Le Faamanatuina i le Lalolagi Aoao o le Maliu o Keriso

¹ Ua faatamaoaigaina i tatou e Ieova i le tele o meaalofa. O iuga ua oo i ai ona o lona lelei ma le agalelei, o loo faamatalaina ma le olaola e faapea, o “lana mea[alofa] foai fua e le mafaamatalaina!” Ioe, o le “alofa tunoa o le Atua” e matuā ofoofogia, e matuā lē mafai e a tatou upu ona faamatalaina.—2 Kori. 9:14, 15.

² Lana Meaalofa Aupito Sili: I le avea o Iesu Keriso ma Togiola o le fanau a tagata, o se meaalofa aupito sili lea i mea uma lava. I le faaalia o lona alofa tele mo le lalolagi o le fanau a tagata, na auina mai ai e Ieova lona Alo pele e toatasi. (Ioa. 3:16) O sea faamanuiaga o le alofa tunoa mai le Atua, ua tatau ona faamanatuina i le lalolagi aoao. O afea ma e faapefea? I le afiafipo o le Aso Tofi, Aperila 1, 1999, o le a faamanatuina ai e Kerisiano i le lalolagi aoao le Talisuaga Afiafi a le Alii, e faamanatu ai le Faamanatuga o le taulaga aupito silisili o taulaga uma na faia.—1 Kori. 11:20, 23-26.

³ Na maliu Keriso mo i tatou e ui lava “ina tatou agasala pea,” ma e mafai ona tatou faaalia lo tatou lava loto faafetai e ala i le auai i le Faamanatuga o lona maliu ma e ala i le valaaulia o isi ina ia auai faatasi ma i tatou i lena sauniga sili ona tāua i sauniga uma.—Roma 5:8.

⁴ Se Sauniga e Sili Ona Tāua: O le faamanatuina o le maliu o Keriso ua sili ona faamatilatilaina ai e faapea, sa ia lagolagoina ma le lē ponā le pule silisili ese a le Atua. Ua faamanatu mai ai foi e lea mea ia i tatou e faapea, e mafai ona tatou olioli i se tulaga mamā i luma o Ieova e ala i le faaalia o le faatuatua i le taulaga a Iesu, i lea ua faamautinoaina ai le faaolataga. (Galu. 4:12) E moni lava, o se sauniga aupito sili lenei ona tāua o le tausaga!

⁵ O le alofa mo o tatou tuaoi, e faaalia lea i lo tatou valaaulia o i latou ina ia aufaatasi ma i tatou i le faamanatuina o le Talisuaga Afiafi a le Alii. O loo avanoa pea aogā o le togiola mo le faitau miliona o ē ua aʻoaʻoina e uiga i lona matuā tāua. (Fili. 3:8) O i latou e faaalia le faatuatua i le taulaga a Keriso, e mafai ona maua le faamoemoe mausalī o le ola e faavavau.—Ioa. 17:3.

⁶ O le vaitaimi o le Faamanatuga, ua maua ai ni avanoa faapitoa mo i tatou e faaalia ai le talisapaia mo le alofa tunoa e lē mafaatusalia o le Atua. O se taimi aupito sili lenei ona lelei e auai ai ma le maelega i le talaʻiina o le tala lelei o le Malo o le Atua. O aogā sili o loo faatali mai mo i latou uma o ē manatunatu ma le tatalo i le meaalofa foai fua e lē mafaamatalaina a Ieova ma fuafua ina ia auai i le faamanatuina o le Talisuaga Afiafi a le Alii i lenei tausaga!