Talavou e—Ia Faafiafia le Finagalo o Ieova

¹ E mafai ona avea moni lava le olaga ma fiafiaga pe afai e faaaogā e se tasi le malosi ma le malaulau o lona talavou i le auala saʻo. Na tusia e le tupu poto o Solomona e faapea: “Le taulealea e, ina olioli ia i lou tama itiiti, ia fiafia foi lou loto i aso o lou taulealea.” (Fai. 11:9) Talavou e, o le a faamasinoina e le Atua a outou gaoioiga.

² O le auala o loo ē ola ai, e lē gata e oo ai se eseesega ia te oe lava ia, ae faapena foi i ou mātua. Ua fai mai le Faataoto 10:1: “O le atalii poto na te faafiafia lona tamā; a o le tama valea e faanoanoa ai lona tinā.” Ae e sili atu ona tāua i lo lena, o le auala o loo e ola ai e mafai foi ona aafia ai Lē na Foafoaina oe, o Ieova le Atua. O le pogai lena ua faalaeiauina ai foi talavou e le Faataoto 27:11 e faapea: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” E mafai faapefea e outou talavou, ona faafiafia le finagalo o Ieova i aso nei? E tele auala e mafai ona faataunuu ai lena mea.

³ E Ala i Faaaoaoga Lelei: Ua feagai outou talavou ma “aso faigata” ia na valoia mai e le Tusi Paia. (2 Timo. 3:1) Atonu foi o omia oe i omiga mai i au uo lē talitonu i le aʻoga, atoa foi ma faiaoga o ē atonu e faatauemu i ou manatu faale-Tusi Paia. Mo se faataitaiga, na faamatalaina e se tasi faiaoga le aʻoaʻoga o le evolusione e faapea o se mea moni, ae faapea o le Tusi Paia ua na o se tala fatu. Peitai, na puipuia ma le faamaoni le Tusi Paia e se tagata talaʻi talavou sa iai i lena vasega. O le iuga, sa amataina ai le tele o suesuega faale-Tusi Paia. O nisi o i latou na faaalia le naunau, sa amata ona auai i sauniga. O lea, uso ma tuafāfine talavou, e mafai e lo outou faatuatua ona faasalaina ai le lalolagi faalematau, ae faatosina mai ai i latou o ē loto faamaoni i le upu moni.—Faatusatusa i le Eperu 11:7.

⁴ Pe e mafai ona outou faalaeiauina a outou tupulaga i le faapotopotoga, ina ia aua neʻi o latou lolo atu e faia le mea leaga? E ala i le faataatiaina o se faaaoaoga lelei i le aʻoga, i le aiga, atoa ma le faapotopotoga, e mafai ai ona outou faamalosia le faatuatua o isi tagata talaʻi talavou. (Roma 1:12) Ia faafiafia le finagalo o Ieova e ala i le faataatiaina o se faaaoaoga lelei mo isi.

⁵ E Ala i Laei ma Teuga: Sa ulagia ma amusia se tasi tuafafine ona o ona laei onomea ma sa matauina o sē “e lē matāea.” Sa leʻi fefe ai o ia, pe mulimuli atu i amioga lē taupulea a le lalolagi. Na i lo o lena, sa ia faamatalaina atu e faapea, o ia o se tasi o Molimau a Ieova, ma o loo ia tausisia le tulaga maualuga tau amio a Molimau. Po o faapena ea lou lototele? Pe e te faatagaina le lalolagi a Satani e uunaia oe i ona ala o mafaufauga ma amioga? Maeu se fiafiaga ona o le matauina o le toatele o outou talavou, o loo utagiaina aʻoaʻoga a Ieova ae teena tifiga matagā, o āega, o tupua, ma aʻoaʻoga a le lalolagi. O le mea moni, e pei ona o le a tatou aʻoaʻoina i la tatou tauaofiaga itumalo o loo lumanai nei, e tatau ona tatou iloa, o na mea o le lalolagi, e mafua mai i temoni!—1 Timo. 4:1.

⁶ E Ala i Faafiafiaga ma Tafaoga Tatou te Filifilia: E manaomia ona teu i mafaufau o mātua le manaoga o le fesoasoani atu i a latou fanau i le filifilia ma le poto o ituaiga saʻo o faafiafiaga ma tafaoga. Sa tauleleia e se tasi uso se aiga lelei na ia mafana atu i ai a o ia tuputupu aʻe. Ona o le mafaufau o mātua i mea faaleagaga, sa la saunia ni taiala sa faapea ona faatatauina foi i tafaoga a le aiga. Na matauina faapea e le uso: “Ou te viia lo latou faifai mea faatasi. E lē gata ina fesoasoani mātua i le sauniunia o le fanau mo le auaunaga, ae a oo foi i le taimi mo tafaoga, latou te fiafia faatasi e savavali, e asiasi i fale mataaga, pe na o le nonofo foi i le fale ma taaalo pe faia se galuega. O le auala latou te faaalia ai le alofa o le tasi i le isi o le aiga ma mo isi foi, e oo ai ia te oe se lagona mautinoa e faapea, o le a latou savavali ai pea i le upu moni i le lumanai, e tusa lava po o ā mea e tutupu mai.”

⁷ O le mea moni, e iai taimi e lē mafai ai e le aiga atoa ona auai i tafaoga ma faafiafiaga. O lea, e manaomia ona outou iloa lena mea talavou, ma ia manatunatu mamafa i le filifilia o le auala e faaaogā ai ou taimi avanoa. E mautinoa o loo taumafai malosi Satani e faasese le toatele e mafai ai. O ē laiti ma ē e lē lava le poto masani, e masani lava ona maileia e ala i ana gaoioiga poto ma ana faamatalaga taufaaʻoleʻole. (2 Kori. 11:3; Efe. 6:11) O lea, i aso nei, ua faaaogā e Satani auala eseese e faaosoosoina ai oe ina ia maileia, ma sailia ai se olaga manatu faapito mo faafiafiaga ma le amio leaga.

⁸ O le televise o se matai taufaasese lea na te faamuamuaina le manao tele i meafaitino ma le ola i se olaga lē mamā. Ua faaalialia pea e ata tifaga ma ata vitio le sauā ma faiga faaleituaiga. O musika tautaua i aso nei ua faateleina le leaga ma ua tumu i upu masoā. O togafiti a Satani atonu e faafoliga mai e mamā, peitai ua latou maileia ai le faitauafe o talavou Kerisiano i ni mafaufauga ma amioga sese. Ina ia teena ia omiga, e tatau ona e matuā tulituliloaina ala amiotonu. (2 Timo. 2:22) Afai e manaomia ni suiga i lou mafaufau po o lau amio e tusa ai i faafiafiaga ma tafaoga, e mafai faapefea ona faia nei suiga? Ua tali mai le faisalamo e faapea: “Ua ou saili ia te oe ma loʻu loto atoa; aua neʻi ou sese i au poloaiga.”—Sala. 119:10.

⁹ O le faatauaina o tagata taaalo ma tagata faafiafia ua taatele. Ae o le a fesoasoani ia te oe le mataʻu ia Ieova e alofia ai le faatauaina o na tagata lē lelei atoatoa. E oo foi i feusuaiga lē mamā, ua faatauaina e le toatele i aso nei. E mafai ona leoleoina oe mai nei faanaunauga e ala i le alofiaina o tfusi ata lē mamā, ma musika e faaleagaina ai. E tusa ai ma musika, ua faapea mai Le Olomatamata o Aperila 15, 1993: “O musika o se meaalofa mai le Atua. E ui i lea, ua avea musika o se faalavelave e leai se aogā i le toatele. . . . Ia fai ma ou sini le faatulaga tatau o musika, ae ia avea le galuega a Ieova ma itu e sili ona e manatu mamafa i ai. Ia filifili lelei ma ia faaeteete i ituaiga o musika e te filifilia. Ona mafai ai lea ona e faaaogā—ae lē o le faaaogāsese—o lenei meaalofa mai le Atua.”

¹⁰ Ia atiina aʻe se matuā inoino i le mea ua leaga. (Sala. 97:10) Pe a faaosoosoina oe e fai le mea leaga, ia mafaufau i le auala o loo silasila mai ai Ieova i le mataupu, ma manatunatu i ona āuga e oo i ai: e pei o le maʻito e leʻi fuafuaina, o faamaʻi pipisi e maua mai i feusuaiga, le faaleagaina o ou faalogona, le leai o se faaaloalogia o oe, ma le misia ai o faaeaga i le faapotopotoga. Ia alofia le faaleagaina o oe lava e polokalama o le TV, o ata tifaga, o ata vitio, o pese, po o talanoaga e uunaia ai le faia o le amio leaga. Ia alofia le auaufaatasi ma i latou ua faavasegaina e le Tusi Paia o “e valelea.” (Faata. 13:19) Ia faaeteete; ia filifilia au aumea vavalalata ia i latou o i le faapotopotoga o ē e alolofa ia Ieova ma ona ala amiotonu.

¹¹ Ioe, o talavou o ē e mananao moni lava e faafiafia le finagalo o Ieova, o le a latou utagia le fautuaga o loo maua i le Efeso 5:15, 16: “O lenei, ia faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto; ia faaaogaina e outou aso o lenei olaga, auā o ona po nei ua leaga.” O le ā o le a fesoasoani ia te oe ia e “faaeteete” ai i lou agaigai i luma i nei aso e gata ai?

¹² Tausia o Manaoga Faaleagaga: I le Mataio 5:3, NW na fetalai ai Iesu e faapea: “E fiafia i latou e naunau i o latou manaoga faaleagaga.” E mafai foi ona e fiafia pe a e naunau i ou manaoga faaleagaga. O le faatumuina o lena manaoga, e aofia ai le faia o se sao maelega i le talaʻiina o le tala lelei, auā o le auala lea e atiina aʻe ai lo tatou faatuatua i mea ua tatou aʻoaʻoina.—Roma 10:17.

¹³ Mai mea o tutupu totino i tagata taitoatasi, e te iloa ai e faigata ona auai pea lava pea i le faiva. O le tele lava atonu ona o le lē lava o le mautinoa. O lea la, e manaomia ona iai sou faanaunauga mausali. E ala i le faia o sou sao i le faiva i se faavae faifai pea, o le a faateleina ai ou tomai i le molimau atu ma atiina aʻe ai le mautinoa i lau taumafaiga e talaʻi atu.

¹⁴ Fai ni fuafuaga tou te galulue faatasi ma tagata talaʻi ua lava le poto masani i le faapotopotoga, e pei o paeonia sauatoa, ma toeaina. Faalogologo lelei atu i a latou taulimaga ma le auala latou te taulimaina ai teteega mai aiga. Ia faaaogā lelei le tusi o le Reasoning ma fautuaga o loo aumaia i La Tatou Faiva o le Malo. E lē umi, ae e mauaina le olioli sili mai lau faiva auā o loo e foai atu au mea uma ia Ieova.—Galu. 20:35.

¹⁵ Na mafai e nisi talavou ona faaaogāina avanoa e molimau atu ai i aʻoga, ma na taulau manuia i le faia o ni soʻo. (Mata. 28:19, 20) Ua faamatala mai e se tasi talavou Kerisiano e faapea: “I taimi ia e malōlō ai le vasega, e tele ai oʻu avanoa ou te molimau atu ai, ae maise lava taimi o aso malōlō. Pe a ou faataatitiaina lomiga faale-Tusi Paia i luga o laʻu kesi ina ia iloa mai ai e isi, e toatele tamaiti aʻoga loto naunau e faafesootai maia aʻu.” Mulimuli ane, e toatele tamaiti aʻoga e oo foi i loʻu faiaoga ua amata ona auai i sauniga faa-Kerisiano. O le mea moni, ua agaigai i luma le faiaoga i le tulaga o le avea ma Molimau tuuina atu. E matuā fiafia Ieova pe a tuuina atu e talavou tapuai e pei o oe se viiga i lona suafa.

¹⁶ O se isi auala e faamalieina ai ou manaoga faaleagaga, o le faia lea o suesuega totino. Ina ia faafiafia le finagalo o Ieova, e ao ona tatou ave i totonu le poto saʻo e uiga ia te ia, ana fuafuaga, ma mea ua ia manaomia mai ia i tatou. Po o e faataatia ese se taimi mo suesuega totino? Po o e suesue e lē aunoa, e pei lava ona e faaalu se taimi e taumafa ai e lē aunoa? (Ioa. 17:3) Po o faia sau faasologa totino mo le faitauina o le Tusi Paia e faaopoopo atu i lou taumafai e mulimuli i le faasologa o le faitauga Tusi Paia mo le Aʻoga o le Faiva Faatiokarate? Pe e te sauniuni lelei mo sauniga uma? Pe e te faitau e lē aunoa mekasini o Le Olomatamata ma le Awake!? Ae maise lava, pe e te faaaluina se taimi e faitau ai mataupu uma i le faasologa o le “Young People Ask . . . ” ma suʻe ma le faaeteete mau taitasi o loo iai? Ma ia aua foi neʻi galo le tusi na saunia faapitoa e le Sosaiete mo o outou manaoga faaleagaga, o le Questions Young People Ask—Answers That Work. Na tusi mai ni talavou Kerisiano ma o latou mātua i le lalolagi aoao, e taʻu mai auala na fesoasoani ai lenei tusi ia i latou ina ia matuā vavalalata atu ai ia Ieova.

¹⁷ Pe a e faitauina le Tusi Paia ma lomiga faatiokarate e fesoasoani mo suesuega faale-Tusi Paia, latou te taʻu atu ia te oe e uiga ia Ieova, ona mafaufauga ma ana fuafuaga. Manatunatu pe o le a faapefea ona aogā lenei faamatalaga ia te oe. Faafesootai mea o loo e faitauina i mea na e faitauina muamua. E aofia ai i lena mea le mafaufau loloto. O le mafaufau loloto na te faatagaina le faamatalaga ina ia pāʻia ai le loto ma uunaia ai oe.—Sala. 77:12.

¹⁸ Tatou te olioli i le vaai atu i talavou o ē o loo naunau i o latou manaoga faaleagaga, o loo latou auai i sauniga a le faapotopotoga. E mafai e outou talavou Kerisiano ona faalaeiauina isi e ala i le faia e lē aunoa o ni faaopoopoga uigā i sauniga. Ia fai ma ou sini le faia o se tali e lē itiiti ifo i le tasi i sauniga uma. Ia atiina aʻe se faiā mafana ma tagata uma o so o se tupulaga i le faapotopotoga e ala i le auaufaatasi ma i latou i aufaatasiga e atiina aʻe ai, a o leʻi amataina, ma pe a tuua le sauniga. (Epe. 10:24, 25) Na faapea mai se tasi uso talavou, na faalaeiauina o ia e ona mātua ina ia talanoa atu a lē toatasi se uso matua po o se tuafafine foi i sauniga uma. I le taimi lenei, ua ia iloaina le aogā o le auaufaatasi ma tagata matutua o le faapotopotoga.

¹⁹ Tuliloa Sini Faaleagaga: E faanoanoa lava ona o olaga o le toatele o talavou ua aunoa ma se fuafuaga ma se taitaiga. Peitai, pe e lē o se mea lelei ea le mauaina o le faalogona e sau mai le faatutu o ni sini faatiokarate, ma ausia ma le manuia na sini? O nei sini e tuliloaina faatasi ma le malamalama i aʻoaʻoga mai le Atua, o le a faamalieina totino ai lava oe i le taimi nei, ma taitaiina atu ai i le faaolataga e faavavau.—Fai. 12:1, 13.

²⁰ Pe a faatutu ni sini, ia fai ma mataupu o au tatalo. Talanoa i ai faatasi ma ou mātua ma toeaina. Iloilo oe lava ma ou tomai, ma faatutu ni sini aogā e tusa ai ma le mea e mafai ona e faataunuuina, ae aua neʻi faia i se tulaga e faatusatusa ai i isi. E eseese uma lava tagata ma o latou fausaga—i le faaletino, le faalemafaufau, i faalogona ma le faaleagaga. O lea la, aua neʻi e faatalitalia e te faia mea uma o loo faia e le isi tagata.

²¹ O ā nisi sini e mafai ona e aapa atu i ai? Afai e leʻi avea lava oe ma tagata talaʻi i le taimi nei, pe e te leʻi papatiso foi, aisea e lē fai ai lena ma ou sini? Afai o oe o se tagata talaʻi, e mafai ona e faia se sini o ni itula faapitoa ua e mautinoa e te ausia i le faiva i vaiaso taitasi. Galue ina ia avea oe ma faiaoga agavaa i le faia o toe asiga, ma ia fai ma ou sini le faia o se suesuega faale-Tusi Paia. Afai o oe o se talavou papatiso o loo i le aʻoga, aisea e lē fai ai ma ou sini le paeonia lagolago i masina o le tuuaga a sau. E “tele mea e fai i le galuega a le Alii.”—1 Kori. 15:58.

²² E Aogā le Fesoasoani Mai Mātua: E lē tatau i talavou i le faapotopotoga ona iai se faalogona faapea, o loo tuua na o i latou i a latou taumafaiga mo le mauaina o le ola. Ua saunia e Ieova fautuaga e ala mai i lana faalapotopotoga ina ia fesoasoani ai i nei talavou i le faia o a latou filifiliga i aso taitasi, ma le foia o faafitauli i le olaga. O le mea moni, ua iai i mātua tuuina atu le faaeaga tutasi e fesoasoani atu i a latou fanau i le faia o faaiuga tonu. I le 1 Korinito 11:3, ua faaalia ai e le Tusi Paia, o le tane o le ulu ia o le aiga. O lea la, i aiga Kerisiano, o le tamā e taimua i le aʻoaʻoina o le fanau i poloaiga a le Atua faatasi ai ma le lagolagosua vavalalata a le avā. (Efe. 6:4) E faia lea tulaga e ala i se aʻoaʻoga mataalia a o tamameamea i latou. Talu ai ona o le faiai o le tamaitiiti e faatoluina lona lapoa i lona uluai tausaga, e ao ai i mātua ona aua neʻi o latou manatu faatauvaa i le tomai o iai i tamameamea mo le aʻoaʻoina. (2 Timo. 3:15) A o tutupu aʻe tamaiti, e manaomia e mātua ona aʻoaʻoina pea i latou ina ia alolofa ia Ieova ma atiina aʻe se faiā vavalalata ma ia.

²³ I le Tauaofiaga Itumalo o “Aʻoaʻoga mai le Atua,” o le a tauaaoina ai se lauga e faapea, “Galue Malosi mo le Faaolataga o Lou Aiga.” E tele ni manatu eseese o le a aumai ai e fesoasoani i mātua ina ia iloa ai auala aogā latou te fesoasoani ai i a latou fanau. O faaaoaoga lelei a mātua, o se auala sili lea e amata ai. E sili atu le aogā o lenei auala i le itu faaleagaga o lau fanau na i lo o le tele o taimi e te faatonu ai i latou i le mea e tatau ona e faia ma le mea e lē tatau ona faia. O le faataatiaina o le faaaoaoga lelei faamātua e aofia ai le faaalia o fua o le agaga i totonu o le aiga, i lau paaga, ma faapea foi i lau fanau. (Kala. 5:22, 23) O le toatele o mātua ua latou iloaina e ala i mea na tutupu ia i latou e faapea, o le agaga o le Atua o se fesoasoani malosi mo le lelei. E mafai ona fesoasoani ia te oulua ina ia faatulaga ai mafaufau ma loto o la oulua fanau.

²⁴ O le a taʻua ai foi i le tauaofiaga se manaoga mo mātua ina ia faataatia se faaaoaoga lelei i le faia o suesuega totino, auai i sauniga, ma le faia o se sao e lē aunoa i le faiva i le fanua. Afai e te tautala malosi e uiga i le upu moni i le aiga, taulamua ma le maelega i le faiva i le fanua, ma iai se vaaiga saʻo e uiga i suesuega totino, o le a faalaeiauina foi la lau fanau e matuā faaalia se naunau faamaoni i mataupu faaleagaga.

²⁵ Pe a manatunatu ma sauniuni lelei, o le a mafai ona fiafia ma uigā le suesuega faifai pea faale-Tusi Paia a le aiga, ma avea o se taimi e faamanatu atu ai le autasi o le aiga. Ia faaalu le taimi ina ia pāʻia ai loto o lau fanau. (Faata. 23:15) A o faaaogā e le tele o aiga lea taimi e sauniuni ai mo le Suesuega o Le Olomatamata o le vaiaso, atonu i nisi taimi, e faalaeiauina le aiga pe a talanoa se manaoga faapitoa o le aiga. O le fesiligia o fesili faatupu manatu ma faalogologo lelei i manatu o sui uma o le aiga, o le a avea o se mea e faamalamalamaina ai ma faafouina ai tagata uma. O le faia o se suesuega e aogā i tagata uma o le aiga, o se lui moni lea i le ulu o le aiga. Ae maeu se tauia pe a tutupu uma aʻe le fanau i le itu faaleagaga! O le faaaafia o tagata uma o le aiga, o le a faatumauina ai se agaga fiafia.

²⁶ O lau aoaiga alofa ma le lelei i le taimi nei, e aogā mo le faasaoina o ola o lau fanau. (Faata. 22:6) I le manatuaina o lenei manatu, o le a faigofie ai ona e malamalama e faapea, atonu o le aʻoaʻoga lenei e silisili ona aogā i lo o mea uma sa e faia. Aua neʻi e manatu faapea o lenei avega tauave faapitoa ma le tāua e na o oe e te faia. Aʻoaʻo ina ia faalagolago malosi atu ia Ieova mo le taitaiga i le tausia o au avega tauave faaleaiga. Ae e lē na o le pau ai lea. E iai foi nisi e mafai ona avea o ni fesoasoani moni.

²⁷ Mea e Mafai ona Faia e Isi e Fesoasoani Ai: E mafai e toeaina ona faaaofia ai talavou ma o latou mātua, i le faamamāina o le Maota o le Malo. Faalaeiau le fanau a o iai i sauniga a le faapotopotoga. E ao i toeaina ma auauna o le faiva ua tofia i ai vaega o le Sauniga o le Auaunaga, ona latou tulimataia lima o tamaiti o loo sii i luga pe a iai ni vaega e manaomia ai se sao o le aofia. Ia vaai avanoa e faaaogā ai talavou e lelei a latou faaaoaoga i ni faataitaiga faatasi ma o latou mātua. E mafai ona faatalanoa nisi o i latou ma faaalia ni o latou manatu pupuu.

²⁸ Aua lava neʻi faaleamanaiaina a latou taumafaiga. Ua faamaonia le avea o talavou ma fesoasoani aogā i le faapotopotoga. E ala i a latou amio lelei, ua toatele ai ē ua ‘viia le mataupu a le Atua, lo tatou Faaola.’ (Tito 2:6-10) Ia mataalia e faamālō atu i talavou o ē o loo faia se vaega e tusa lava pe itiiti. O le faia faapea, o le a faalaeiauina ai i latou e sauniuni ma iai foi se faanaunauga e toe faia faapea i le lumanai. O le faaalia o le naunau faapena i talavou, e lē mafai ona totogia. O oe le toeaina po o le auauna o le faiva, e faafia ona e faalatalata atu i talavou o le faapotopotoga ma faamālō i ai mo se lauga po o se faataitaiga sa faia i le sauniga?

²⁹ Paeonia e, o ā mea e mafai ona outou faia e fesoasoani atu ai? Aisea tou te lē toe autaluina ai a outou faasologa ma vaai pe faapefea ona faaaofia ai tamaiti aʻoga i a outou fuafuaga mo afiafi ma faaiuga o vaiaso? Po o tou talanoa atu ma le mautinoa e uiga i a outou filifiliga o le auaunaga faataimi atoa? Po o atagia atu i o outou foliga faaalia o loo outou mauaina le olioli i la outou faiva? Pe tou te fautuaina atu e aunoa ma le faatalatu i isi ae maise lava i talavou? A o galulue mai lea fale i lea fale, po o avea a outou faamatalaga o ni faamatalaga e mautinoa ma atiina aʻe ai? Afai o tou faia faapea, ua avea la outou o ni paeonia o loo faia se sao i lenei galuega tele ma le tāua o le aʻoaʻoina.

³⁰ O tagata uma lava i le faapotopotoga e ao ona matuā magafagafa i lenei galuega tāua o le aʻoaʻoina o ē talavou. Pe e mafai ona outou faia ni fuafuaga maʻoti e galulue ai ma i latou i le faiva i le fanua? Pe e mafai ona outou faataitaia ma i latou se taulimaga e sauniuni ai mo le galuega i lea fale ma lea fale? Po o outou mataalia i avanoa e faalaeiau ai i latou i isi galuega faaleagaga i le lumanai pe a galulue faatasi i le faiva? E ao i tagata talaʻi taitoatasi uma ona iloa faapea, e tusa lava pe na o sina faaupuga saʻo e faia e uiga i le olaga o le talavou ma ona sini faaleagaga, ae e mafai ona atiina aʻe ai ni aogā e faavavau.

³¹ E Mafai e Talavou ona Fesoasoani ia i Latou Lava: Talavou e, matou te faalaeiauina outou uma taitoatasi ina ia utagia aʻoaʻoga a Ieova, ma teena le mea o loo ofoina mai e le lalolagi. Ia faaauau pea ona suesue ifo oe lava ia te oe e ala i le iloiloina o lau amio, ma ou faalogona. O le ā sou manatu ia Ieova ma le mea o loo ia faatalitalia mai ia te oe i lou olaga i aso uma? Po o e tauina ea se taua fita faasaga i manatu faatosina mai ia Satani? (1 Timo. 6:12) Talu ai o tagata uma ae maise lava i talavou, e iai le faanaunauga masani o le talileleia mai e a latou uo, po o faapena foi la ona maileia oe e mulimuli atu i le toatele o talavou i le faia o mea leaga? (Eso. 23:2) Sa malamalama lelei le aposetolo o Paulo i le tele o omiga o loo iai ina ia faaliliu atu ai i ala o lenei lalolagi.—Roma 7:21-23.

³² E manaomia ai le lototele e tetee atu ai i faatosinaga a le lalolagi, ia uia se auala e ese mai i uo faalelalolagi, ma ia utagia ai aʻoaʻoga mai le Atua. Sa faia ma le manuia e tagata i aso ua mavae. Seʻi manatunatu i le lototele sa ia Noa. O lona faatuatua na ia tausalaina ai le lalolagi atoa, faatasi ai ma le vavae ese mai i ē amio leaga i ona aso. (Epe. 11:7) Ia tau se taua fita auā e tauaogaina lo outou tautiga. Aua lava neʻi e faataitai atu ia i latou o ē vaivai, ma lē matatau o loo mulimuli atu i le vaega tele a Satani. Na i lo o lea, ia saili atu i le aufaatasiga a i latou o loo tauleleia i le silafaga a Ieova. (Fili. 3:17) Ia faauo atu ia i latou o le a outou savavali faatasi i folafolaga a le Atua i le lalolagi fou. (Fili. 1:27) Ia teu i le mafaufau, e na o le tasi lava le ala e iu i le ola e faavavau.—Mata. 7:13, 14.

³³ Afai tatou te olioli i le vaai atu i talavou o loo viia ma faamamaluina lo tatou Atua, maeu le tatau ona faafiafiaina ai o ia i lea tulaga! E mautinoa le faafiafiaina o Ieova i le silasila atu i talavou o loo faia se sao atoatoa i le faalauiloaina o ana fuafuaga ofoofogia. O i latou o le “tofi” mai ia te ia, ma e na o mea lelei e finagalo i ai o ia mo i latou. (Sala. 127:3-5; 128:3-6) I le faaatagiaina o mea na naunau i ai lona Tamā, sa faatumulia ai Keriso Iesu i le olioli i aufaatasiga ma tamaiti, ma sa ia faaalu se taimi e faalaeiau ai i latou i la latou tapuaiga ia Ieova. Sa ia faaalia le alofa mutimutivale mo i latou. (Mare. 9:36, 37; 10:13-16) Po o tatou vaai ea i o tatou talavou i le auala o loo silasila ai Ieova ma Iesu ia i latou? Po o iloa e a tatou talavou le auala o loo silasila mai ai Ieova ma agelu i lo latou faamaoni ma a latou faaaoaoga lelei? E ao ona viiviia ma faalaeiauina i latou e faafiafia le finagalo o Ieova, e ala i le aapa atu mo ni sini faaleagaga. Talavou e, ia tuliloaina sini e iu ai i faamanuiaga mo outou i le taimi nei, ma i le lumanai!