Ia Amioai e Tusa ma le Tala Lelei
1 I le avea o ni Molimau a Ieova, tatou te faanaunau ai ia faamamaluina le suafa o Ieova. Ua tatou iloa o a tatou amio, le tautala, teuga, ma laei, e mafai ona aafia ai manatu o isi e uiga i le tapuaiga moni. E matuā faamaonia lenei mea pe a tatou auai i a tatou sauniga. Tatou te mananao ia faamautinoa, ua tusa ma le tala lelei mea uma o tautalagia ma faia i sauniga ina ia faamamaluina ai le suafa o Ieova.—Fili. 2:4.
2 O le tele o tulaga o laei ma teuga a le lalolagi e lē talafeagai mo Kerisiano. O se mataupu lenei e tatau ona uaʻi totoʻa i ai faifeau o le tala lelei. Ua taʻua i Le Olomatamata o Tesema 1, 1989, itulau e 28, e faapea: “E lē manaomia ona taugata o tatou laei, ae tatau ona mamā, matagofie i le vaai, ma ia onomea. E tatau foi ona faafou lelei o tatou seevae ma ia foliga lelei atu. E faapena foi i sauniga uma lava, e aofia ai ma le Suesuega Tautusi a le Faapotopotoga, e tatau ona mamā o tatou tino, ma e tatau ona tatou teuteu lelei ma ia laei talafeagai.”
3 O le vave auai a o lei amataina o se tasi lea o faailoga o le manatu alofa ma le magafagafa. I nisi taimi, o ni tulaga lē maalofia e ono taofia ai i tatou mai le taunuu i le taimi tonu mo se sauniga. Ae o le fai ma masani le tuai atu, e ono faaalia ai le lē faaaloalo mo le fuafuaga paia ua faia ai sauniga ma le lē talisapaia o lo tatou tiute tauave ina ia alofia le faalavelave i isi. O le tuai mai e masani ona faatosina ese ai isi ma lē mafai ai ona latou maua atoatoa aogā mai le polokalame. O le vavevave atu a o lei amata, e faaalia ai le faaaloalo mo faalogona ma mo le lelei o i latou uma o loo auai.
4 O le alofa mo o tatou tuaoi e ao ona tatou faaeteete ai e alofia le faatosina ese o tagata a o faia sauniga. O le taumusumusu, aai, lamu pulu, faagasē pepa, ma le alu soo i le faleese e aunoa ma ni mafuaaga tatau, e mafai ona avea ma faalavelave i le uaʻi atu o isi ma lē tuuina atu ai le faaaloalo e tatau mo le nofoaga o le tapuaiga ia Ieova. E lē talafeagai foi mo so o se tasi ona faia se pisinisi faalefaapotopotoga pe talanoa ma isi seʻi vaganā ua iai se manaoga faafuasei e tatau ai ona tulai ese uso mai o latou nofoa. Auā e tatau lava i tagata uma ona nonofo ma faalogologo i le polokalame ina ia maua ai ni aogā mo i latou lava ma o latou aiga. O masaniga lē tatau, e lē talia i le Maota o le Malo auā o le “alofa . . . e le amio mataga.”—1 Kori. 13:4, 5; Kala. 6:10.
5 O amio lelei a a tatou fanau i sauniga e viia ma faamamaluina ai foi le suafa o Ieova. E matuā tāua foi le vaavaaia lelei o fanau e mātua. E tatau ona faalaeiauina fanau e faalogologo ma ia fai se sao. E toatele mātua e iai fanau laiti e mananao e nonofo i se nofoaga e faigofie ai ona ō ese mo manaoga o a latou fanau laiti e aunoa ma le faalavelave ai fua i isi.
6 Na apoapoai mai Paulo: “Tau ina ia tusa la outou amio ma le tala lelei ia Keriso.” (Fili. 1:27) Seʻi o tatou taumafai loa la e amio lelei ma magafagafa mo isi pe a auai i sauniga. O le felagolagomai o tagata uma, o le a faamautinoa ai lo “tatou fefaamafanafanai i lo tatou faatuatua.”—Roma 1:12.