Toe Asiasi Atu ma le Sini ia Amata se Suesuega Faale-Tusi Paia
1 A mavae ona uluai maua o se tagata naunau, e manaomia ona tatou galulue maeʻaeʻa ina ia faaolaola ai pea lena naunau. O le faia o toe asiga e mafai ona taʻitaʻi saʻo atu ai i ni talanoaga faasaoola mai le Tusi Paia ma ni suesuega faale-Tusi Paia. Ia manatunatu i faufautuaga nei mo le faia o ni toe asiga uigā.
I le faaiʻuga o le uluai asiasiga, e mafai ona e faataatia se faavae mo se toe asiga e ala i le fesili atu:
◼ “Pe ua e manatunatu ea i le pogai ua tele naʻuā ai lotu?” A e toe foi atu la, e mafai ona e faapea atu: “O le taimi mulimuli na ou iai i inei, na lagā ai le fesili i le pogai ua tele naʻuā ai lotu. E tele mafuaaga mo lenei itu. Ae ou te manao e faitau atu se mea aogā na ou maua i laʻu autaluga o lenei fesili.” Suʻe i le itulau e 322 o le tusi Reasoning ma faitau le vaega o loo i lalo o le tamai ulutala “Aiseā ua tele naʻuā ai lotu?”
2 Pe Mafai ona Iai le Atua i Lotu Uma? Ina ia iai le Atua i se lotu, e tatau i lea lotu ona fuaina mai fua tonu.
Ina ia amata se toe asiga, e mafai ona e fesili atu:
◼ “E ao faapefea i se lotu ona aafia ai le amio a se tagata? O mea na taʻua e Iesu Keriso i le Mataio 7:17-20, ua aumai ai ia i tatou ni taʻiala o loo faatalitalia e mulimuli ai le lotu moni.” Faitau saʻo mai le mau o loo i le faaiʻuga o le palakalafa e 19 i le itulau e 12 o le tusi Mankind’s Search for God. Ona fesili lea i lē ona le fale e uiga i mea ua ia vaaia i le ata o loo i le itulau e 13. “A o faitau miliona i latou ua faapea mai e talitonu i le Atua, ae e toatele ua latou faafitia o ia e ala i a latou galuega.” Ona sosoo lea ma le faitauina o uluai fuaiupu e lua o le palakalafa e 20. “O gaoioiga sauā na ua mataulia ai lotu e lē o mulimuli i le taʻitaʻiga na aumaia e Keriso ina ia fealofani, e oo foi i o tatou fili. A ou toe asiasi mai, atonu e mafai ona ta talatalanoa i mea e tatau ona faia e se lotu pe afai o loo ia fuaina mai ni fua lelei.”
3 O le ā ua taatia mai i le lumanai mo i latou o ē saili i le Atua moni? A talanoaina saʻo lenei fesili mai le tamai tusi o le Tala Lelei, e mafai ona taʻitaʻi ai i se suesuega faale-Tusi Paia.
Ina ia amata se talanoaga, atonu e te faapea atu:
◼ “Ona o tulaga tau tamaoaiga e pei ona iai nei, e toatele tagata o loo tau mānatu pe mafai ona ia i latou se vaaiga mautinoa o le lumanai. Ua ou iloa le faamalosiau tele o le Tusi Paia a o talanoa mai e uiga i le lumanai. Seʻi oʻu faailoa atu foi ia te oe le folafolaga a le Atua i le Isaia 65:21, 22, 25. [Faitau ma faaopoopo puupuu i le mau.] Ua taliina e le tamai tusi, o “Lenei Tala Lelei o le Malo,” nisi o fesili faagaee loto e uiga i lena itu, e amata i le palakalafa e 42 i le itulau e 24.” Ona faataʻitaʻi lea o le fuafuaga o le suesuega faale-Tusi Paia, e faaaogā ai palakalafa e 42-43. “O le a ou fiafia e iloiloina i le vaiaso e sosoo ai le fesili, O le ā le faavae o le lalolagi fou ua folafola mai i le Tusi Paia?”
4 Ia faaaogā ma le atamai le taimi o loo totoe ina ia auai i le molimau maeʻaeʻa lea ua faasalafa atu nei i atunuu uma o le lalolagi. (Faatusatusa i le Galuega 20:21.) O le faia o toe asiga faatasi ma le sini ia amata se suesuega faale-Tusi Paia e mafai ona iʻu ai i le ola e faavavau mo i latou o ē tatou te talaʻi atu i ai.