Molimau Atu i so o se Mea e Iai Tagata
1 I le iloaina o le vaega ua faia e le agaga o le Atua i lana faiva, na taʻua ai e le aposetolo o Paulo e faapea: ‘O le Atua na te faatupuina pea.’ Na ia faailoa mai foi e faapea: “O le au faigaluega i [tatou] faatasi ma le Atua.” (1 Kori. 3:5-9) O se faaeaga ofoofogia lenei. E mafai faapefea ona tatou faaalia atu i le lautele lo tatou talisapaia o le avea o se au faigaluega faatasi ma le Atua? E ala i le folafolaina atu o le tala lelei ia i latou uma o ē tatou te feiloai atu i ai i le galuega mai lea fale i lea fale, ma i so o se mea lava.
2 Ua poloaiina i tatou ina ia ‘fai tagata ma soo.’ (Mata. 28:19) Pe afai e tatou te ō atu i na o ni nai tagata pe a tatou auai i le faiva, e mafai ona tatou vave lagona le vāivāi ma faapea ai ua faataunuuina sina galuega itiiti. Ae i le isi itu, e sili atu ona tatou olioli i la tatou faiva pe a mafai ona tatou maua le toatele o tagata ma faia ai ni talanoaga ma i latou. E mafai ona avea lenei mea ma luʻi, talu ai e manaomia ia i tatou ona tausolomua le ō atu i so o se mea lava e iai tagata, ina ia mafai ai ona tatou faafeiloai atu ia i latou.
3 Faaaoaoga Aogā: E mafai ona tatou molimau atu i tagata i maketi, paka, nofoaga e mālōlō ai i le auala, ma nofoaga e faataunuu i ai faigamalaga. Pe a e tietie i auala o faimalaga ai le lautele, pe e te nofo sauni e avatu se molimau a o alu le faigamalaga? A o tietie atu ni Molimau se toalua i se pasi feomai i la latou faatasiga mo le auaunaga, na la faia se talanoaga e uiga i le ata o le Parataiso i le tusi o Le Poto, i le talanoaina o folafolaga a le Atua mo le lumanai. E pei ona la mananao ai ina ia faia faapea, sa faalogologo atu i ai se tama talavou sa tū ai i tafatafa ma na maofa i mea na ia faalogo i ai. A o lei alu ese mai le pasi, na ia talia se tusi ma talosaga atu ina ia asiasi atu se tasi i lona aiga.
4 E toatele le au talaʻi ua maua le olioli i le faia o le molimau atu lē fuafuaina. Na alu atu se tasi tuafafine i le nofoaga e fai ai faatauga i le aai i se tasi aoauli ma talanoa atu i tagata o ē ua uma ona fai a latou faatauga ae e lē o foliga mai e ō faanatinati. Sa ia tufaina atu uma ana lomiga sa iai i lana ato. Sa fiafia se tasi tamaloa sa faatali i lana taavale ina ua maua ni mekasini mai le tuafafine. Sa auai muamua o ia i sauniga, ma na toe faagaee i la laua talanoaga le fiafia o le tamaloa.
5 O se faaeaga le faasilisiliina o le suafa o Ieova. E ala i le faaalia o lo tatou maelega mo le galuega talaʻi, ua tatou faailoa atu ai tatou te lē o melea le fuafuaga o le alofa tunoa o le Atua ia i tatou. Talu ai o le ‘taimi sili lenei ona lelei’ e fesoasoani atu ai i isi, seʻi o tatou ō atu i so o se nofoaga e iai tagata ma molimau atu ia i latou e uiga i le “aso e faaolaina ai” e Ieova—2 Kori. 6:1, 2.