Sauniunia Tagata Aʻoga o le Tusi Paia mo le Faiva
1 O le sini tupito i le faia o suesuega faale-Tusi Paia, o le faia lea o ni soʻo fou, o ni aufaigaluega o le a aufaatasi ma i tatou i le aʻoaʻoina o isi. (Mata. 28:19, 20) O lea, o le fuafuaga o le suesuega, e lē tau ina maua ai le poto; ae e ao ona totō se faatuatua mai le loto i a tatou tagata aʻoga, ma sauniunia i latou e tufa atu lo latou faamoemoe i isi. (2 Kori. 4:13) I ā auala aogā e mafai ona tatou fesoasoani atu ai ia i latou, ina ia agavaa e aʻoaʻo atu i isi?—2 Timo. 2:2.
2 Ia Avea le Faiva o se Sini: I le amataga o le suesuega, ia faamanino atu o le tapuaiga moni e aofia ai le “tautino atu i le lautele e oo mai ai le ola.” (Roma 10:10, NW) I le faatatauina o lo tatou lava igoa o Molimau a Ieova, e ao ai ona tatou tautatala atu i isi. Ia fesoasoani ia latou iloa, o le aʻoaʻoina o i latou e lē mo na o lo latou lava faaolataga. Pe a avea foi i latou ma faiaoga, o le a maua ai foi e isi o faalogologo atu ia i latou, le avanoa mo le faaolataga.—1 Timo. 4:16.
3 Toe Autalu Mea ua Aʻoaʻoina: O le toe autaluina o mea sa aʻoaʻoina mai lea taimi i lea taimi, o se fesoasoani aogā lea i le aʻoaʻo atu. E fesoasoani na autaluga i le tuputupu aʻe faaleagaga o le tagata aʻoga, a o tumau pea upu moni fou ia sa aʻoaʻoina i lona mafaufau ma le loto. Ua tatou iloa foi e i tatou lena tulaga pe a taliina fesili autalu ia e faaaofia mai i le Suesuega o Le Olomatamata. Ia sauniuni ni fesili faigofie ma tuusaʻo mo lau tagata aʻoga, e tali mai ai i ana lava upu.
4 E mafai ona faia lau autaluga i se faatulagaga i le galuega i le fanua. Faatū se fesili, pe faamatala atu se tulaga e masani ona fetaiai pe a molimau atu i isi. Ia avea oe o se tagata o le aiga, ae tuu i lau tagata aʻoga e faataitai lana tala o le a fai atu. Faamālō i le lelei o le mea sa ia faia, ma avatu ni fautuaga aogā o le a fesoasoani ina ia uigā tele ai i le isi taimi. O lenei toleniga o le a aʻoaʻo ai o ia i le auala e faaaogā ai mea sa ia aʻoaʻoina, ma o le a atiina aʻe ai lona tomai i le faaaogāina o le Tusi Paia.
5 Le Tusi Reasoning: Ia mautinoa ua iai se kopi o le tusi Reasoning a lau tagata aʻoga, ma aʻoaʻo o ia e faaaogā. Faaali ia te ia le auala ua saunia ai e le tusi fautuaga i le amataina o ni talanoaga, le taliina o fesili faale-Tusi Paia, po o le faafetaiaia foi o teteega. Faaaogā le tusi i suesuega e faataitai ai auala e talanoa atu ai i isi i se auala e faatalitonuina ai. E mafai e lenei tusi ona atiina aʻe lona mautinoa, ma atili ai ona ia tausolomua i le faailoaina atu o le feau o le Malo.
6 Faamamafa le Tāua o Sauniga: O sauniga a le faapotopotoga, ae maise lava le Sauniga o le Auaunaga ma le Aʻoga o le Faiva Faatiokarate, ua fuafuaina ina ia sauniunia ai i tatou mo le auaunaga i le fanua. O mataupu faavae uma mo le molimau atu ma le uigā, ua autaluina ma faataitaia mai e i latou ua maua le poto masani ma le tomai i lea galuega. Ia faamamafa le tāua o sauniga, ma ia faia le mea e te mafaia, e fesoasoani atu ai ia te ia ina ia auai. O le auai pea i sauniga, e mafai ai e lau tagata aʻoga ona maua faagaeega o ia manaomia, ina ia avea ai ma soʻo moni o Iesu.
7 Aua neʻi galo lau lava faaaoaoga. O lou naunau ma lou auai pea i le galuega talaʻi, e faaalia ai lou talisapaia loloto mo le upu moni. O lena auala o le a faalaeiauina ai lau tagata aʻoga e faia mea e sili atu e faaalia ai lona faatuatua. (Luka 6:40) E mafai e nei mea uma ona fesoasoani i le tagata fou, e manatu ai i le faiva o se faaeaga, ma fiafia ai e faia sana vaega i lenei galuega.—1 Timo. 1:12.