Atiina aʻe Faiā Vavalalata Faaleaiga
1 Ua fesagaʻi mātua ma se luʻitau i le atiina aʻe o se aiga e mausalī i le tapuaiga moni, ona o le tele nauā o mea e tagisiaina lo latou taimi. E manaomia e aiga Kerisiano se fusi vavalalata e faapea ona ia saunia le lagolagosua i nei taimi faigata. (Fai. 4:9-12; 2 Timo. 3:1-5) A o tuputupu aʻe i le itu faaleagaga, o le a atili ai ona autasi o se aiga, ma o le a faamalosia ai e tumau i osofaiga a Satani ma lana faiga o mea.
ATIINA AʻE UIGA FAALEAGAGA
2 E manaomia ona faaofi i le faasologa faalevaiaso a le aiga sauniga a le faapotopotoga ma suesuega faale-Tusi Paia a le aiga. (Teu. 6:6, 7; Epe. 10:23-25; wSM 8/1/87 itu. 23-25) E ui i lea, e sili atu e manaomia. O loo iai pea se manaoga pe afai e na o le pau lea o le toleniga faaleagaga e maua e le fanau.
3 O le a tuputupu aʻe se faiā faaleaiga tausaafia pe afai e naunau moni mātua i le tausiga faaleagaga o le fanau. I Isaraelu, sa paʻū i mātua le avega tauave mo le aʻoaʻoina ma le toleniga o a latou fanau, faatonutonuina i latou i upu atoa ma faaaʻoaʻoga. Sa aofia i le polokalama tau aʻoaʻoga a Isaraelu toleniga faatino mo le olaga faatagata matua, aʻoaʻoina o le faitau, ma tomai e tusitusi ai, atoa ma faatonuga e atiina aʻe ai uiga faaleagaga. I le aʻoaʻoga o fanau, sa tuuina le faamamafa i le aʻoaʻoina o i latou i le mataʻu ia Ieova, le Tulafono, faaaloalo mo mātua ma tagata mātutua, ma le tāua o le usiusitai.
4 Tauivi e faaalu se taimi uigā ma lou aiga i aso uma. E mafai ona talanoaina mataupu faaleagaga i se faatulagana lē fuafuaina, e pei o taimi o taumafataga. Sa matauina ma le atamai e se tasi matua: “O le a faaaluina e mātua se taimi ma ā latou fanau—a lē o le atiina aʻe o uiga faaleagaga o le fesoasoani ia i latou e ʻalo ese mai le mau faafitauli.” Maeu le sili ona lelei o le fausia aʻe o uiga faaleagaga manaomia i fanau ina ia mafai ai ona latou alofia mailei a le lalolagi!—1 Kori. 3:10-15.
OLIOLI I GAOIOIGA TAU AUAUNAGA I LE FANUA
5 O le olioli o se faalogona saafiafi ina ua ausia po o le talitalia foi o ni lelei. Afai na sauniuni se tagata mo le auaunaga i le fanua, e mafai la ona ia faatalitalia ma le saʻo ni taunuuga lelei. I lea, o sauniuniga o le ki lena o se auaunaga olioli i le fanua. O le faataʻitaʻia soo o mea e tautalagia o se aiga a o leʻi ō i le auaunaga i le fanua e fafau aʻe ai le mautinoa. (Faatusatusa Tito 3:1e.) E mafai ona tofu le tagata ma le sini i lona mafaufau. Atonu e faaaʻoaʻo se taulimaga faigofie ma fanau laiti po o i latou faatoʻā amata i le auaunaga i le fanua.
6 I le galulue faatasi ma a latou fanau i le faiva faa-Kerisiano, e mafai ai e mātua ona fesoasoani ia i latou e galueaina le naunau totino i tagata e pei ona faaātaāta mai e Ieova ma Iesu. Ua fesoasoani foi le faiva ia i tatou e atiina aʻe se faiā vavalalata ma Ieova (wSM 12/1/82 itu. 17-23) E Fuafuaina faatasi e nisi aiga le aso atoa, fai le tonu a maeʻa le auaunaga i le fanua ona auai lea i ni evaevaga tausaafia. O le a maua ai i lenei le taimi mo talanoaga i se siomaga faasamasamanoa ma fetosinaʻai ai faatasi mātua ma fanau.
7 Ia maumauai e atiina aʻe tomai tau fesootaiga e manaomia ina ia tausia ai se faiā vavalalata ma lau fanau. Aua neʻi faatagaina so o se mea e taofia oe mai le faaaluina o le taimi tatau e faamalosia ai lou aiga faaleagaga. Tatalo faatasi ma mo lau fanau, i le iloaina faapea e mafai e Ieova ona faapaleina ma le manuia au taumafaiga e atiina aʻe.—Sala. 127:1; Faata. 24:3.