Faaauau ona Pisi i le Auaunaga a Ieova
1 Ua matuā faaeaina i tatou e auauna ia Ieova. I le aveina i totonu o le poto saʻo e uiga ia te ia ma lona Alo pele e toatasi, o Iesu, ua uunaia ai i tatou e le alofa ina ia faaaogā atoatoa i tatou lava i le faia o Lona finagalo. (Ioane 17:3) Atonu tatou te vaivai, peitai ua aumaia ia i tatou e Ieova le malosi ina ia mafai ai ona tumu i tatou i le malosi atoatoa.—Isaia 40:29.
2 O le ā se auala e sili ona lelei tatou te faailoa atu ai lo tatou talisapaia mo le alofa sili ua faaalia mai e Ieova le Atua ma Iesu Keriso ia i tatou? (2 Kori. 5:14, 15) O le auala muamua, o le faataʻitaʻi lea ia Iesu, o lē na molimau atu ma le lē faavaivai e uiga i le suafa o lona Tamā ma le Malo. (1 Pete. 2:21) Afai e ia i tatou le faatuatua malosi, o le a faaautū ai la lo tatou olaga i le galuega ua tuuina mai e le Atua o le talaʻia o le tala lelei.—Mata. 24:14.
3 Pe iai sina aofaiga itiiti o le taimi e ao ona tatou tuutoina i le faiva i le fanua? E eseese tulaga. Atonu e faatapulaaina i tatou e le olaga matua, le lē lelei o le soifua maloloina, po o avega tauave faaleaiga. E ui i lea, ua manaomia i tatou uma lava ina ia faia ma le loto atoa la tatou auaunaga ia Ieova. O lona uiga e ao ona tatou taitoatasi ma faaalia le loloto o lo tatou tuutoina ma le moni o lo tatou tuuina atu e ala i lo tatou faia o le mea aupito sili i le faiva. (2 Timo. 2:15) O loo iai avanoa ua tatalaina mai ia i tatou taitoatasi e tusa ma o tatou aiaiga taitasi. O ā nisi o ia avanoa?
4 Auala e Faalautele ai la Tatou Faiva: E ao ona tatou naunau muamua i le faaleleia o le tāua o la latou faiva. E mafai ona faataulauina lenei mea e ala i le atiina aʻe atili o le tomai e avea ai ma faiaʻoga. O se tasi o sini autū o le Aʻoga o le Faiva Faatiokarate, o le fesoasoani lea ia i tatou ina ia uigā atili i le faiva i le fanua. Pe tatou te manatu ea e uiga i le auaunaga i le fanua pe a sauniunia o tatou tofiga? O tatou faatatauina ea fautuaga ua tatou mauaina, ina ia faaleleia ai la tatou lava faiva? (sg itu.96-99) E faapena foi ona tele faufautuaga mo le faiva i le fanua ua aumaia i le Sauniga o le Auaunaga. Seʻi o tatou faaaogāina ia mea i le vave e mafai ai.
5 O le mea e sosoo ai, ia iloilo pe mafai ona fetuutuunai ou tulaga ina ia auai i le galuega faapaeonia lagolago pe faasauatoa. O le faia faapea o le a mautinoa ai le faaauau pea ona e pisi i le auaunaga i lo tatou Tamā, o Ieova. (1 Kori. 15:58) Ae ā pe afai e lē mafai ona e paeonia? E mafai ona e faaalia le agaga paeonia e ala i le atiina aʻe o le naunau moni mo le faiva ma le manatu mamafa mo tagata i le oganuu. E mafai foi ona e faaaogāina avanoa uma e fesoasoani ai i ē loto faamaoni ina ia iloa Ieova ma ana fuafuaga matagofie e ala i le faia o toe asiga ma le faafoeina o suesuega faale-Tusi Paia.
6 O le tali atu i le valaau ina ia auauna i mea o loo tele ai le manaoga, atonu o se vaega foi lea o lo tatou agaʻigaʻi i luma. (Isaia 6:8) O i latou ua see atu i se faapotopotoga o loo manaomia ai le fesoasoani i le tino o auauna, po o se faapotopotoga sa vaavaai mo se fesoasoani i le galueaiina o lona oganuu, e mautinoa ua seleseleina mai le tele o faamanuiaga.
7 Ina ua tatou muai aʻoaʻoina le upu moni, sa uunaia ai i tatou e le alofa mo Ieova ma Iesu Keriso ina ia faia ni fetuunaiga tetele i o tatou olaga. I le taimi nei, a o tatou tuputupu aʻe i le talisapaia o la tatou faiā ma lo tatou Tamā faalelagi atoa ma le mea na faia e lona Alo mo i tatou, pe o iai ea nisi fetuutuunaiga e mafai ona tatou faia ina ia faalauteleina ai la tatou faiva? Talosia ia faaaogāina e i tatou uma i tatou lava e ala i le faaauau ona pisi i le auaunaga a Ieova.—Roma 12:11.