O Loo Silasila Alofa Mai ia i Tatou Lē Sili na Foafoaina i Tatou!
1 I lona taumafai e feutagai ma le nuu o Isaraelu lē usiusitai, na fesili ai Ieova: “E te le iloa ea? E te lei faalogo ai ea? O le Atua o le vavau, o Ieova o le na faia tuluiga o le lalolagi.” (Isa. 40:28) Ua tatou iloa Lē Sili na Foafoaina i tatou, ma ua tatou vaaia foi lana tausiga alofa ia i tatou. Ae peitai, e faitau miliona tagata o loo latou masalomia lona soifua pea pe ese lo latou silafia e uiga ia te ia e tusa ai ma mea o tusia i le Tusi Paia. E mafai faapefea ona tatou fesoasoani atu ia i latou?
2 O le tusi fou, Is There a Creator Who Cares About You? ua fuafuaina e fesoasoani atu ai i tagata faapena. E manaomia ai la i tagata mafaufau ona iloiloina mea moni o loo iai. O mataupu faatosina ma faamatalaga faatupu manatu i lenei tusi, e tatau ona faafiafiaina ai i latou o ē o faitau i ai.
3 Ia Faamasani i le Tusi Creator: Ia teu i le mafaufau se auivi faavae o mataupu o loo iai. O le mataupu e 2 e oo i le 5 o loo talanoaina ai le auala na māfua ai ona iai le vateatea, le ola, ma le iai o le tagata ma o ai na māfua ai ona iai nei mea uma. O le mataupu e 6 e oo i le 9 o loo talanoaina ai le Tusi Paia ma lona Tusitala, ae maise lava, pe faamata e maufaatuatuaina moni faamaumauga a le Kenese e uiga i le foafoaga. O loo aumaia i le mataupu e 10 se tali faamalie loto i se tasi o fesili e sili ona lavelave ua fesiligia e tagata e faapea: “Afai o silasila alofa mai Lē na Foafoaina Mea, aisea la ua tele naua ai mafatiaga?”
4 Taumafai e Feutagai ma i Latou o Ē Masalosalo: I le itulau e 78-79 o le tusi Creator, o loo aumaia ai se faasologa o faamatalaga aogā e mafai ona e faaaogā e fesoasoani ai i isi e faia se faaiuga saʻo e uiga i le Atua. Fesili atu faapea: “Pe sa iai se amataga o le vateatea?” E toatele o le a faapea mai, ioe, sa iai. Afai o lea, ona fesili lea i ai: “Po o lena amataga na teʻi lava ua iai, pe na iai se tasi na māfua ai ona iai?” E toatele ua iloa e faapea, e iai se tasi na māfua mai ai. O lenei faamatalaga ua mafai ona tatai atu ai i le fesili faaiu e faapea: “Po o le amataga o le vateatea na pogai mai i se mea e faavavau pe na māfua mai i se Tasi e faavavau?” O lenei faatomuaga e mafai ona tataʻi atu ai le toatele e iloa e faapea, e tatau ona iai Sē na Foafoaina Mea.
5 O le tusi Creator, o le tusi moni lava lea o loo manaomia e le toatele o tagata. Ia tufa atu i ou aiga, o ē tou te faigaluega faatasi, uo i le aʻoga, ma isi tou te masani. Alu ma ave ni tusi i le faiva ina ia mafai ai ona e tufa atu se tusi ia i latou tou te fetaui o ē o loo masalosalo e uiga i le iai o le Atua. O le tele o lo tatou faamasani lelei i lenei tusi, o le a oo ai foi ina faateleina le malosi o lo tatou alofa mo Lē na Foafoaina i tatou, ma uunaia ai i tatou ina ia faaauau ona savavali ia ogatusa ma ana tapulaa silisili ona maualuluga.—Efe. 5:1; Faaa. 4:11.