Fesoasoani i Ē Uma ua Faaalia le Naunau
1 O lo tatou faatuatua ma lo tatou alofa mo isi o le a uunaia ai i tatou ia Mati, ina ia fesoasoani atu ma valaaulia mo le Faamanatuga i latou uma ua faaalia le naunau i le feau o le Malo. E manaomia ona tataʻi atu i latou na i le faaolataga ua sauniunia e Ieova, lea e faaautū i le taulaga togiola a Keriso.—Epe. 9:28.
2 O se manatu lelei le faia o se lisi o igoa o i latou e te manao e valaaulia i le Faamanatuga. Ia faaaofia ai so o se tasi e masani i nisi taimi ona auai i sauniga, ma i latou foi sa faia muamua ni a latou suesuega pe sa faaalia foi se naunau i nisi auala. Aua neʻi galo paaga lē talitonu ma isi tagata o le aiga. Pe a uma ona fai lau lisi, ona faatomua lea o se taumafaiga faapitoa e asiasi atu ai ia i latou taitoatasi. Atonu e te fia talosaga atu i le au toeaina ina ia fesoasoani ane ia te oe i le faia o nisi toe asiga.
3 O le ā e mafai ona e fai atu ai i le toe asiga?
Pe a maeʻa se faafeiloaiga mafana, e mafai ona e fai atu faapenei:
◼ “I le taimi ua mavae, sa e faaalia ai le naunau i mea faaleagaga, ma ua ou manatu ai atonu o le a e talisapaia lenei valaaulia mo se sauniga faapitoa. [Tuu atu i lē ona le fale le pepa valaaulia o le Faamanatuga.] O le Faamanatuga o le maliu o Keriso, ua na o lea lava le sauniga na poloaia e le Alii o Iesu Keriso ona soʻo ina ia faamanatuina. Tatou te tulimataʻia le toe autaluina o le mea na faataunuu e Keriso e ala i lona maliu, ma le auala e mafai ai ona tatou maua le ola e faavavau e ala mai i lea sauniuniga. I le tausaga ua tuanai, e silia i le 11 miliona na auai i lenei sauniga faapitoa. O se fiafiaga foi la lou auai mai faatasi ma aʻu i lenei tausaga.” Ia mautinoa ua tusi le taimi ma le nofoaga o le a faamanatu ai e la outou faapotopotoga le Faamanatuga. Ia taʻu atu foi i ai le sauniunia o se auala mo ia pe a manaomia.
4 Pe a auai ē fou i le Faamanatuga, e tatau ona faafeiloaia ma le talisapaia i latou. Ia fesoasoani atu i ai ina ia latou faamasani i tagata talaʻi o le faapotopotoga ma faafeiloai atu i latou i so o se tagata fou atonu o loo latou nonofo felataʻi. O le a faalaeiauina ai i latou i le iloaina, e toatele nisi tagata i o latou lava tuaoi ua naunau foi i le upu moni. Valaaulia i latou e nonofo faatasi ma lou aiga i le taimi o le Faamanatuga pe a talafeagai.
5 Ioe, o le tau ina auai atu i le Faamanatuga e lē faamautinoaina ai ia i latou se faaolataga. Ae mo le toatele e te valaaulia, atonu o la latou uluai laasaga lea i le faaalia o le faatuatua i le toto masaa o Iesu. A o toe agaʻi atu i le fale pe a uma le sauniga, fesili atu i le tagata asiasi pe fia auai i le Sauniga i le Lautele ma le Suesuega o Le Olomatamata i le Aso Sa e sosoo ai. Ia e mafana atu ma naunau e fesoasoani. Ia ona iloaina e te naunau e fesoasoani i so o se auala e te mafaia. O le vave ona ia auaufaatasi e lē aunoa ma i tatou, o le vave foi lea o lona agaʻigaʻi i luma faaleagaga. Maeu se olioli ma le faamalieina o le a tatou maua, ina ia faasaoina atu i “le puapuaga tele” faatasi ma le toatele o isi ua mafai ona tatou fesoasoani atu i ai!—Faaa. 7:9, 14.