Maua Aogā Silisili Mai Aʻoga
1 E toatele talavou e fesili mai: “Pe tatau moni lava ona ou alu i le aʻoga?” E ui lava e iai nisi o luʻi ma popolega e fesootai atu i le auai i le aʻoga, ae e tele foi aogā e maua e talavou o loo matuai finafinau ina ia mauaina aogā silisili mai a latou aʻoaʻoga.
2 O le lelei o se faavae tau aʻoaʻoga e mafai ona saosaolaumea i le agaigai i luma faaleagaga o se tasi. E tele se aafiaga o mea e faia e se tasi a o talavou i mea na te ausiaina pe a oo ina matua. E oo foi i aʻoga, ‘o le mea e luluina e le tagata, o le mea lava lea e seleseleina mai e ia.’ (Kala. 6:7) O talavou e toaaga e suesue i a latou mataupu i aʻoga e mafai ona latou mauaina tomai ia o le a sili atu ona latou aogā ai mo Ieova.
3 E manaomia le manatunatu lelei ina ia filifilia saʻo ai e se tasi ana mataupu tau aʻoaʻoga. E ao i mātua ona fesoasoani i a latou fanau e filifili mataupu e sili ona aogā ina ia ausiaina sini faaleagaga i le olaga. I le ati ae o lo latou tomai, o le a aogā i talavou e tausia ai i latou lava i le galuega faapaeonia. O la latou aʻoaʻoga faavae e ao ona fesoasoani ia i latou ina ia vivii atu ia Ieova e tusa lava po o fea o loo auauna ai.
4 Talavou e, ia taumafai e maua aogā silisili i taimi o a outou aʻoaʻoga. A o faia faapea, ia taulai atu i se olaga uigā ma faamalieina i le auaunaga paia, nai lo le sailiili atu i se galuega faalelalolagi. Ia finafinau e faaaogā lou olaga e fai aʻi le finagalo o Ieova. I le faia faapea, o le a e faataulauina ai ou ala, mo le viiga o Ieova.—Sala. 1:3.