Faalauiloaina o le Upu Moni i Aso Fai Soo i le Faataʻitaʻi ia Iesu
1 Sa iai se galuega patino a Iesu sa tatau ona faataunuuina ina ua afio mai i le lalolagi. Sa maeu lava le faigofie o lenei galuega: ‘Ina ia molimau i le upu moni.’ (Ioa. 18:37) Sa ia faalauiloa le upu moni e faatatau i uiga ofoofogia ma fuafuaga a lona Tamā. O lea galuega sa pei o se meaʻai ia te ia; o lona soifuaga atoa sa faaautū i ai. (Ioa. 4:34) Na lipotia mai e Luka e uiga ia Iesu e faapea, sa “aʻoaʻo o ia i aso fai soo i le malumalu.” (Luka 19:47) Sa faaaogā atoatoa e Iesu taimi avanoa. (Ioa. 9:4) I se taimi a o toeitiiti lava maliu o ia, sa mafai ona ia folafola atu i lona Tamā e faapea: “Ua ou tuu atu le mamalu ia te oe i le lalolagi; ua ou faaumaina le galuega na e tuuina mai ia te au, ou te faia.”—Ioa. 17:4.
2 Pe a faatumulia o tatou loto i le talisapaia o mea uma ua faia e Ieova, ua faapena foi ona uunaia malosi ai i tatou e tautala atu pea i aso fai soo e uiga ia te ia. Ona avea ai lea o i tatou e pei moni lava o soo o Iesu o ē na folafola atu ma le faamalosi e faapea: “Auā ma te le mafaia ona le tautala i mea ua ma vaai i ai ma faalogo i ai.” (Galu. 4:20) Sa faaauau pea ona latou tautatala atu e uiga ia Ieova, auā ua taʻua i le faamaumauga e faapea “ua le mapu foi i latou i aso uma.” (Galu. 5:42) E tatau ona tatou fesili ifo ia i tatou lava, ‘Po o oʻu faaaʻoaʻo ea i loʻu Faiaʻoga, o Iesu?’
3 Talaʻi ma le Faanatinati: Na valoia e Iesu e faapea, pe a talaʻiina le feau o le Malo i le lalolagi uma, “ona oo mai ai lea o le gataaga.” (Mata. 24:14) E ao i lenei mea ona tamau ai i o tatou loto le tāua ma le faanatinati o la tatou galuega. Ona o loo lamatia moni ola o le faitau miliona o tagata, e leai lava la se isi mea e sili ona tāua pe aogā foi e tatau ona tatou faia. Talu ai ua tu lata atu lenei faiga o mea i lona faaiuga, ua faaitiitia ai foi le taimi o loo totoe e faaumaina ai lenei galuega!
4 Ua faaalia i lipoti e faapea, ua faavave ona fai e Ieova le aoaoina o ē pei ni mamoe. (Isa. 60:22) I le tele o vaega o le lalolagi, ua lolofi moni atu ai tagata i le upu moni, i le folafolaina atu ma le olioli, e tusa lava ua faapea atu: “Tatou te o ma outou; auā ua matou faalogo, o loo ia te outou le Atua”! (Saka. 8:23) Ua sili atu ona moni i aso nei nai lo o se isi lava taimi ua mavae, upu a Iesu e faapea: “E tele le saito e seleseleina, a o le au fai galuega e toaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” (Mata. 9:37, 38) Pe e lē faagaeeina ai ea i tatou e lena mea ina ia maelega e pei o soo o Iesu o ē “sa i le malumalu i latou e le aunoa, o latou o vivii atu i le Atua”?—Luka 24:53.
5 Ia Faailoa atu i Aso Fai Soo le Upu Moni: I aso uma lava, e tatau ona tatou vaavaai ai mo ni auala e taʻu atu ai le upu moni i isi. O loo iai pea avanoa. Pe e mafai ona e faaalu ni nai minute e te telefoni atu ai i se uo po o se tasi lua te masani, o sē e te lagona atonu o le a tali lelei mai? Ae faapefea le tusia o se tusi i se tasi sa lē mafai ona e maua atu i le fale? Po o e manatunatu ea i le ofoina o se sāvali i se faatauoloa pe a e alu e te faatau? E mafai foi ona faapena ona e manatunatu i le tele o isi avanoa e te maua i aso taitasi e faailoa atu ai lou faamoemoe i isi. Afai e te taumafai ma faaalia sina faamalosi, o le a fesoasoani Ieova ia te oe.—1 Tesa. 2:2.
6 O lea la, a o tatou amataina galuega o aso taitasi, e tatau ona tatou fesili ifo ia i tatou lava e faapea, ‘Po o le a ou tausolomua ea i le faailoaina atu o loʻu faamoemoe i se tasi pe afai e iai se avanoa i le asō?’ Faataʻitaʻi i le uiga o Iesu, o lē na faamatala mai le pogai na auina mai ai o ia i le lalolagi: “E tatau ona ou folafola le tala lelei o le malo o le Atua.” (Luka 4:43) Afai tatou te mananao ia pei o lo tatou Faiaʻoga, o le a tatou faia foi faapena.—Luka 6:40.