Selesele e Tusa ma la Tatou Taumafaiga Totino
1 Ua faaalia e Ieova le Atua lona alofa mo le fanau a tagata i le tele o auala. Na faamatilatila e Iesu le alofa lē mafaatusalia o le Atua, i le faasino atu lea i se motu o tagata sa faapotopoto ane e faapea o le Atua, o lē “na te faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu.” (Mata. 5:43-48) I se isi mea na tupu, sa faailoa atu ai e Iesu le faaleoga aupito sili ona iloga o le alofa o lona Tamā—le taulaga a lona Atalii pele e toatasi, o lē na aumaia e le Atua mo lo tatou faaolataga. (Ioane 3:16) Sa faatonuina e Iesu lana au faalogologo e tali atu ma le loto faafetai i le alofa o Ieova. O tatou taumafai ea e faia lena mea?
2 Ina ia mafai ona tatou faaleoina atu le loto faafetai atoatoa ma maua ai aogā e faavavau mai le alofa o Ieova, e tatau ona tatou iloa o ia. (Ioane 17:3) Tatou te manaomia fautuaga ma taʻitaʻiga i le auala e mafai ai ona tatou auauna ia te ia ma talileleia. Ua faaalia e Ieova lona manatu alofa i le aumaia lea ia i tatou o lana Afioga faagaeeina, le Tusi Paia, ma le faatuina aʻe o lana faalapotopotoga ofoofogia, lea ua ala ai ona tatou maua fautuaga ma faatonuga. (Mata. 24:45-47; 2 Timo. 3:16, 17) I le avea ma tagata tuuina atu o Ieova, ua aʻoaʻoina ai i tatou i ona ala. Peitai o tatou faaalia ea i a tatou taumafaiga totino faapea tatou te sapaitalia le alofa o Ieova? O tatou utagia ea lana fautuaga ina ia faafiafiaina ai o ia ma maua ai e i tatou lava aogā? (Isaia 48:17; Iako. 1:22) Na tusia e le aposetolo o Paulo i le 1 Korinito 3:8: “A o lē totō foi ma lē faasūsū, e tasi lava i laua; a e taitasi ma lona lava taui e maua, e tusa ma lana lava galuega.”
3 Ioe, e tatau ona tatou galulue e faatino le mea ua finagalo le Atua tatou te faia. E lē o tagata uma e agaʻigaʻi i luma faaleagaga i le saoasaoa e tasi. E tele ni mea e mafai ona aiā i lo tatou agaʻigaʻi i luma, ma o le a valea ona faia o ni faatusatusaga faavaivai loto. Peitai, e matuā tāua se taumafaiga taitoatasi tatou te faia. O le ā e mafai ona tatou faia ina ia tosina vavalalata ai i le faalapotopotoga? Pe o iai ea ni itu e mafai ona tatou faaleleia i le taliaina o a tatou avega tauave totino o ni Kerisiano? O le ā se taumafaiga e manaomia e avatu ai le lagolagosua e sili ona lelei i gaoioiga a le faapotopotoga. O iai ea ni manatu e manaomia ona tatou faatatauina mai faatonuga ua aumaia e le faalapotopotoga ia i tatou?—1 Timo. 4:16.
FAAAʻOAʻO I Ē FAAMAONI
4 Ua talaʻia nei le tala lelei o le Malo mo le faitau sefulu o tausaga e uso ma tuafafine faamaoni. E pei o Paulo, ua onomea ona faaaʻoaʻo i ia tagata faamaoni. (1 Kori. 11:1) Ua latou tali atu i le alofa o le Atua ma seleseleina aogā e tele ona o la latou galuega mamafa ma a latou taumafaiga totino e mulimuli i fautuaga a le Tusi Paia. O i latou ia ua fausia aʻe ai se faavae mausali o ē galulue tiotio i le faapotopotoga, e lē faatalalē i o latou avega tauave totino. E mafai ona tatou vaaia fua o a latou galuega taitoatasi.—Roma 1:13; 2 Kori. 3:1-3.
5 I le taimi nei, e faitau sefulu afe ē fou ua lolofi mai i le faalapotopotoga i tausaga taitasi. (Isaia 60:8) Ua ʻinaʻinā foi i latou ia e galulue ia avea ma tagata taʻumatuaina atoatoa faaleagaga, ma ua onomea ona faamālō i lo latou maelega i le galuega talaʻi. Ua latou maua aogā mai le matauina o le auala ua faamanuia ai e Ieova i latou o ē galulue mamafa i lana auaunaga. E fesoasoani le faaaʻoaʻoga a uso ma tuafafine taʻumatuaina i ē fou e sapaitalia ai faapea e lē o se taimi lenei e faapalapala pe faavaivai ai i la tatou auaunaga i le Atua. Pe fou pe o ni tagata talaʻi ua lava le poto masani, o tatou faaauau ea ona tuputupu aʻe faaleagaga, i le taliaina o a tatou avega tauave totino faa-Kerisiano ma le faaaogāina tatau o sauniuniga uma faatiokarate?
FAATATAUINA MEA UA TATOU AʻOAʻOINA
6 A o leʻi taitai ona tusia e Iakopo faapea e ao ona avea i tatou ma ‘ē anaana i galuega,’ sa faapea atu Mose i tagata Iutaia: “E ao ona outou faatatauina nei upu.” (Iako. 1:25; Teu. 11:18, NW) O lea sa lē lava le tau ina maua o le poto. Sa manaomia ona faatatauina e Iutaia upu o le Tulafono i le usiusitai ia Ieova. O loo tumau pea lenei mataupu silisili faavae e tasi. E mautinoa sa silafia e Iesu, o le Alo o le Atua, le tāua o le usiusitai. (Ioane 8:28) Na ia fetalai i le Mataio 7:24: “Ai se faalogo i aʻu upu nei, ma faia e ia, ou te faatusaina o ia i le tagata poto.”
7 Pe o tatou faatatauina mea ua tatou aʻoaʻoina mai i fonotaga matagaluega? O e sapaitalia le pogai ua matuā tāua ai ona tatou ala maia ma mataala i le taimi nei? Pe o tatou mataalia i osofaiga faaʻoleʻole ma mailei ua tatao e le Tiapolo? Tatou te talisapaia ea le fautuaga ma lapataiga ua aumaia faalausosoo ia i tatou e le faalapotopotoga e faatatau i le manaoga mo le mamā tau amio ma le faaleagaga i le faapotopotoga? O le ā le tele o tatou faatatauina ai taitoatasi mea ua tatou faalogologo i ai?—Iako. 1:23-25.
8 O le aso fono faapitoa ua amataina nei o loo faamamafa ai lo tatou manaoga ia paia, e pei ona paia o Ieova. (1 Pete. 1:14-16) O le paia o lona uiga, ia tumamā faalelotu pe aouliuli, ia sa taputapu. E faailoga ai le tulaga o le vavae ese ina ia auauna i le Atua. Ua faatuatuaina mai ia i tatou le faiva o le tala lelei. O lea, e tatau ai ona tatou mamā faaleagaga, tau amio, ma le faaletino ina ia taʻuaogāina ai e tauaveina le Afioga paia o le upu moni. E manaomia ai i lenei mea ona tatou matuā vaai totoʻa ane ia i tatou lava na i lo le mea e masani ai. (Epe. 2:1) A o tatou faia faapea, o le a tatou seleseleina ai faamanuiaga e tusa ma la tatou taumafaiga totino.
AOGĀ MAI SUESUEGA TOTINO
9 Ua fesoasoani le suesuega totino ia i tatou e fausia aʻe ai se faatuatua malosi, ma faaloloto ai lo tatou talisapaia mo le upu moni. E aumaia ai ia i tatou le mautinoa ma faaauupegaina ai i tatou e tautala atu faatasi ma le pule. E aumaia ai ia i tatou le malamalama ma le faautauta ma fesoasoani ai ia i tatou ia faaofuina i le tagata fou. (Kolo. 1:9-11) Peitai, o se suesuega e fuatele mai e alu ai se taimi ma se taumafaiga, ma e leai se auala puupuu e mauaina ai le poto saʻo ma le mauʻaa faaleagaga. O le mea tatou te faaaluina i suesuega o le mea foi lena o le a tatou maua mai ai.—2 Kori. 9:6, 7; Kala. 6:7.
10 Pe tatou te faataatia ese se taimi e lava ma totoe i vaiaso taitasi e sauniuni ai mo sauniga a le faapotopotoga? O se tasi lenei o auala e mafai ai ona tatou faaalia le talisapaia mo meaʻai faaleagaga ua saunia e Ieova e ala mai i le auauna faamaoni ma le mafaufau. O le sauniuni lelei mo sauniga e fesoasoani ia i tatou e tausisi ai i le faasologa mo le faitauina ma le suesueina o le Afioga a le Atua. Pe tatou te faataatia ese se taimi i vaiaso taitasi e faatino ai la tatou faitauga Tusi Paia e pei ona faatulaga mai i le polokalama mo le Aʻoga o le Faiva Faatiokarate? E na o ni nai minute lava e alu ai i aso taitasi i le faitauina ma mafaufau loloto i le mataupu. Ua fesoasoani le Sauniga o le Auaunaga e tausia i tatou ia mataala i auala e mafai ai ona faatino la tatou faiva i le lautele ia uigā. Tatou te sauniuni ea, ma manatunatu faapitoa i le auala e mafai ai ona tatou faaaogā lenei mataupu i le faiva? Ma pe tatou te faia ea se taumafaiga e faaaogā vave ai loa? E ao ona faia ni faatatauga patino ina ia sauniuni ai mo le Suesuega o Le Olomatamata ma le Suesuega Tau Tusi a le Faapotopotoga. O tatou faia ea lena mea.
TOFU SAO I SAUNIGA
11 E mafai ona tatou maua atili aogā mai sauniga pe afai e faia ai so tatou sao. O sauniuniga mo sauniga ma le faia o se taumafaiga e fai se sao, tatou te faalogologo ai ma le lē gasē a o faagasolo sauniga ma faafaigofie ai mo i tatou ona maua aogā mai tali a isi. E toatele o loo manatua pea le galuega fitā na latou faaaluina i la latou uluai tali i le sauniga po o la latou uluai lauga i le Aʻoga o le Faiva Faatiokarate. E ui ina ua tatau ona aveesea lena poʻepoʻevale, pe o faaauau pea ona tatou galulue malolosi e faailoa atu i tagata uma lo tatou tuputupu aʻe faaleagaga. (1 Timo. 4:15) Ua aogā ma faalaeiauina isi i a tatou tali. Afai tatou te lava sauniuni, i le suesueina o mataupu o le a iloiloina i sauniga, o le a avea ai lo tatou sao uigā e faagaee ai isi i le alofa ma galuega lelei.—Epe. 10:23-25.
12 E le tatau i a tatou tali ona uumi ma lavelave. E masani a ona sili atu le faia o faamatalaga pupuu e tali saʻo ai fesili ua siligia pe fesoasoani foi e faamanino ai le faatatauga o se mau. Afai tatou te sauniuni lelei, o le a mafai la ona tatou tali atu i a tatou lava upu. A tatou faia faapena, o le a matuā sili atu ai ona aogā ia i tatou atoa ma isi. Aiseā? Auā e manaomia ona tatou manatunatu e uiga i mea o loo tatou tautalagia ma faamatalaina le manatu e tusa ma lo tatou malamalamaga. E mafai i lenei mea ona faafaigofie ai ona malamalama isi i le mataupu. O le a fesoasoani foi ia i tatou ina ia manatua le faamatalaga mo le faaaogāina i nisi itu.
LŪLŪ MA LE AGAALOFA I LE FANUA
13 O la tatou faiva faa-Kerisiano o se ʻoa tau le auaunaga. (2 Kori. 4:7) O lena ea le auala o e manatu ai? E ala i le faiva, ua ia i tatou ai le faaeaga o le faaleoina o lo tatou faatuatua i isi. Na fetalai Iesu faapea o le tele o mea i le loto, e tautala ai le gutu. (Luka 6:45) O le taumafaiga totino ua tatou faamuamua ina ia iai se sao atoatoa i le faiva i le fanua ua faatagaina ai i tatou e seleseleina le tele o aogā. Ua faamaʻaiina ai lo tatou malamalamaga o le upu moni, ma ua tatou atiina aʻe ai se tomai maoaʻe ina ia faaaogā le Tusi Paia. Ua ia i tatou le olioli ona o le faasoaina atu o le upu moni i isi ma fesoasoani ia i latou ia iloa Lē Sili na Foafoaina i latou. Tatou te tutū o ni molimau i le pule tonu a le Atua ma lona silisiliese. Tatou te fiafia ona ua tatou iloa o loo tatou faafiafiaina Ieova, i le avea e pei o ia ma faia lona finagalo.—Mata. 5:48.
14 Afai tatou te faaauau pea ona fuaina la tatou taumafaiga totino, o le a lē avea ai la la tatou tapuaiga ia Ieova o se auaunaga e tau ina fai. O le ā le uiga o lena mea? O lona uiga o le a tatou lē faalotolotolua ai i le faia o le finagalo o le Atua, i le avatuina e tau o se auaunaga faatagafai ia te ia po o sina aofaiga laitiiti e aunoa ma le tuutoina mai le loto faamaoni ma se taumafaiga. O la tatou auaunaga ia Ieova e tatau ona faia ma le loto atoa. Ua ia i tatou se matafaioi faale-Tusi Paia e avatu ai a tatou mea uma lava i lana auaunaga. (Kolo. 3:23, 24) E moni, e eseese tulaga, ma e lē o manaomia e Ieova mai ia i tatou se mea e sili atu na i lo le mea tatou te mafai ona faia. Peitai, o le mea e mafai ona tatou faia, ua ia faatalitalia i tatou e faia! (Mata. 22:37) Ona o le natura o le tagata augavale e māfuli atu i le manatu ia te ia lava, e lelei ai ona iloiloina i tatou lava mai lea taimi i lea taimi ma tagaʻi po gafea e mafai ona tatou faia ai ni faaleleiga i la tatou auaunaga i le Atua. O tatou faamasani ea i le faia o lena mea?
15 E tatau ona faatinoina le filigā ina ia tatou alofia ai le faatagaina o le sailia o lelei totino ma faanaunauga e taofia ai i tatou mai le avatua o la tatou mea silisili i le auaunaga a Ieova. O fiafiaga, mausa, ma gaoioiga faamalosi tino e tatau ona tausia lelei lo latou tulaga. E tatau foi ona tatou leoleo faasaga i le taaʻiga o le soona aafia nauā i gaoioiga i galuega totogi. O le utagiaina o le fautuaga a Iesu i le Mataio 6:22, 23, o le a lē taumatea e mafai ai ona tatou faamuamua se taumafaiga atili e tausisia faanaunauga faaleagaga ma selesele mai ai e tusa ma lena.
16 A o faaauau ona tatou galulue malolosi i le faaofuina i le tagata fou, o le a tatou taliaina ai la tatou lava avega tauave e faatatauina fautuaga ma tomatauga tatou te maua mai i sauniga a le faapotopotoga, fonotaga, tauaofiaga, ma ala mai i lomiga. Tau ina ia tatou taitoatasi ma suesue ma le maelega, mataalia e fai se sao i sauniga, ma auai i lenei galuega tele o le faia o soʻo i le mamao o le a faatagaina e o tatou aiaiga totino. O lea i le tali atu ma le loto faafetai i le alofa o le Atua, e mafai ai ona tatou mautinoa le seleseleina o le fau ma soloi o taui faaleagaga nei ma faatumauina ai se faamoemoe mausali o le ola e faavavau i le lalolagi fou a Ieova.