Faataunuuina la Tatou Faiva o le Malo i le Faapotopotoga

¹ E ala ia Iesu Keriso, le Ao o le faapotopotoga Kerisiano, ua lautogia ai e Ieova le avega tauave i se ‘auauna tausi mea,’ po o sē pule i le aiga. (Luka 12:42, 43) O lenei faatatauga ua mafai ai ona tatou maua faasinoga ua lomia i le auala ‘e tatau ona pulea ai i tatou lava i le aiga o le Atua.’ (1 Timo. 3:15) O la tatou meafaigaluega autū mo le sailia o na mea ua lomia o le Watch Tower Publications Index. E mafai faapefea ona ia fesoasoani ia te oe?

² O oe ea o se toeaina? E lua ni ulutala tetele o loo feagai ma ou avega tauave: “Toeaina” ma le “Ovasia.” O le vaega o “Toeaina” ua iai le tele o faamaumauga e taulaʻi atu i faamatalaga e fesoasoani ai i tagata eseese i le faapotopotoga, le auala e avatu ai fautuaga, o faiā i le tino o toeaina, avega tauave a toeaina, ma isi mea. E maua faamaumauga i agavaa i lalo o “Ovasia,” ona o lena ulutala, o le upu lea o loo faaaogā e le Tusi Paia i le talanoaina o ia mea. I lalo foi o “Ovasia,” o loo iai tofiga aloaia, e pei o le “ovasia taʻitaʻi,” “ovasia o le auaunaga,” ma le “failautusi.” Ua aumaia foi nisi faamatalaga aogā e le ulutala autū “Faapotopotoga.”

³ O loo faatinoina foi e outou o ē o loo avea ma auauna o le faiva se matafaioi matuā tāua i le faapotopotoga. Ua lisiina mai e le ulutala “Auauna o le Faiva” faamatalaga i ou agavaa ma avega tauave. O le a e maua ai foi ni faamaumauga i mataupu i le tāua o faaeaga tau le auaunaga ua tatalaina atu ia te oe ma le auala e aapa atu ai mo isi avega tauave atili.

⁴ Ua iai uma i toeaina ma auauna o le faiva faaeaga e fesootai ma sauniga i le faapotopotoga. O le ulutala “Sauniga” ua na ofoina mai ni faamaumauga mo vala taitasi o le mataupu, e aofia ai ma faaaʻoaʻoga faagaeetia i lalo o “taumafaiga e auai.” O le mea moni, o loo iai foi ulutala autū mo sauniga taitasi.

⁵ Ua faapea mai le Salamo 68:11: ‘O fafine o loo talaʻia le tala lelei o se ʻau e toatele.’ E pei o tane o le faapotopotoga, e tatau foi i tuafafine ona pipii i amioga talafeagai mo i latou i le aiga o le Atua. I nisi taimi e mapuna aʻe ai ni fesili e uiga i mataupu e pei o afea e fai ai e se tuafafine se ufiufi o lona ulu pe o le ā e ao ona faia pe a lē auai se uso agavaa e faafoeina se sauniga pe fai ma sui o le faapotopotoga i le tatalo. E mafai e le ulutala “Fafine” ona tataʻia oe i faamatalaga i na mataupu. E aogā foi ulutala “Tuafafine,” “Ufiufi o le Ulu,” ma le “Tatalo.”

⁶ O loo faasino le vaega faaiʻu o le 1 Timoteo 3:15 i le faapotopotoga Kerisiano o se “pou tu foi lea ma le lagolago o le upu moni.” O se faaeaga mo i tatou le lagolagoina o le upu moni a o tatou pulea i tatou lava ma le talafeagai i le aiga o le Atua, i le faataunuuina o la tatou faiva o le Malo i le faapotopotoga.