Ia Vivii e Lē Aunoa ia Ieova

¹ E itiiti lava ni gaoioiga matuā tāua e manaomia ona tatou uaʻi totoʻa i ai e lē aunoa. I ia gaoioiga, ua tatou faaaofia ai le aai, mānava, ma le momoe. O mea tatau nei pe afai tatou te mananao ina ia faatumauina lo tatou ola faaletino. Ua tuu e le aposetolo o Paulo le galuega talaʻi i se tulaga faapena i lona uunai mai e faapea: “Seʻi o tatou ofoina atu e lē aunoa i le Atua o le taulaga o viiga.” (Epe. 13:15, NW) O lea, o le vivii ia Ieova, e tatau foi ona tatou uaʻi totoʻa atu i ai. O se mea e tatau ona tatou taumafai e fai i aso taitasi, o le vivii atu lea e lē aunoa i lo tatou Tamā faalelagi.

² Ina ua taumafai nisi e faauaʻi le mafaufau o Iesu i nisi mea, na ia tali atu e faapea: “E tatau ona ou folafola le tala lelei o le malo o le Atua.” (Luka 4:43) I le tolu ma le ʻafa tausaga o lana faiva, o mea uma na ia faia i aso taitasi, sa fesootai tuusao atu i le faamamaluina o le Atua i nisi o auala. Ua tatou iloa o le lagona lena na oo ia Paulo e tusa ai ma le manatu na ia faaalia i le 1 Korinito 9:16: “Oi talofa foi ia te au, pe a ou le folafolaina le tala lelei.” Sa faalaeiauina isi Kerisiano faamaoni ina ia nofo sauni pea i so o se taimi e fai atu se tali i isi e tusa ma le faamoemoe ua ia i latou. (1 Pete. 3:15) I aso nei, e faitau selauafe o paeonia maelega, ma le faitau miliona o tagata talaʻi i faapotopotoga o loo taumafai e faataʻitaʻi i na faaaoaoga lelei.

³ Pe a tatou manatunatu i le maelega ma le loto atoa na faaalia e Iesu Keriso, lo tatou Faaaʻoaʻo, ua uunaia ai i tatou e mulimulituʻi i ona tulagaaao. (1 Pete. 2:21) I nisi taimi, e ono faavaivaia ai i tatou a o fesagai ma faafitauli o le olaga i aso fai soo. E mafai faapefea ona tatou faaaogā avanoa i aso taitasi e vivii ai ia Ieova pe afai e tatou te faigaluega faasoloatoa i aso uma? E lē tatau foi ona tatou faagaloina tiute tauave i le aiga lea e manaomia ai le tele o lo tatou taimi. O le toatele o tagata talavou ua pisi tele i le aʻoga i aso uma. Atonu ua lagona e nisi e faapea, e lē mafai ona vivii atu ma le maelega ia Ieova i aso uma. I nisi taimi, o isi, e atoa lava le masina, e leai se sao e faia i le galuega talaʻi i so o se auala.

⁴ E lei faatalatū Ieremia i lona logoina atu o le tala lelei. Ina ua lē taulau ona ia tautala atu i le suafa o Ieova mo sina taimi puupuu, sa ia lagona e pei o se afi o loo mumū i totonu ia te ia. (Iere. 20:9) I le feagai ai ma tulaga e foliga mai e peiseai o ni faafitauli o lofituina ai, sa maua pea e Ieremia se auala e tautala atu ai i le feau a Ieova i isi. Pe e mafai ona tatou faataʻitaʻi i lana faaaoaoga o le lototele ma sailia pea avanoa e vivii ai i Lē na Faia i tatou i lea aso ma lea aso?

⁵ O lo tatou tautala e uiga ia Ieova, e lē tatau ona faagata mai i tulaga fuafuaina, a ia faia mamao ni fuafuaga ma nisi tagata talaʻi mo le molimau atu i le oganuu a le faapotopotoga. E pau lava le mea o loo tatou manaomia, o se tagata e faalogo mai. Tatou te fetaiai pea lava pea ma tagata i aso uma—e latou te ō mai i o tatou fale, e tatou te faigaluega faatasi ma i latou, e tatou te tutū faatasi ma i latou i laina o faatauga i faleoloa, pe e tatou te faimalaga faatasi foi ma i latou i le pasi. E na o le pau lava le mea e manaomia, o se faafeiloaiga faaleuo ma se fesili faatupu manatu po o se faamatalaga e fai atu e amata ai se talanoaga. Ua iloa e le toatele, o le ituaiga lea o molimau e aupito sili ona fuatele ia i latou. Pe a tele ni avanoa tatou te talanoa atu ai i isi e uiga i le tala lelei, o se lē magafagafa la mo i tatou pe a atoa le masina e lei tuuina atu se molimau mo le Malo.

⁶ O le faaeaga o le vivii atu ia Ieova, e lē uma. E pei ona faailoa mai e le faisalamo, e tatau i mea uma e mānava ona vivii atu ia Ieova, ma e mautinoa tatou te mananao ia faaaofia ai ma i tatou. (Sala. 150:6) Afai e uunaia i tatou e o tatou loto ia faia faapea e lē aunoa, o le a tatou faaaogaina pea la avanoa i aso fai soo e tautala atu ai e uiga ia Ieova ma lana Afioga.