Po o E Pisi Naʻuā?
1 Na apoapoai mai Paulo ina ia ʻtele pea ni a tatou mea e fai i le galuega a le Alii.’ (1 Kori. 15:58) Ua uunaia i tatou ina ia tausisia se faasologa i aso taitasi mo suesuega totino, le auai e lē aunoa i le faiva, le auai ma le faamaoni i sauniga, ma le tausia ma le filigā o tofiga i le faapotopotoga. E faaopoopo i lena, e tatau ona tatou fesoasoani i isi o ē o manaomia la tatou fesoasoani. Ona o le tele naʻuā o mea e fai, atonu e lofituina ai i tatou i nisi taimi, ma manatu ai e tatau ona tatou vaavaai mo ni auala e faaitiitia ai la tatou avega o galuega.
2 E iai tulaga e mafai ona avea ai o se auala atamai ma magafagafa le soloia pe faaitiitia foi nisi o galuega. Ua manatu nisi e faapea, ua faatalitalia i latou e faia mea uma ua talosaga atu nisi ia i latou e faia. O le lē paleni e tusa ai o lenei itu, e mafai ona aumaia ai omiga ma mafatiaga e ono mafai ona oo ai i se tulaga leaga.
3 Ia Paleni Lelei: O le manaoga autū mo le tulaga paleni lelei, o loo iai i le faatatauina o le fautuaga a Paulo ina ia “mautinoa i mea e sili ona tāua.” (Fili. 1:10, NW) O le uiga o lena mea, o lo tatou uaʻi atu i mea e tāua moni ma, pe a lava le taimi ma tusa ai ma tulaga, ona fai lea o nisi mea e faalētāua. O matafaioi faaleaiga e mautinoa e sili ona maualuga atu i isi mea e tāua. E iai nisi o tiute tauave masani e manaomia ona faia. Ae peitai, na aʻoaʻo mai Iesu e faapea, o mea e tatau ona tatou faamuamuaina, e ao ona faavae aʻe i le mataupu silisili e faapea, ia tatou muai saili le Malo. E tatau ona tatou muai faia mea e maua ai lo tatou avanoa e faataunuuina ai lo tatou tuuina atu ia Ieova.—Mata. 5:3; 6:33.
4 I le manatuaina o lenei mea, o le a tatou faamautinoa ai ua aveesea mai la tatou faasologa feomaʻi nisi o sini totino e lē tāua, le soona faaalu o le taimi i faafiafiaga ma tafaoga, ma le faia o ni folafolaga lē tatau e faia ni mea mo isi. I le fuafuaina o a tatou gaoioiga mo vaiaso taitasi, o le a tatou faataatia ese ai se taimi ina ia lava ni a tatou suesuega totino, faia ai se sao talafeagai i le auaunaga, auai i sauniga, ma so o se isi lava mea e fesootai atu ma la tatou tapuaiga. O le taimi e totoe ai, e mafai ona vaevae e faia ai isi mea, e faalagolago i le tele e mafai ona lagolagosua ai na mea i le ausiaina o lo tatou sini tāua o le avea o ni Kerisiano e paleni lelei o ē e faamuamua pea le Malo.
5 E ui lava i le faia o na mea, atonu e iai pea ia i tatou le lagona, e faigata la tatou avega. Afai o lea, e manaomia ona tatou tali atu i le valaau a Iesu: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou.” (Mata. 11:28) Ia vaavaai atu foi ia Ieova, ʻo lē na te aveina avega mo i tatou,’ ma avatu le malosi i lē ua vāivai. Ua ia folafola mai e faapea, na te lē tuua lava lē amiotonu ia tautevateva. (Sala. 55:22; 68:19; Isa. 40:29) E mafai ona tatou mautinoa, o le a taliina mai a tatou tatalo, ma mafai ai ona tatou filigā i le faia o se olaga tiotio i galuega faatiokarate.
6 A o tatou faamautinoa le faateleina pea o mea tatou te faia i le tuliloaina o ni faanaunauga aogā o le Malo, e mafai ona tatou olioli i le iloa e lē o faaleaogaina la tatou galuega ma le tautiga i le Alii.—1 Kori. 15:58.