Faaaʻoaʻo i lo Latou Faatuatua
1 Ua faamatalaina e le aposetolo o Paulo le faatuatua e faapea, “o le faatalitali ma le mautinoa i mea ua faamoemoe i ai, o le faatinoina ma le mautinoa o mea moni e ui e lē o vaaia.” (NW) Na ia faaopoopo mai, “a leai foi se faatuatua e le mafai ona fiafia mai o ia [le Atua].” (Epe. 11:1, 6) Na uunaia i tatou e Paulo ina ia faaalia le faatuatua, ia faateleina, ma ia tausisi iai.—2 Kori. 4:13; Kolo. 2:7; 2 Timo. 2:22.
2 E tele faaaoaoga mataina o le faatuatua ua toe taʻua i le Tusi Paia. I le Eperu mataupu e 11, ua aumaia ai e Paulo se lisi umi o molimau o ē na faaalia le faatuatua lē masuia. E aofia ai i lenei lisi ia Apelu, o le uluai tagata na maliu faamaturo ona o lona faatuatua. Ua taʻua Noa i le lisi auā o lona faatuatua na ia faaalia ai le mataʻu i le Atua lea na manaomia ina ia faasaoina ai lona aiga. E faamālō foi ia Aperaamo i lona faatuatua ma le usiusitai. Ua viiviia Mose ona o lona faatuatua na faaauau ai ona ia tumau e pei o vaai atu i Lē e lē o vaaia. E matuā umī lava le lisi o faaaoaoga, o lea na faapea mai ai Paulo, e lē lava le taimi pe afai e faaauau ona ia faamatala mai i latou uma. Maeu la lo tatou loto faafetai ona ua mafai ona faamalosia lo tatou faatuatua i le toe autaluina o a latou “gaoioiga o le amioatua ma galuega o le tuutoina i le Atua”!—2 Pete. 3:11, NW.
3 I le uluai senituri, na lagā ai e Iesu le fesili e faapea: “A sau le Atalii o le tagata, pe maua ea e ia le faatuatua i le lalolagi?” (Luka 18:8) O lea la, po o iai ea ni faaaoaoga olaola o le faatuatua o ia i tatou i aso nei? Po o tatou vaaia ea ni tane ma fafine, o ē matutua ma ē talavou, o loo faaalia le faatuatua lē maluelue ia Ieova e pei ona faia e tagata o le Atua i taimi o le Tusi Paia?
4 Faaaoaoga o le Faatuatua i Aso Nei: O loo maua faaaoaoga mataina o le faatuatua i mea uma o loo siomia ai i tatou! O le faatuatua o ovasia o ē o loo taʻimua ia i tatou e aogā ona faaaʻoaʻo i ai. (Epe. 13:7) Ae e lē ona pau ia o i latou o loo fai ma faaaʻoaʻo o le faatuatua. O loo iai i faapotopotoga uma tagata faamaoni o ē ua loa tausaga o auauna faamaoni ia Ieova, e masani lava ona faatinoina a o fetaiai ma tulaga faigata.
5 E tatau ona tatou viiviia o tatou tuafāfine faamaoni o ē na onosaia mo le tele o tausaga teteega mai a latou tane tetee. O mātua taitoatasi o ē sa faafesagaia le luʻi o le tausia aʻe toatasi o le fanau. O loo iai ia i tatou fafine matutua ua oti a latou tane o ē e lē tāitai ona misia gaoioiga a le faapotopotoga e ui lava atonu e leai nisi o le aiga e fesoasoani ia i latou. (Faatusatusa i le Luka 2:37.) Tatou te maofa i le faatuatua o i latou na onosaia faafitauli faaumiumi o le soifua maloloina. E toatele o loo faaauau pea ona auauna faamaoni e ui lava ina iai tapulaa e ono taofia ai i latou mai le tofia atu i ai o ni faaeaga faaopoopo o le auaunaga. E iai foi Molimau talavou o ē ua faaalia ma le lototele le faatuatua e ui lava i teteega i le aʻoga. E tupu malosi lo tatou tuutoina i le Atua a o tatou mātauina paeonia faamaoni o ē e finafinau i lea tausaga ma lea tausaga i le feagai ai ma faafitauli e lē mailoa. I le pei lava o Paulo, o le a lē lava so tatou taimi pe a tatou taumafai e faamalau uma atu mea na tutupu i le auaunaga o le Malo ma gaoioiga o le faatuatua ua faia e nei uso ma tuafāfine!
6 O nei faaaoaoga a ē faatuatua ua faamafanafanaina ma faalaeiauina ai i tatou. (1 Tesa. 3:7, 8) E lelei ona tatou faataitai i lo latou faatuatua auā ʻe fiafia Ieova i ē gaoioi i le faatuatua.’—Faata. 12:22.