Aua le Mapu i le Folafolaina Atu o le Tala Lelei
1 Sa matuā manatu mamafa uluai Kerisiano i la latou faiva. Na lipotia mai e Luka e faapea: “Ua le mapu foi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei ia Iesu le Keriso.” (Galu. 5:42) E matuā leai lava se mea na mafai ona taofia i latou, e oo lava i sauāga! (Galu. 8:4) Sa latou talanoa atu i isi e uiga i le upu moni i aso uma.
2 Ae faapefea i tatou? Fesili ifo ia te oe lava: ‘Po o logo i oʻu tino le faanatinati o le taimi? Po o oʻu faanaunau ea e faaauau ona folafola atu le tala lelei ma le lē mapu?’
3 Faaaoaoga i Ona Po Nei o le Talaʻi ma le Lē Mapu: O se tasi tuafafine e maua i le maʻi pipili, sa ola o ia i totonu o se masini lapoa e faamanava ai. Sa lē mafai ona alu o ia i le Maota o le Malo pe auai i se fonotaga. Ae sa matuā aafia atoatoa o ia i le folafolaina atu o le tala lelei. I le faagasologa o le 37 tausaga na ola ai o ia i totonu o le masini e faamanava ai, sa mafai ona ia fesoasoani atu i tagata e toʻa 17 e aʻoaʻoina le upu moni! Na faapefea ona ia faia o lea mea? E ui e lē mafai ona ia alu atu mai lea fale i lea fale, ae sa ia maua se auala i aso taitasi e molimau lē fuafuaina atu ai ia i latou sa ō mai ia te ia.
4 O o tatou uso i Bosnia o loo fesagai pea ma taua ma le lē tagolima. Ae peitai, e faaauau pea ona latou talaʻi atu i isi. I Sarajevo, e tusa ma le 20 itula a le tagata talaʻi i masina taitasi e talanoa atu ai i isi e uiga i le tala lelei, ma e latou te faia e tusa ma le lua suesuega faale-Tusi Paia a le tagata e toatasi. E ui i o latou tulaga matautia, ae sa lē mapu i latou i le talaʻi ma le aʻoaʻo atu.
5 E faaalia foi e le ʻau talavou le maelega mo le faiva. O se aiga Molimau i Rwanda na tuu i se potu sa iai fitafita na nofo sauni e fasiotia i latou. Na talosaga le aiga mo se faatagaga e faia ai muamua se tatalo. Na talia lenei talosaga, ma na tatalo leotele ai se afafine laitiiti, o Tepora e faapea: “Ieova e, i le vaiaso lenei, na ma tufaina atu ai ma Papa ni mekasini se lima. O le a faapefea ona ma toe foi atu e aʻoaʻoina nei tagata i le upu moni ma fesoasoani ia i latou ia maua le ola?” Ona o le malosi o lona faatuatua ma lona matuā naunau i le faiva, na faasaoina ai le aiga atoa.
6 I aso nei, o loo iai se manaoga ina ia vaavaai mo ni avanoa e molimau atu ai i isi ma saili ia i latou “ua saunia mo le ola e faavavau.” (Galu. 13:48, NW) E tusa ai ma tulaga i le atunuu, e faia ai e toeaina o le faapotopotoga ni fuafuaga mo le molimau atu a vaega i taimi talafeagai, pe i taeao, aoauli, po o afiafi. O mataupu i La Tatou Faiva o le Malo ma vaega i Sauniga o le Auaunaga, fonotaga matagaluega, ma tauaofiaga itumalo, ua maua ai ni fautuaga ma faalaeiauga talafeagai e fetufaai ai i auala eseese o le molimau atu e uiga i le Malo. E faaopoopo i lenei, e tolenia e ovasia matagaluega ma itumalo le ʻau talaʻi i le molimau atu i ala tetele, e faaalia ai le auala e galueaiina ai oganuu o pisinisi, ma faasino mai ai foi isi auala e molimau atu ai i so o se mea e maua ai tagata. O nei mea uma ua faamamafa mai ai le aua le mapu i le folafolaina atu o le tala lelei!
7 Na folafola atu ma le lototetele e aposetolo o Iesu e faapea: “Ma te le mafaia ona le tautala i mea ua ma vaai i ai ma faalogo i ai.” Na faapefea ona latou finafinau e ui lava i na toatuga uma? Sa latou talosaga atu ia Ieova e fesoasoani ia i latou, ma na ia faia faapea, ma “ua tutumu foi i latou uma i le Agaga Paia, ma ua tautala atu i le afioga a le Atua ma le loto tele.” (Galu. 4:20, 29, 31) Atonu e lē faamanuiaina tagata uma i ni mea mataina e tutupu i le faiva, ae afai e tatou te faanaunau moni e folafola atu le tala lelei ma le lē mapu ma pe afai tatou te faia ni taumafaiga e faia faapea i aso taitasi, o le a fesoasoani Ieova ia i tatou.