Paeonia—O se Auaunaga e Aumaia ai Taui Faaʻoaina
1 E finagalo Ieova ina ia tatou olioli ma ia iloa le lelei o a tatou galuega mamafa uma. (Fai. 5:18) O le galuega e sili ona tāua e mafai ona tatou auai, o le galuega talaʻi o le Malo ma le faia o soʻo. Na apoapoai atu Paulo ia Timoteo: “Ia e faautauta i mea uma lava, ia e onosai i mea e tiga ai, ia e fai le galuega a lē folafola le tala lelei, ia e matuā [faamaeʻaina] lau faiva.” (2 Timo. 4:5) Sa ia faalaeiauina Timoteo, ma e faalaeiauina foi i tatou uma i aso nei i upu a Paulo ina ia auai ma le solu atoa i la tatou faiva. Mo nisi, o le auai ma le solu atoa i le auaunaga, e aofia ai le auauna o se paeonia sauatoa. Aiseā e lē iloilo ai faatasi ma le tatalo pe faamata o le a faatagaina oe e ou aiaiga ina ia auai i le faiva faataimi atoa?
2 E Manaomia se Gaoioiga Mautinoa: Ina ia auai i le galuega paeonia, e manaomia ai ona uia ni laasaga maumauai e ōgatasi ma a tatou tatalo. Ia faatupuina aʻe se faanaunauga mo le auaunaga a Ieova, faatasi ma le alofa mo tagata. Ia faateleina lau galuega i le fanua, e ala i le atiina aʻe o toe asiga ma suesuega faale-Tusi Paia. Galue i le faia o se faasologa e mafai ona faatinoina; e moni. Saili ni faufautuaga mai toeaina ma paeonia. Pipii i se faatulagaga ua lelei ona mafaufauina mo le auai i le galuega talaʻi. E manaomia foi le pulea totino, le tausolomua, ma le maumauai. (1 Kori. 9:23, 25, 27) O mea ia e aofia ai i laasaga mautinoa ua faia e i latou o ē na auai i lenei vala matagofie o le auaunaga.
3 O le faataatiaina o ni sini e moni aʻiaʻi ma galue ma le tinoū agaʻi i ai, o le a mafai ai ona tatou agaʻigaʻi i luma i la tatou galuega talaʻi a o tatou faaleleia o tatou tomai. E mafai ea ona faaleleia a tatou faatomuaga i le fale po o le auala tatou te feagai ai ma teteega? O tatou faaaogā atoatoa ea lomiga uma o loo maua? Pe o tatou faafoeina se suesuega faale-Tusi Paia e agaʻigaʻi i luma? E mafai ea ona tatou amata auai i le paeonia lagolago i le taimi lenei ma le manatu e paeonia sauatoa i se taimi mulimuli? E tatau ona moni sini ma ia faataatia e tusa ma le mea e mafai ona tatou faataulauina. O le faataunuuina o na sini o le a faaleleia ai lo tatou uigā ma aumaia ai ia i tatou le tele o le faamalieina.—1 Timo. 4:15, 16.
4 O se Auala Taula o le Olaga: O le paeonia faatasi ma se uunaiga tatau ma le faanaunauga ina ia agaʻigaʻi i luma faaleagaga, e aumaia ai le tele o aogā. Tatou te atiina aʻe ai se talitonuga malosi ia Ieova. O le tele o le tomai i le taulimaina o le Afioga a le Atua, e sau mai lona faaaogāina e lē aunoa i le faiva. E totōina ai se taaʻiga aogā i le faapotopotoga, ma e mafai ona faalaeiauina ai isi ina ia faia se sao e sili atu i le faiva ona o la tatou faaaʻoaʻoga maelega. E mafai ona fesoasoani le paeonia ia i tatou ina ia maua ai se vaaiga faaleagaga e sili atu o le olaga ma e puipuia ai i tatou mai tuʻinanauga, faanaunauga, atoa ma aumea faalelalolagi.
5 Sa fetalai atu Iesu i ona soʻo: “E tele le saito e seleseleina, a o le au fai galuega e toaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” (Mata. 9:37, 38) Ua sili atu foi le manaoga mo ē galulue i le taimi lenei na i lo ona po o Iesu. Ua aumaia e le paeonia ia i tatou le avanoa ina ia faia ai se sao atoatoa i lenei galuega faanatinati, e faasaoina ai ola. E leai se isi mea e mafai ona faatusaina i ai le fiafia ma le lotomalie e sau mai le faaaogāina o le olaga o se tasi i le auaunaga faataimi atoa a Lē Sili na Foafoaina i tatou.—Faata. 10:22.