Fetufaai ʻOa Faaleagaga Ma Isi
1 E pei o Mose faamaoni, ua silafia e Molimau a Ieova i aso nei faapea e lē mafai ona faatusatusaina oloa faaletino i le aogā o ʻoa faaleagaga. (Epe. 11:26) E mafai e tupe ona faatauina fale, taavale, ma isi mea totino, peitai e lē mafai ona ia faatauina le ola, filemu o le mafaufau, po o le faamaoniga ma le faamanuia a Ieova le Atua.
2 O le poto ma le malamalama i le fuafuaga a le Afioga le Atua o ni ʻoa moni faaleagaga. (Kolo. 2:3) E mafai e ia ʻoa tutasi ona aumaia le fiafiaga aʻiaʻi i le taimi nei, faatasi ma se faamoemoe mausali mo le lumanai. Maeu le aloaia o i tatou e mauaina sea tamaoaiga faaleagaga!
E FAAPEA ONA FAAMAUʻOAINA ISI
3 E mafai ona tatou fesoasoani e faamauʻoaina isi e toatele i le faatomuaina ia i latou o Le Olomatamata, talu ai e mafai ona ia taʻitaʻia i latou i le ‘oloa lilo’ o le atamai faaleatua. (Faata. 2:4) Ia Me, o le a tatou ofoina ai le tusiga o Le Olomatamata i avanoa talafeagai uma. Afai e taofi i o tatou manatu le auala ua faatamaoaigaina ai ō tatou olaga e Le Olomatamata, o le a tatou lē faatuutuu la ae o le a tatou sailia auala e ofoina ai o ia i le tele o tagata tatou te mafaia. (Faata. 3:27) Fai faamaumauga o tuātusi o mea na taliaina ai mekasini taitasi ma polosiua, faatasi ma le manatu e toe tulitatao ma sapalaiina ai mekasini e le aunoa i le mauaina o lau lava ala.
4 I se uiga faaleagaga, e mafai faapefea ona tatou pei o le tagata mataʻu i le Atua o le Salamo 112 o lē na faasalalauina i le lautele ana mea tāua? (Sala. 112:1, 3, 9) E manaomia ona tatou saili mo tagata e pei ni mamoe ma fesoasoani ia i latou e faatumuina o latou manaoga faaleagaga. (Mata. 5:3) Ua manaomia i lenei ona tatou faaaogā tatauina avanoa uma e molimau ai i se tulaga aloaia ma le lē fuafuaina.
5 I nisi nofoaga, ua matuā fua tele mai ai le molimau i le leva o le aoauli po o le afiafi ona e foliga mai o le toatele o tagata e i ai i aiga i lena taimi. Pe ua ē taumafai e galue mai lea fale ma lea fale mo se itula pe sili atu i se tasi afiafi i le gasologa o le vaiaso? Aiseā e le faia ai faatatauga aʻiaʻi e faia lenei? Atonu o le a faamaonia le matuā tauia mo oe.
6 Pe mafai ona e sueina taimi talafeagai e molimau ai i lou nofoaga o galuega? Sa folaina e se tasi o tuafafine nisi o mekasini i luga o lana laulau ina ia mafai ai ona iloa atu e aumea faigaluega a o latou ui latalata ane. A o leʻi maeʻa le taeao, sa taliaina uma mekasini. E fai si toatele o ana aumea faigaluega na faaalia le naunau moni, ma na mafai ona ia tuua ai tusiga e 18.
7 E lē mafai ona faatusatusaina siliva, auro, atoa ma isi oloa faaletino i le tamaoaiga faaleagaga o le poto ma le malamalama ua faapea ona tatou maua e ala mai i le faalapotopotoga a Ieova ma lo tatou suesueina o le Tusi Paia. O le fiafiaga moni, o ala tausaafia, filemu, “ola tuluʻi”—e oo i le ola e faavavau—o le a taulau nei mea uma ia i latou o ē sailia tamaoaiga faaleagaga. (Faata. 3:13-18) I le fetufaai o ā tatou ʻoa faaleagaga ma isi, ua tatou faaalia ai lo tatou talisapaia mo le mea ua tatou ausia ma faaauau ai ona tatou maua le faamanuiaga a Ieova.—Faata. 19:17.