Faaaogā Tatau Lou Taimi

¹ O Ieova na te amanaiaina taimi. E finagalo o ia ina ia tatou amanaiaina foi taimi. E ala i lana faalapotopotoga, ua ia fesoasoani mai ai ia i tatou ina ia amanaiaina taimi. Ua uunaia pea i tatou ina ia “tele mea e fai i le galuega a le Alii.” (1 Kori. 15:58, NW) I lenei auala, e mafai ai ona sili atu ona tatou uigā i le auaunaga a Ieova.

² O i tatou taitoatasi, e tutusa uma lava le aofaiga o o tatou taimi i vaiaso taitasi—e 168 itula. O le ā le lelei o tatou faaaogaina ai o tatou taimi? Po o tatou faaalia ea o tatou iloa moni po o le ā le taimi lea ua tatou i ai e tusa ai ma le faasologa o taimi a Ieova? Po o faatosina ese ea i tatou ona o gaoioiga lē aogā?

³ E tāua tele lo tatou maopoopo lelei. E toatele o loo taumafai e tausia se lisi o mea e faamuamua. O mea taitasi, ua tusia i le lisi e tusa ai ma lona tāua. E mafai faapefea ona filifilia o lena mea? Ua faapea mai le Tusi Paia, o le tagata, e tatau ona “fiafia i mea lelei i ana galuega uma.” (Fai. 3:13) O nisi galuega e fuaina mai ai iuga e sili ona lelei nai lo o isi. Seʻi manatu i iuga o le a fuaina mai e tagata taitoatasi. Po o le faaiuina ea o le galuega o le a aumaia ai ni aogā mataina? Po o le a e “fiafia [ea] i mea lelei” i au galuega mamafa? Afai e leai, atonu la e lē o se galuega e sili ona tāua lena.

⁴ I La Tatou Faiva: Tatou te talisapaia le faiva pe afai e taunuu ane isi i faatasiga mo le auaunaga i le taimi tonu, faalogologo ma le faaeteete i faatonuga, ma vave loa ona ō ese atu i le oganuu. E sili atu ona tatou pisi i le talaʻiga nai lo o le faatalitali. E manino lava, sa malosi le lagona o Paulo e uiga i le manaomia ona maopoopo lelei ina ua ia tusi mai e faapea: “Ia faia mea uma lava ma le matagofie ma le sauni lelei.”—1 Kori. 14:40.

⁵ Pe a tatou ō i le auaunaga i le fanua, e mafai ona leiloa le taimi tāua i le faia o ni inuga kofe. A e peitai, afai e matuā leaga tulaga o le tau, o se malologa puupuu o le a faafouina ai ma fesoasoani ia i tatou ia faaauau pea. Peitai, ua filifilia e le toatele ina ia pisi pea i le molimau atu i tagata ma alofia ai le faatasitasi ma uso i le faia o ni inuga kofe i le taimi ua faatulagaina mo le faiva. E manaomia ona paleni.

⁶ Fai mai le Tusi Paia, “ua iloa e le kasita . . . ona lava po” e faimalaga ai, ma o le loi “e saunia e ia ana mea e ʻai i le tausaga vevela” e sauniuni ai mo le tau mālūlū. (Iere. 8:7; Faata. 6:6-8) O inā o loo i ai le ki i le faaaogaina lelei o le taimi. E tatau foi ona tatou ‘⁠masani lelei ma a tatou faasologa ma iloa o tatou taimi faatapulaaina.’ E aunoa ma le soona faamaaa, e tatau ona tatou amanaia le taimi. E manaomia ona tatou iloa e le gata po o ā mea e tatau ona tatou faia, a e faapea foi ma le taimi e manaomia ona faia ai. E tatau ona tatou faamasani e fuafua mamao mo le lumanai, ma maua ai se avanoa mo mea e ono tolopoina. Ma e tatau foi ona tatou loto malilie e faamuta nisi gaoioiga ina ia maua ai le taimi mo isi mea e sili ona tāua, e pei o le sauniuni mo a tatou sauniga, le faiva i le fanua, ma isi gaoioiga faatiokarate.

⁷ Tatou te mananao e pei o lo tatou Tamā faalelagi, o Ieova le Atua, o le ua aʻoaʻoina i tatou e faapea “o mea uma . . . ma ona lava po.” (Fai. 3:1) O le faaaogaina lelei o o tatou taimi, e mafai ona ‘⁠faaiuina atoatoa ai la tatou faiva.’—2 Timo. 4:5.