E Faaaloalogia le Atua i le Tumama
1 Sa aofia i le Tulafono faa-Mose ni manaoga maumaututu mo le tausia o le tumama. Sa vavaeesea ai Isaraelu o ni tagata sa manaomia ona latou mamā faaletino ma faaleagaga. (Levi. 11:35, 36; 15:1-11; Isa. 52:11) Na aumaia ai e lenei tulaga mamā le faaaloalogia i le Atua ma saosaolaumea i le soifua maloloina o le nuu.
2 I aso nei foi, o le tumama ua fai ma faailoga vaaia o tagata o Ieova. Ae a o faailogaina tagata o Ieova i le tumama o se vaega, pe moni ea lea tulaga ia i tatou taitoatasi lava ia? O le tele tatou te manatu mamafa ai e uiga i le mamā ma le tumama totino lava ia, e atagia atu ai le tele o lo tatou talisapaia o faatulagaga a Ieova.
3 Ae faapefea le foliga mai o o tatou fale? Po o avea ma pogai e mumusu ai tagata i le feau o le Malo lea tatou te talaʻia? Pe lē ono fesiligia e nisi tagata lo tatou naunau faamaoni e taʻu atu le faaliliuina o lenei lalolagi i se parataiso ae i o tatou lava fale e lē o lelei ona tausia, ma le fanua ua pei o se vaomatua e lē o teua? Afai o foliga mai o tatou fale e gasu pe namu leaga ona o le faainaelo, pe mafai ona tatou faapea atu ua tatou atiina aʻe se “faataitaiga o le tumama e fetaui ma le lalolagi fou i lalo o le Malo o le Atua”?—om itu. 130-131.
4 Ae faapefea le taavale o tatou faaaogāina i le auaunaga i le fanua? Pe o iai i se tulaga mamā, i fafo ma totonu, ina ia lē tauemua ai la tatou galuega talaʻi? Ae faapefea o tatou laei, ʻato talaʻi, ma teuga a le tagata lava ia? Po o mamā ma matagofie i le vaai ina ia lē faapogaia ai se tetee? O se mea tatau lo tatou tausia o i tatou lava ma o tatou laei ia mamā e ala i le taele e lē aunoa ma tatā lelei lavalava.—w 12/1/89 itu. 24-27.
5 Ae faapefea pe a faainaelo se uso i lona lava tino ma lona siosiomaga ma avea ai ma pogai o le faalumaina o le faapotopotoga? Atonu na te manaomia ni fesoasoani agalelei ona ua matua po o le lē lelei foi o le soifua maloloina. Afai o le tulaga lea, o se agalelei la le fesoasoani ia te ia. Atonu o iai i se tasi lena lava faafitauli ae na te lē o iloa; o se timaiga agaalofa o le a mafai ai ona uunaia o ia e faaleleia lea tulaga. O tagata taitoatasi o ē e tumau pea ona latou faia se faataitaiga leaga i ia itu, e lē agavaa mo ni faaeaga iloga i le faapotopotoga. O le mea moni, e ao foi ona leoleo toeaina i le fautua atu e tusa ma o latou lava tulaga po o mea latou te mananao i ai.
6 Ua valaaulia tagata fiafia e fou mai, ina ia olioli i meaai faaleagaga i o tatou Maota o le Malo. E masani lava ona tatou naunau e faalautele atu le valaau ona o le matagofie o le maota ma le mamā. Peitai, e tele galuega e faia ina ia tumau ai pea i lena tulaga. Vaavaai solo i lou Maota o le Malo. Po o mamā nofoa, o le fola, ma puipui? Po o fufulu e lē aunoa faleese? Pe afai ua tatou masani lava i tatou i le tilotilo atu i le kapeta palapalā po o puipui ua matafi vali, atonu ua lelei lava lea i lau vaai. Peitai, o tagata ese e asiasi mai i se taimi muamua atonu e ō ma se faalogona lē lelei. E ao ona faia le mea e silisili tatou te mafaia ina ia tausia ma tumau ai le mamā o le maota, e ala i le faia o lo tatou sao pe a oo mai le taimi e faamama pe toe faaleleia ai.
7 E mafai ona tatou faamamaluina le Atua e aunoa ma se upu, e ala i o tatou foliga totino, ma le mamā o o tatou fale, taavale, ma Maota o le Malo. O a tatou faataitaiga lelei, o le a lē faapogaia ai le tautevateva o isi, ae o le a avatu ai se molimau e faapea, o la tatou tapuaiga e mamā ma amiotonu.—1 Kori. 10:31, 32; Iako. 1:27.