Auai i Sauniga “Ia Atili ai Foi Ona Faapea”
1 O le faapotopoto faatasi, e masani pea lava ona matuā tāua i tagata o Ieova. Sa iai le malumalu ma sunako mo tagata Isaraelu e fai ma nofoaga autū o le tapuaiga moni, o aʻoaʻoga tauatua, ma aufaatasiga olioli. Sa faapena foi i uluai Kerisiano ona lei tuulafoaiina le faapotopoto faatasi. A o faateleina omiga ma sauāga i nei aso faigata e gata ai, e manaomia ai foi e i tatou le faamalosiau faaleagaga lea ua saunia i a tatou sauniga a le faapotopotoga—ma e tatou te matuā manaomia ‘atili ai foi ona faia faapea.’ (Epe. 10:25) Mātau mafuaaga e tolu e tatau ai ona tatou auai i sauniga.
2 Mo le Aufaatasiga: Ua apoapoai mai le Tusi Paia ia i tatou ina ia “fefaamafanafanai ma ia atiina ae e le tasi le isi.” (1 Tesa. 5:11, NW) O aufaatasiga faale-Atua e faatumuina ai o tatou mafaufau i manatu e atiina ae ai ma uunaia ai i tatou e faia galuega lelei. Ae afai e tatou te faaesea i tatou lava, o le a tatou lolo atu la e talia mafaufauga valea, manatu faapito, pe oo ai lava i manatu e lē mamā.—Faata. 18:1.
3 Mo le Aʻoaʻoina Ai: O sauniga faa-Kerisiano, ua saunia ai se polokalame faifai pea o aʻoaʻoga faale-Tusi Paia ua fuafuaina ia manatua ai pea i o tatou loto le alofa i le Atua. Ua aumaia ai ia taiala aogā i le faatatauina o “le finagalo uma o le Atua.” (Galu. 20:27) O sauniga ua toleniina ai i tatou i le tomai o le talaʻi ma aʻoaʻo atu le tala lelei, o tomai ua sili atu ona manaomia atili i le taimi nei ina ia tofo ai i le olioli e lē mafaamatalaina o le sailia ma le fesoasoani atu ia i latou o le a talia le upu moni o le Tusi Paia.
4 Mo le Puipuiga: I lenei lalolagi leaga, ua avea ai le faapotopotoga ma maluapapa moni faaleagaga—se mapusaga o le filemu ma le alofa. Pe a tatou auai i sauniga a le faapotopotoga, o le a iai se taaʻiga malosi a le agaga paia o le Atua ia i tatou, ma fuaina mai ai le fua o ‘le alofa, le olioli, le filemu, le onosai, le mataalofa, le agalelei, le faamaoni, le agamalu, ma le pulea totino.’ (Kala. 5:22, 23) O sauniga e faamalosia ai i tatou ina ia tutū mausalī, ma ia mauaa i le faatuatua. Ua faaauupegaina ai i tatou ina ia nofo sauni mo puapuaga o loo fotuai mai.
5 E ala i le auai e lē aunoa i sauniga, tatou te tofo ai i le mea ua faamatalaina e le faisalamo, e pei ona faamauina i le Salamo 133:1, 3: “Faauta, o le mea e matuā lelei ma le matagofie lava, pe a nonofo faatasi lava o uso.” I so o se mea lava e auauna ma faapotopoto ai tagata o le Atua i aso nei, ‘o iina ua poloai Ieova ia oo i ai lana faamanuia, o le ola lava lea e faavavau.’