Po o Faaosofia Faaleagaga i Tatou e Faamanatuga a Ieova?

¹ Na vivii le faisalamo ia Ieova i lona faapea atu: “O au tulafono [“faamanatuga,” NW], ou te mafaufau i ai.” (Sala. 119:99) O le upu Eperu mo “faamanatuga” ua aumaia ai le manatu e faapea, e faamanatu mai e Ieova i o tatou mafaufau mea o taʻua i ana tulafono, ana faatonuga, ana āiāiga, ana poloaiga ma ana tapulaa. Afai tatou te gauai atu i ai, o le a faaosofia faaleagaga ai ma faafiafiaina ai i tatou.—Sala. 119:2.

² Ona o tagata o Ieova, tatou te maua ai e lē aunoa apoapoaiga ma fautuaga. O le tele lava o ia apoapoaiga, ua uma ona tatou faalogo i ai muamua. E ui lava tatou te talisapaia nei faalaeiauga, a e tele lava ina galo ia i tatou. (Iako. 1:25) Ua saunia ai ma le onosai e Ieova faamanatuga alofa. Na faamauina e le aposetolo o Peteru nisi o nei faamanatuga ina ia ‘⁠faaosofia ai tomai o o tatou mafaufau manino, tatou te manatuaina ai poloaiga a le Alii.’—2 Pete. 3:1, 2.

³ E faamanatu ma toe faamanatu mai pea ia i tatou e uiga i le tāua o suesuega totino ma le auai i sauniga. Ua faia faapea ona o nei gaoioiga e matuā tāua mo lo tatou lelei faaleagaga.—1 Timo. 4:15; Epe. 10:24, 25.

⁴ O le luʻi aupito sili mo nisi, o le faataunuuina lea o le tofiga faa-Kerisiano ina ia talaʻi. E faaalu ai se taumafaiga, maumauai, ma le finafinau. E ui lava e tele ai mea e manaomia mai ia i tatou, a e ua fesoasoani ai ia i tatou ina ia “tutumau” e ala i le “faaseevaeina” o o tatou “vae i le sauniga o le tala lelei.”—Efe. 6:14, 15.

⁵ O la tatou auaunaga e tatau ona faagaoioia i se auala e sili atu nai lo o le tau ina iloa i le mafaufau mea e manaomia e Ieova. Ua faamanatu mai e le aposetolo o Paulo ia i tatou e faapea, o le loto, e sau ai le uunaiga lea tatou te manaomia e “taʻutino atu ai i le lautele, ina ia maua ai le ola.” (Roma 10:10, NW) Afai e malosi lo tatou faatuatua ma afai e naunau o tatou loto i faamanatuga a Ieova, o le a faaosofia ai i tatou e tautatala atu e ala i le vivii atu i lona suafa.—Sala. 119:36; Mata. 12:34.

⁶ Pe a tatou galulue mamafa i le faatinoina o galuega lelei, tatou te faatalitalia foi la ma le tonu e faapea o le a tatou mauaina le olioli mai lenei mea. (Fai. 2:10) Ua faailoa mai e Paulo le olioli e faapea, o se fua o le agaga o Ieova, ma e tatau ona tatou saili ina ia faateleina lo tatou faaalia o lea uiga. (Kala. 5:22) Na faaopoopo mai Peteru e faapea o le “matuā faamalosi” o le a tauia ai i se faiva e fuatele, lea e fuaina mai ai le olioli.—2 Pete. 1:5-8.

⁷ Pe a fesagai ma se luʻi, e tatau ona tatou manatua na tumau mausalī aposetolo e pei ona latou folafola mai: “Auā ma te le mafaia ona le tautala i mea ua ma vaai i ai ma faalogo i ai.” (Galu. 4:20) Ua faamalosiauina ai i tatou ina ia faaauau pea pe afai tatou te manatua, ‘⁠o le faia o nei mea o le a lē gata ina faaolaina ai e i tatou o i tatou lava, a e atoa foi ma i latou e faalogo mai ia i tatou.’—1 Timo. 4:16.

⁸ Tatou te lē feita pe lagona se lē fiafia ona o le mauaina pea o faamanatuga. Nai lo o lea, tatou te matuā talisapaia lo latou aogā silisili. (Sala. 119:129) I nei taimi faigata, tatou te faafetai ai ona o le tuuina mai pea e Ieova o faamanatuga e faaosofia faaleagaga ai i tatou ma uunaia ai ina ia maelega i galuega lelei!—2 Pete. 1:12, 13.