Faatino le Tuutoina i le Atua e Pei ona Faia e Keriso
1 O le faaupuga faale-Tusi Paia ‘tuutoina i le Atua’ e faatatau lea i lo tatou faaaloalo loloto ia Ieova le Atua ma le auaunaga faamaoni ia te ia. O lē sa sili ona taulamua i le tuutoina i le Atua o lo tatou Alii o Iesu Keriso.
2 E ala i lona olaga i inei i le lalolagi, na faalauiloa maʻoti ai e Iesu ia lava o se tagata e lelei atoatoa i le tuutoina i le Atua. O lea la, e tatau ai ona tatou iloiloina nisi o mea e faatatau i lona olaga, ae maise lava ona e fesootai ma lana matafaioi o se fofoga fetalai e taulamua mo Ieova le Atua.
IA MAELEGA MA LOTO TETELE
3 Sa maelega Iesu e folafola le mea ua faamatalaina i le Isaia 61:2 o “le tausaga e talileleia mai ai e Ieova.” I le mulimuli i le faaaʻoaʻoga a Iesu, e ao ona tatou auai ma le maelega i lenei galuega faasaoola i aso e gata ai o lenei faiga o mea amioleaga. E tatau foi ona tatou loto tetele e pei ona faia e Iesu. Aiseā? Ona o le feau o le Malo o loo tatou folafolaina, e tuusaʻo ma e lē logoleleia i nisi, ae maise lava pe a tatou tautatala e uiga i le aso o le taui ma sui a Ieova.
4 Ina ia fesoasoani ia i tatou e tautatala ma le faamalosi ma faailoa atu le tuutoina i le Atua, tatou te manaomia le agaga ma le taʻitaʻiga a Ieova. Na fetalai Iesu i le Luka 4:18: “Ua i oʻu luga le Agaga o [Ieova].” Faatasi ai ma le agaga ma faamanuiaga a Ieova, e mafai foi ona tatou faatinoina le tuutoina i le Atua ma faafiafiaina ai Ieova. Ina ia faatinoina se mea o lona uiga, ia fai ma masani le faia. E mafai ona faapea ua avea se mea ma auala o lo tatou olaga i aso fai soo. E tatau ona avea le tuutoina i le Atua ma auala o le olaga o auauna a le Atua. Na taʻua e le aposetolo o Paulo: “O lenei, pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.”—1 Kori. 10:31.
TUUTOINA I LE ATUA, LO TATOU ALA O LE OLAGA
5 E ui ina tele le mau gaogaosa o loo tatou faia, e lē tatau ai ona galo ia i tatou le manaoga faifai pea ia faaaʻoaʻo ia Keriso e ala i le faaaogāina tatau o avanoa e fetufaaʻi ai le tala lelei ma isi. A o tatou faia lenei mea i le masina o Iuni, ua fautuaina lo tatou faatomuaina o le tusi Mankind’s Search for God, pe a tatou talanoa ma i latou e malamalama i le faa-Peretania. A lē o lea, ofo le tusi Le Manuia Moni ma Le Saogalemu—Mai le a Le Puna?
6 Sa fautuaina i le lomiga o La Tatou Faiva o le Malo o Tesema 1990 e faapea, a faailoa mai e tagata i latou lava o ni sui o se vaega faaletapuaiga e lauiloa, e mafai ona tatou amanaia ma le agalelei lena mea moni, ma atonu e faapea atu i ai: “O se mea fiafia le feiloai ma tagata o tapuaiga eseese. E tele itulagi eseese ua uia e le fanau a tagata mo le sailia o le Atua. [Afai e talafeagai i lena taimi, e mafai ona faasino i le Galuega 17:26,27.] Pe e te lē talitonu ea faapea ua masani a ona mulimuli atu tagata i tapuaiga a o latou mātua, na i lo le sailia o le Atua e i latou lava? I nisi faaupuga, sa latou faananau mai i totonu o se tapuaiga totino. O le manatu lena o loo taʻua i le uluai mataupu o le tusi lenei Mankindʻs Search for God. [Faailoa i ai le itulau 8, palakalafa 12.] O le aʻoaʻo atili e uiga i isi tapuaiga e faamalamalamaina ai ma mau aʻoaʻoga. Ua faamatalaina e lenei tusi le amataga, gaoioiga, ma aʻoaʻoga a tapuaiga tetele o le lalolagi.”
7 E faaautū le ala o lo tatou olaga e lē gata i le folafolaina o le aso o le taui ma sui a Ieova ma le tausaga e talileleia ai ae i le faaalia foi o le tuutoina i le Atua i o tatou olaga totino ma le olaga faaleaiga. E tatau ona tatou faataʻitaʻi ia Iesu, i le aʻoaʻoina o isi e ala i faaaʻoaʻoga po o le ā moni lava le tuutoina i le Atua. I le mulimuli i le faaaʻoaʻoga a Keriso o le tuutoina i le Atua, tatou te taumafai ai pea ina ia saʻo le mafuaaga tatou te faia ai mea uma, ina ia viia ai Ieova ma ia faamaonia ai o ni ana auauna faamaoni.
8 Talosia ia avea lo tatou faatinoina o le tuutoina i le Atua o se fesoasoani i isi i la latou sailiga mo le Atua ma taʻitaʻia ai ē loto faamaoni i le poto o le Atua moni, o Ieova.