Tuuina Atu e Auauna o le Faiva se Auaunaga Tāua
1 “Ua latou faaalia mai le avea o i latou lava o ni tane tuutoina moni o ē ua faailoa lo latou faatuatua i le maelega i le auaunaga o le Malo ma fesoasoani atu i isi ina ia faamautuina i le faatuatua.” O le faamatalaga lea a le Organized to Accomplish Our Ministry, i le itulau e 57, e faatatau i auauna o le faiva. O le mea moni, o le faaaoaoga faaleagaga ua faataatia e a tatou auauna o le faiva ua talafeagai ona faaaʻoaʻo i ai. O le galulue faatasi ma i latou ma toeaina e “iu ina atiina ae [ai] le tino e ia lava i le alofa.”—Efe. 4:16.
2 Ua faataunuuina e auauna o le faiva se gaoioiga tāua i le faapotopotoga. Seʻi manatunatu i a latou auaunaga tāua! Latou te vaaia mea tau tupe, lomiga, mekasini, tusiga, ma oganuu; latou te galulue foi o ni tautua, vaaia mea faaleotele leo, ma fesoasoani e tausia le Maota o le Malo. E auai foi i le Aʻoga o le Faiva Faatiokarate ma le Sauniga o le Auaunaga. O nisi o i latou e ono faia foi lauga i le lautele po o le faia o nisi o sauniga a le faapotopotoga. E pei lava o vaega o le tino faaletino, ua faataunuu ai e auauna o le faiva auaunaga ia o loo tatou manaomia.—1 Kori. 12:12-26.
3 I le vaai atu i le felagolagomai faatasi o auauna o le faiva ma toeaina o se vaega o le tino e tasi o se auauna, faatasi ai ma le faaaloalo ma le malamalama o le tasi i le isi, e faalaeiauina ai isi e faia foi faapea. (Kolo. 2:19) E ala i le faataunuuina ma le faamaoni o o latou tiute tauave i lea vaiaso ma lea vaiaso, ma le faaalia o se naunau totino i isi, ua latou saosaolaumea ai mo le agaigai i luma faaleagaga o le faapotopotoga.
4 O le ā e mafai ona tatou faia e faaalia ai lo tatou talisapaia o auauna o le faiva galulue mamafa? E manaomia ona tatou faamasani i o latou tiute tofia ma faaalia se nofo sauni e lagolagosua pe a manaomia la tatou fesoasoani. E ala i upu ma gaoioiga, e mafai ai ona tatou faailoa atu ia i latou le talisapaia o la latou galuega. (Faata. 15:23) O i latou o ē galulue mamafa mo i tatou ua tatau ona tatou aloaia lelei i latou.—1 Tesa. 5:12, 13.
5 Ua faataatia mai i le Afioga a le Atua matafaioi ma agavaa o auauna o le faiva. (1 Timo. 3:8-10, 12, 13) O la latou auaunaga paia tāua e matuā manaomia mo le faagaoioia o le faapotopotoga. O tane faapena ua tatau i ai a tatou faalaeiauga faifai pea, a o latou “faia mea e tele i le galuega a le Alii.”—1 Kori. 15:58, NW.