Po o E Vaevaetonuina le Afioga a le Atua?
1 O Iesu Keriso sa avea o se faiaʻoga silisili o ē uma na soifua i le lalolagi. Sa ia aʻoaʻo i se auala na pāʻia ai loto o tagata, faagaee ai o latou faalogona, ma uunaia ai i latou e faatinoina galuega lelei. (Mata. 7:28, 29) Sa ia faaaogaina pea le Afioga a le Atua e avea o se faavae mo ana aʻoaʻoga. (Luka 24:44, 45) Sa ia tuuina atu le viiga ia Ieova le Atua mo mea uma na ia silafia ma mafai ona aʻoaʻo atu. (Ioa. 7:16) Na faataatia e Iesu se faaaoaoga aupito sili ona lelei mo ona soo e ala i le vaevaetonuina o le Afioga a le Atua.—2 Timo. 2:15, LT.
2 Na avea foi le aposetolo o Paulo o se faaaoaoga mataina e ala i le taulimaina ma le uigā o le Afioga a le Atua. Sa ia faia e sili atu nai lo o le na ona faitau atu o mau mai le Tusi Paia i isi; sa ia faamatala ma fefulisai mea na ia faitauina, ma faamaonia mai le Afioga a le Atua e faapea o Iesu, o le Keriso. (Galu. 17:2-4) E faapena foi i le soo mauupu o Apolo, sa “poto i Tusi,” ma sa ia vaevaetonuina le Tusi Paia e ala i le taulimaina ma le uigā o le upu moni—Galu. 18:24, 28.
3 Ia Avea ma Faiaʻoga o le Afioga a le Atua: Ua olioli ē folafola le Malo i aso nei ona ua sili atu ona taulau manuia i le aʻoaʻoina o tagata loto faamaoni e ala i le faasino atu i le Tusi Paia ma talanoa atu mai le Tusi Paia. I se tasi mea na tupu, na mafai e se uso ona faaaogā le Esekielu 18:4 faatasi ma isi mau e fesootai i ai e faia ai se talanoaga uigā ma se faifeau ma ni sui se toatolu o lana aulotu e faatatau i le iuga o ē amio leaga ma ē amiotonu. O le iuga, na amata ai ona suesue nisi tagata o le lotu, ma iu ina talia ai e le toatasi o i latou le upu moni. I se isi mea na tupu, na talosagaina se tuafafine e faamatala atu i le tane tetee a se tagata loto fiafia le mafuaaga e lē faamanatuina ai e Molimau a Ieova le Kirisimasi ma aso fanau. A o ia faitauina saʻo tali faale-Tusi Paia mai le tusi Reasoning, sa ioeina e le tamaloa. Sa matuā fiafia lana avā i lona taliaina o nei tali, o lea na ia faapea atu ai: “O le a ma ō atu i a outou sauniga.” Ma sa malie i ai le tane!
4 Faaaogā le Fesoasoani o Loo Iai: Ua ofoina mai e La Tatou Faiva o le Malo ma le polokalame o le Sauniga o le Auaunaga taʻiala lelei e fesoasoani ai ia i tatou i le taulimaina o le Afioga a le Atua. E toatele tagata talaʻi ua faaalia le talisapaia mo taulimaga eseese ua lomiaina ma ua faataitaia mo lo tatou lelei, ma ua faamaonia le aogā ma le matuā fetaui lelei mo aso nei. O loo i le tusi Reasoning From the Scriptures le anoanoai o manatu e faatatau i le auala e faamalamalama saʻo ai le sili atu i le 70 mataupu autū na o loo faamatalaina mai i le Afioga a le Atua. O le tusi o Le Poto e Taʻitaʻia ai i le Ola e Faavavau, ua saunia ai se aotelega tuusaʻo o aʻoaʻoga faavae uma lava o le Tusi Paia e manaomia ona malamalama i ai tagata fou. O le suesuega e 24 ma le 25 i le Theocratic Ministry School Guidebook, ua faailoa mai ai ia i tatou le auala e faatomua ai, faitau, ma faatatauina ai ma le tonu e faiaʻoga tomai, ia mau o le Tusi Paia. E tatau ona tatou faaaogā lelei nei fesoasoani uma o loo iai mo i tatou.
5 Pe afai tatou te vaevaetonuina le Afioga a le Atua, o le a tatou iloa ai ‘o loo ola, o loo matuā galue foi, ma o loo mafai ona vaevaeina ai e oo lava i manatu ma mafaufauga o loto’ o i latou o tatou talaʻi atu i ai. (Epe. 4:12) O le taulau manuia ua tatou olioli ai o le a uunaia ai i tatou e tautala atu i le upu moni ma le matuā faamalosi lava!—Galu. 4:31.