Polokalame Fou o le Aso Faapitoa o Fonotaga

O le sauniuniga o aso faapitoa o fonotaga, na amata i le 1987. O nei faatasitasiga mo le aso e tasi, ua faamaonia le avea o se mea e atiina ae ai mo auauna a Ieova ma ē naunau fiafia o loo auai. E amata atu ia Setema 1998, o le a tuuina atu ai se polokalame fou o le aso faapitoa o fonotaga. O le a outou maua ai aogā faaleagaga mai lauga e iva ma le tele o faatalanoaga ma tala i mea tutupu.

O le matua o le polokalame fou e faapea: “Ia Faaalia le Talisapaia mo le Laoai a Ieova.” (Isa. 65:14; 1 Kori. 10:21) O le a faamalosia ai la tatou faaiuga e faapea, o la tatou tapuaiga ia Ieova e tatau ona faamuamua i o tatou olaga. (Sala. 27:4) O le lauga a le ovasia matagaluega, o le a feagai ma le mataupu, “Iloiloina Mafaufauga o o Tatou Loto” e faatatau i le auai i sauniga. O le a faailoa mai ia i tatou e se failauga asiasi pe faapefea ona “Tausisia le Tulaga Faaleagaga e Ala i le Fafagaina i le Laoai a Ieova.” O le a aumaia ai foi ni faalaeiauga aogā i tagata talavou i le faalapotopotoga a Ieova ina ia tutū mausalī i le auaunaga a le Atua. O le matua o le lauga autū a le failauga asiasi e faapea, “Ua Faamalosia Faaleagaga e Avatu se Molimau Lototele,” o le a faaalia ai po ua faapefea i sauniuniga ua faia e auala mai i le faapotopotoga ona faaauupegaina ai i tatou ina ia molimau atu ma le lototele e uiga i le Malo. O ai sē o le a lē manao ina ia maua ni aogā mai lenei polokalame?

O ē fou ua tuuina atu e mananao ina ia papatisoina, e tatau ona faailoa atu i le ovasia taimua i se vave e mafai ai. Matou te mautinoa e faapea, a o tatou amataina le lona 12 lenei o tausaga o le fuafuaga o le aso faapitoa o fonotaga, o le a faagaeetia ai faaleagaga i latou uma o le a auai mo le galuega o loo taatia mai i luma.