Ia Fai atu Pea: “Ina Sau Ia”!
1 Maeu se sauniuniga ofoofogia ua faia e Ieova, e ala mai i le taulaga togiola a Iesu! Ua mafai ai ona ia i tatou se faavae mo mea uma e manaomia ina ia matuā faafiafiaina ai tagata. (Ioane 3:16) Peitai, e faanoanoa e faapea atu, e toaitiiti lava ua latou iloa ma mausalī lo latou talitonuga i lenei upu moni. Ae, ona o lona manatu alofa mai pea i tagata, ua fuafuaina ai e Ieova le faailoaina atu o lenei tala lelei i tagata i so o se vaipanoa. Ua ia faalautele atu i tagata uma le avanoa e ala i lona Alo, o Iesu Keriso, ina ia maua ai le fiafia ma le faamoemoe o le ola e faavavau.—Ioane 17:3.
2 Mo le faitauafe o tausaga, sa lē mafai ona mātaulia po o ai Lē o le a togiolaina tagata mai le agasala ma le oti. Sa avea o se ‘mealilo paia’ lena mea seia oo ina ua afio mai Keriso Iesu, ma ‘faasusulu mai le malamalama i le ola ma le lē iʻuvale, e ala i le tala lelei.’ (Roma 16:25; 2 Timo. 1:10) Na amata ona folafola atu e soʻo o Iesu lenei tala lelei i le uluai senituri; nei la, o i tatou o loo soifua i nei ona po, ua ia i tatou se faaeaga sili o le faalauiloa atu o lenei lava tala lelei. O lo tatou talaʻiina o le feau o le Malo, o lo tatou auaufaatasi ai lena ma Ieova le Atua, ma Iesu Keriso, ma uso o Keriso, o ē o loo valaauina tagata o vaega uma o le olaga, i le faapea atu: ‘Ina ō maia; . . . ina ave fua ia le vai o le ola.’—Faaa. 22:17.
3 O le mea moni, e lē o tagata uma o le a faalogo i lenei tala lelei. E toaitiiti lava e matuā uaʻi mai. E tetee ma le lē faaaloalo mai nisi i auauna a le Atua, a o valaaulia atu i latou ina ia mauaina le manuia mai vai faasaoola o le upu moni. I na foi tulaga, tatou te finafinau ai i lenei galuega e ala i le malosi mai ia Ieova. Ua tatou iloa, o lo tatou naunautai e tautala atu i le upu moni ma fesoasoani i so o se tasi o le a faalogo mai, e faafiafiaina ai Ieova ma maua mai ai lana faamanuiaga.
4 E ui lava o le a tatou ofoina atu le tusi Olaga Faaleaiga i la tatou faiva ia Mati, ae e mafai lava ona tatou faalaeiauina i latou o ē malamalama i le faa-Peretania ina ia faitau le tusi o le Revelation Climax ma olioli i le faamoemoe ua ia folasia mai. O le a latou seleseleina le tele o faamanuiaga i le faia faapea. Ae maise, o loo faatatau atu le tusi o Faaaliga i le lumanai—le lumanai mo i latou ma i tatou foi. O nisi o ē ua avea nei ma auauna tuuina atu a Ieova, na amata ona fiafia i le upu moni ina ua uma ona faitau i faamatalaga a le tusi o Faaaliga, mai se tasi o lomiga a le Sosaiete. A o tatou tau atu i la tatou faiva i ē faamaoni o latou loto, o ē o loo galala mo le upu moni, e mafai ona tatou taumafai e faasino atu i ai se manatu matilatila e tasi pe lua mai le tusi o le Revelation Climax ma faaali atu ia i latou lona tāua. E mafai foi ona tatou faasino atu i le manino o ana faamalamalamaga i valoaga a le Tusi Paia ia ua faataunuuina i lenei 20 senituri, e pei o le tietiega solofanua mataʻina a tagata tietie faafaatusa na o loo faamatalaina i le mataupu e ono o le Faaaliga.
5 Ua sili ona talafeagai lo tatou talanoa e faatatau i sauniuniga alofa a Ieova mo tagata, a o tatou sauniuni e faamanatuina le Faamanatuga o le maliu o Keriso ia Aperila 6. E tusa lava pe faalogo mai tagata pe leai, ae ia tatou finafinau pea i lo tatou tofiga ua tuuina mai e le Atua, ina ia faalautele atu le valaaulia mafana i so o se tasi o loo moomoo: “Ina sau ia; . . . ina ave fua ia le vai o le ola.”