O Ē Talavou e Manaomia se Faataitaiga Lelei
1 Tatou te olioli i le iai ma i tatou o le numera faatuputupulaia o talavou o loo latou ‘vivii atu i le suafa o Ieova.’ (Sala. 148:12, 13) O le toatele o i latou o loo talavou pea i o latou tausaga. O lo latou agaigai i luma ua matuā faamautuina i le toleniga ma faataitaiga e faataatia e o latou mātua ma isi tagata matutua o le faapotopotoga. Peitai, aua neʻi tatou faagalogaloina le taaʻiga o loo faia e isi tagata talavou ae maise lava talavou ua taʻi 19 tausaga ma talavou pe ua taʻi 21 tausaga. Afai o loo e iai i totonu o lenei vasega, o nei manatu atonu e aogā mo oe.
2 O talavou laiti e leʻi atoa le taʻi 13 tausaga e masani ona faanaunau e faataitai i talavou matutua. E ia i latou le faanaunauga faalenatura ia avea i latou ma aumea vavalalata a ē o loo latou viiviia. E matele ina latou viiviia isi talavou e matutua atu o loo foliga mai e sili atu lo latou atamamai ma e sili atu ona agaigai i luma o latou olaga. O le iuga, atonu latou te faataitaia lau tautala ma lau amio faapena foi ma lou talisapaia o mea tāua faaleagaga ma lou auai atu i meafai a le faapotopotoga.
3 I le avea ma se talavou matua, ua ia te oe se faaeaga atoa foi ma se avega tauave mamafa. I le taimi lenei, o au faataitaiga e foliga o loo taaʻina ai au aumea laiti. Fesili ifo ia te oe lava ia, ‘O le ā le ituaiga o taaʻiga o loo oʻu tuuina mo talavou laiti? Pe o oʻu faautauta ea, i le alofia o le valea ma le sese o “tuʻinanau o taulelea”? Pe ou te faaalia ea le usiusitai ma le faaaloalo i oʻu mātua, le autoeaina, ma isi tagata matutua? (2 Timo. 2:22; Kolo. 3:20) O mea e te faia ma e tautala atu ai atonu e avea ma vala autū o le agaigai i luma faaleagaga o isi talavou laiti o loo latou matauina au gaoioiga.
4 O le talaʻia o le feau o le Malo o le galuega autū lena a le faapotopotoga. O lou lotomalie ma lou auai e lē aunoa e mafai ona faalaeiau ai au uo ina ia agaigai atili i luma. Afai e mafai ona e ulu atu i le auaunaga faapaeonia, o le a uunaia foi la au uo e faia lea lava auala e tasi. O le faia o au tali i sauniga ma lou tauofo i le faia o galuega talafeagai i le Maota o le Malo atonu o se tasi foi lena o faataitaiga lelei ua e faataatia.
5 E ui lava sa leʻi toe iai Timoteo i ona tausaga talavou i le taimi na avatu ai e Paulo le fautuaga o loo mulimuli mai, ae e mafai foi e outou talavou ona outou faaaogāina: “Ia fai oe ma faaaʻoaʻo i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoiā.” (1 Timo. 4:12) O lou auai maelega ma le loto atoa i le auaunaga ia Ieova e mafai ona uunaia ai ē o loo tou auaufaatasi, atoa ma talavou o loo vaavaai atu, i se auala faalaeiau, e fesoasoani lea ia i latou e agaigai i luma i le avea ma tagata matutua faaleagaga. (Efe. 4:13) O talavou o loo i aiga o loo tau amata ona suesue atonu latou te tosina atu i le upu moni ona o mea o loo latou matauina ia te oe.
6 Ae sili atu lona tāua, o lou naunau e faataitaia uiga faaleatua e viia ai Ieova ma lana faalapotopotoga. (Faata. 27:11) O ē faamaoni o loo matamata mai o le a ofo i le eseesega maoae i le va o oe ma tagata talavou o le lalolagi. O lea ua ia te oe ai se faaeaga tutasi e fesoasoani ai i ē talavou a o e faia sou sao tāua i le viiaina o Ieova.—Sala. 71:17.