Toe Foi atu ina ia Faaolaina Nisi
1 O le finagalo o le Atua “ina ia faaolaina o tagata uma lava, ma ia oo ina iloa lelei le upu moni.” (1 Timo. 2:4) O le ā se mea e mafai ona tatou faia e fesoasoani atu ai? Ia faia toe asiga ma le sini e aʻoaʻo atu le upu moni. O le ā sau tala o le a fai atu? O fautuaga nei atonu o le a fesoasoani ia te oe.
2 Pe a e toe asiasi atu i se tasi na talia le tusi, “Laʻu Tusi o Tala o Le Tusi Paia” e mafai ona e toe faasino atu i le ata i le itulau e 71 ma fesili atu i lē ona le fale:
◼ “Ina ua uma se iloiloga atili o le tusi lea na ou tuua ia te oe, ma mafaufau i le folafolaga a le Atua e uiga i se lalolagi parataiso, o le ā sou lagona e uiga i nei folafolaga ofoofogia ua faia e le Atua mo le tagata?” Pe a uma ona faamālō i le tali a lē ona le fale ma fai i ai se faamatalaga puupuu, e mafai ona e tataʻi le manatu o lē ona le fale i le Isaia 11:6-9 ma le Faaaliga 21:3, 4.
3 Afai na e tuua lē ona le fale e mafaufau i le pogai ua faataga ai e le Atua le amio leaga, pe a e toe foi atu la, e mafai ona amata le talanoaga i lou faapea atu:
◼ “Sa ou fiafia lava i le ta talanoaga i le taimi muamua na ta feiloai ai, ma ua ou manao lava ou te toe foi mai e fia iloa po o le ā sou lagona e uiga i le pogai ua faapalepale ai pea le Atua i tulaga fesouaiina ma faiga sauā ia o loo iai i le lalolagi i aso nei. [Faatali mo se tali. Suʻe ma faitau le 2 Peteru 3:8, 9.] Ae o ā mea a le Atua o faia i lenei taimi? Atonu e mafai ona ta talanoa i le tali o lena fesili i le isi aʻu asiasiga.”
4 Atonu o e tuliloa sē na tuu i ai se tamai tusi o “Lenei Tala Lelei o le Malo,” i lou faafeiloai atu e faapea:
◼ “I le uluai taimi na ou asiasi mai ai ia te oe, sa faagaeetia lava aʻu ona o lou popole i mea o loo tutupu i le lalolagi i aso nei. O le ola e pei ona tatou iai i nei aso e gata ai o le faiga amio leaga o mea, e tāua tele mo aiga ona nofo sauni pea mo le lumanai. E tusa ai ma lena itu, ua matou fautuaina malosi ai le faia e lē aunoa o ni talanoaga faale-Tusi Paia i aiga. Afai e te finagalo i ai, ou te fia faasino puupuu atu lava ia te oe le auala o loo talanoaina ai e nisi tagata le Tusi Paia o se aiga i o latou fale i atunuu e 200.” A lava le taimi, ia faaaogā manatu i lalo o le ulutala i le itulau e 24 e faataʻitaʻia ai le suesuega.
5 Pe e mafai foi ona e toe asia se tasi na tuu ai se tamai tusi i lou faapea atu:
◼ “Ua ou manao ou te toe foi mai e faailoa atili atu ia te oe e uiga i le fuafuaga a le Atua mo lenei lalolagi.” Suʻe i le palakalafa e 42 i le itulau e 24, faitau le Mika 4:3, 4, ona faamatala puupuu lea o le auala o le a faataunuu ai e le Malo o le Atua lenei folafolaga. Ofo i ai se suesuega faale-Tusi Paia e fai fua.
6 Ia manatua, o le sini i le faia o toe asiga, o le amataina ai lea o ni suesuega faale-Tusi Paia. O le tusi fou Le Poto e Taʻitaʻia ai i le Ola e Faavavau, ua fuafuaina faapitoa mo le faia ai o suesuega. Pe a tatou feiloai ma se tasi e tautala i le gagana faa-Peretania, o se mea lelei pe a faasino i ai lenei tusi fou. O le a tele lo tatou olioli pe a iloa e i latou o loo suesue ona valaau i le suafa o Ieova mo le faaolataga.—Galu. 2:21.