Ia Faailoa atu Lou Agaigai i Luma
1 Seʻi manatu i tuā i le taimi na faatoʻā e faalogo ai i le feau o le Malo. O upu moni faigofie na faagaeeina ai lou naunau mo le poto ma le malamalama. E lei umi lava se taimi ae ua mafai ona e iloa e manaomia ona faia ni suiga i le auala o loo e ola ai, auā o ala o Ieova e sili atu ona maualuluga i lo o ou ala. (Isa. 55:8, 9) Na faaalia lou agaigai i luma, tuuina atu lou ola, ma papatisoina oe.
2 E ui lava i lou alualu i luma faaleagaga, ae sa iai pea ni vaivaiga na sa manaomia ona foia. (Roma 12:2) Atonu sa ia te oe le fefe i tagata, na māfua ai ona e faatalatu e auai i le auaunaga i le fanua. Pe atonu sa lē taulau ona e faaalia fua o le agaga o le Atua. Nai lo o lou nofoaʻi, sa e filifili e faia se agaigai i luma e ala i le faataatitia o ni sini faaleatua mo oe lava.
3 Atonu ua mavae atu nei ni tausaga talu ona faia lou tuuina atu. Pe a toe tepa i tua, o le ā se agaigai i luma o mafai ona e iloa ia te oe lava? Po ua mafai ona e faataunuuina nisi o ou sini? Po o tutusa lou maelega e pei ona “sa iai i le amataga”? (Epe. 3:14) O Timoteo o se Kerisiano taʻumatuaina sa iai lona poto masani mo le tele o tausaga i le taimi na uunaia ai o ia e Paulo e faapea: “Ia e mafaufau i ia mea, ia e faamasani ai; ina ia iloa ai e tagata uma o oe o le alualu [“lou agaigai i luma,” NW].”—1 Timo. 4:15.
4 E Manaomia se Iloiloga Totino: Pe a tatou mafaufau loloto i o tatou ala tuai, po o tatou iloa ai o loo iai pea nisi o vaivaiga ia sa iai ia i tatou i le taimi ua mavae ina ua tatou faatoʻā amata? Po ua lē taulau ona tatou ausia nisi o sini na tatou faataatitia? Afai o lea, aisea? E ui lava na iai ni o tatou faanaunauga lelei, ae atonu ua tatou faimea tuu. Atonu ua tatou faatagaina popolega o le olaga po o omiga o lenei faiga o mea e taofia ai i tatou.—Luka 17:28-30.
5 A o itiiti ni mea e mafai ona tatou toe faia e uiga i aso ua mavae, e mautinoa lava e mafai ona tatou faia ni gaoioiga mo le lumanai. E mafai ona tatou faia se iloiloga faamaoni o i tatou lava, ia iloa ai po o fea le itu o tatou lē taulau ai, ona faia lea o se taumafaiga maumauai ina ia faaleleia. Atonu e manaomia ona tatou faaleleia atili le faaalia o fua o le agaga o le Atua, e pei o le pulea totino, agamalu, po o le onosai. (Kala. 5:22, 23) Afai e faafaigata ia i tatou ona faifai mea faatasi ma isi pe felagolagomai ma toeaina, e tāua tele lo tatou atiina aʻe o le agamalu ma le loto maulalo.—Fili. 2:2, 3.
6 Pe e mafai ona faaalia lo tatou agaigai i luma e ala i le aapa atu mo ni faaeaga i le auaunaga? I le faia o ni taumafaiga faaopoopo, o le a mafai ai ona taʻuagavaaina uso e avea ma auauna o le faiva po o ni toeaina. O nisi o i tatou e mafai ona avea o ni paeonia sauatoa. Mo le isi toatele, e mafai ona avea le paeonia lagolago o se sini e mafai ona ausia. Atonu o tauivi nisi mo le faaleleia o la latou masani o le faia o suesuega totino, ma sogasogā e auai i sauniga a le faapotopotoga, pe ia fuatele mai i le avea o ni tagata talaʻi o le faapotopotoga.
7 O le mea moni, o le tagata lava ia e vailiiliina po o fea le itu o manaomia ona faia ai se agaigai i luma. E mafai ona tatou mautinoa o a tatou taumafaiga faamaoni ia ‘agaigai i luma i le taumatuaina,’ o le a faaopoopo i lo tatou olioli tele ma avea ai i tatou o ni sui e fuatele mai o le faapotopotoga.—Epe. 6:1.