻuoloa e agaʻi i lenā nofoaga, ma e mafai ona malaga ai tagata. (Galu. 21:2, 3) E tusa pe e lē agaʻi saʻo le vaa i le mea o loo fia alu i ai le tagata faimalaga, ae e mafai ona ia saʻili se isi vaa e agaʻi i se vaipanoa e latalata i le nofoaga o loo fia alu i ai.—Galu. 27:1-6.

E iai taimi patino o le tausaga e folau ai vaa, ae e lē iloa tonu po o ā aso ma taimi e feoaʻi ai. E eseese māfuaaga e lē alu ai ni faigāmalaga, e pei o le leaga o le tau, po o talitonuga faataulāitu e faapea e iai se mea leaga o le a tupu pe afai e tagi se oreva o loo tū i maea po o le lā o le vaa. Pe atonu foʻi e vaaia se vaa ua malepe i luga o le matafaga. O lea, e faatalitali ai tagata folau i le taimi e toe lelei ai le tau ona alu lea o le faigāmalaga. Ina ia iloa e se tasi le vaa e agaʻi i le vaipanoa o loo fia alu i ai, e na te faatalitali i le uafu mo se faasilasilaga i le taimi o le a alu ese ai le vaa.

Ua faapea mai Lionel Casson o se faitofā i talafaasolopito: “I le aai o Roma, na faigofie ona maua ma lē tau saʻilia e tagata se vaa e faimalaga ai. Sa tū le uafu i le gutu o le vaitafe o le Tiber. E lē mamao atu le taulaga o Ostia lea sa iai se nofoaga faataalaelae telē e siʻomia i ofisa. O le tele o nei ofisa o ofisa o ē e ana vaa laʻuoloa, e pei o ē ana vaa laʻuoloa i Narbonne [lea ua taʻua i aso nei o Falani], o ē ana vaa laʻuoloa i Carthage [lea ua taʻua i aso nei o Tunisia], . . . ma isi vaipanoa. Ina ia iloa la e se tasi le vaa e agaʻi i le vaipanoa o loo fia malaga ai, e manaʻomia ona ia faafesootaʻia nei ofisa.”

E ui lava na tele le taimi na faasaoina pe a faimalaga i vaa, ae na iai foʻi lamatiaga. O se faataʻitaʻiga, e iai taimi na āfatia ai folauga a Paulo i ana malaga faamisionare.​—2 Kori. 11:25.