Pusa Fesili

◼ O ā faaeteetega e manaomia pe a tatou auaufaatasi ma se tasi o le isi ituaiga e tusa ai ma la tatou faiva?

E iai se mafuaaga e tatou te faatalitalia ai le faanaunau o o tatou uso ma tuafāfine e pipii mau atu i le tapulaa silisili ona maualuga tau amio e tusa ai ma a latou amioga. Ae peitai, o loo tatou ola i se lalolagi lē mamā ma le tuufau e laitiiti lava ni tapulaa tau amio. A o iai o tatou faanaunauga e sili ona lelei, e tatau ona tatou leoleomalu pea i tatou ina ia alofia le faapogaia o se faalumaina pe e aafia ai foi i se mea lē saʻo. E aofia ai i lenei le tatau ona faaeteete a o auai i le faiva.

I le auaunaga i le fanua, e masani lava ona tatou fetaui ma tagata o le isi ituaiga o ē e faaalia se uiga e foliga mai e naunau faamaoni i le upu moni. Pe afai e leai sau paga e te lua galulue i le talaʻiga, ma e leai foi se isi tagata o iai i le aiga, e masani lava ona sili atu ona lelei le avatu o le molimau a o tu i le faitotoa nai lo o le alu i totonu. Afai e faaalia le fiafia, e mafai ona fai se fuafuaga e toe asiasi atu pe afai e iai se isi tagata talaʻi e tatou te ō faatasi, po ua iai foi nisi tagata o le aiga. Afai e lē talafeagai lea fuafuaga, e sili ona atamai le tuu atu o le asiga i se tagata talaʻi o lena lava ituaiga e pei foi o lē ona le fale. E faatatau foi lenei mea i le faia o se suesuega faale-Tusi Paia ma se tasi o le isi ituaiga.—Mata. 10:16.

E manaomia ona tatou faaeteete pe a filifilia se tasi e tatou te galulue i le faiva. E ui lava atonu e mafai ona galulue faatasi tagata talaʻi o ituaiga eseese i nisi o taimi, ae sili ona lelei le faia o lenei mea a o galulue faatasi o se vaega. O le tulaga masani, e tusa lava pe galulue faatasi i le faiva, ae lē o se faiga atamai mo i tatou le faaalu o se taimi umi na o i tatou ma se tasi o le isi ituaiga e lē o sa tatou paaga faaipoipo. O lea, e tatau ai i le uso o taimua i le auaunaga a le vaega ona faautauta i le faia o le filifiliga lelei pe a tofiina le au talaʻi e galulue faatasi, e aofia ai ma talavou.

O le faaaogaina pea o le faautauta i le faia o filifiliga, o le a tatou alofia ai “le tuuina atu [o] se mea e tasi e tausuai ai” i tatou lava po o isi.—2 Kori. 6:3.