“Ia Mataala Pea”
1 Ina ua fetalai Iesu i upu na o loo faamauina i le Mataio 26:38-41, o le taimi lena ua latalata atu ai o ia i le taimi na sili ona faigata o lona soifuaga faaletagata. O le a faamaonia le avea o lea taimi ma taimi aupito sili ona tāua i le talafaasolopito uma o le tagata. Sa aafia ai le faaolataga o tagata uma lava. Sa manaomia la e soo o Iesu ona “mataala pea.”
2 I aso nei, ua tatou tutū ai i faitotoa o le afio mai o Iesu e tusa ai o lana vaega o lē na te faasaoina ma aumaia le faaoosala. I le avea ma Kerisiano mataala ua iloaina le faanatinati o le taimi, tatou te lē na ona piilima ma faatalitali mo le faasaoina. Ua tatou iloa e tatau ona tatou nofo sauni i taimi uma lava. O se mea tatau mo i tatou ona ‘galulue mamafa ma finafinau’ i la tatou auaunaga ia Ieova. (1 Timo. 4:10) A e faapefea i tatou taitoatasi? Po o tumau pea ona tatou mataala?
3 Ia Suesue ifo i Tatou Lava: Na lapatai mai foi Iesu: “Ia suesue ifo outou ia te outou.” (Luka 21:34, 35, NW) E tatau ona tatou uai totoʻa ifo ia i tatou lava, ia faamautinoa ua tatou “le mataʻuleagaina, ma ua sao le amio . . . i luma o le tupulaga amio faapiopio ma le finau vale.” (Fili. 2:15) Po o tatou ola ea i aso taitasi e avea o ni Kerisiano, i le faataʻitaʻi ia Iesu ma savavali e ogatasi ma mataupu silisili o loo faaauivi mai i le Afioga a le Atua? E tatau ona tatou alofia amioga e lē faa-Kerisiano, o uiga na o se lalolagi “o loo nofo toilalo i loo leaga.” (1 Ioa. 5:19; Roma 13:11-14) Pe a tatou suesueina i tatou lava e tusa ai ma le malamalama o le Tusi Paia, po o tatou mataala moni ea e pei ona faatonu mai e Iesu?
4 E tatau i toeaina ona mataalia ina ia finafinau i le faatinoina o o latou tofiga i le faapotopotoga, i le iloa, o le a latou tala atu se tala i le auala na latou tausia ai le lafu. (Epe. 13:17) Ua iai se matafaioi faapitoa a ulu o aiga ina ia taʻitaʻiina o latou aiga i ala o Ieova. (Kene. 18:19; Iosua 24:15; faatusatusa i le 1 Timoteo 3:4, 5.) Maeu foi le tāua mo i tatou uma lava ona faataunuuina le faatonuga a le Tusi Paia ina ia fealofani! O le faailoga lena o le Faa-Kerisiano moni.—Ioa. 13:35.
5 Ia Mataala e Lapataia Isi: O le faaauau ona mataala, e aofia ai mea e sili atu nai lo o le na ona vaavaai ifo ia i tatou lava. Ua tuuina mai ia i tatou se tofiga ina ia ō atu e fai isi ma soo. (Mata. 28:19, 20) O le alofa i tuaoi, e ao ona uunaia ai i tatou e lapataia isi ina ia mafai ona faasaoina i latou mai le faaumatiaga lea o loo fesagai ma lenei lalolagi. O se tiute tauave lenei mo Kerisiano uma lava. O se vaega tāua lenei o la tatou tapuaiga. (Roma 10:9, 10; 1 Kori. 9:16) E masani lava ona tatou fetaiai ma tagata e lē manatu mamafa pe tetee tuusaʻo mai i lenei galuega faasaoola. Ua ia i tatou se tiute tauave ina ia maumauai, e tusa lava pe lē amanaia e le toatele la tatou lapataiga. (Eseki. 33:8, 9) O le alofa moni i le Atua ma tuaoi o le a uunaia ai i tatou e finafinau.
6 E lē o se taimi lenei e nofo faatalanoa ai. E lē tatau foi ona faatagaina popolega o le olaga i aso faisoo e faatosina ese ai i tatou, ma ʻaua neʻi soona faaaafia i tatou i fiafiaga o lenei faiga o mea a le lalolagi, ua faamaonia ua avea o se mailei. (Luka 21:34, 35) E leai lava se isi taimi e manaomia ai ona faanatinati nai lo o le taimi lenei. Ua matuā lalata mai le taimi mo Iesu Keriso e faaoo mai ai le faamasinoga faasaga i lenei faiga leaga o mea. E na o i latou o loo mataala, mataalia, ma tiotio o le a faasaoina. Afai tatou te usiusitai i faatonuga a Iesu ma “sao mai ia mea uma ua tāli oo mai,” maeu so tatou loto faafetai!—Luka 21:36.